Read Biete ISAIA 63 Bible Online

ISAIA 63 - Biete bible

ISAIA 63

¹“Tu mani Edom khopui, Bozra ata hong so? Roinpui taka puan sena rivo a, thuneina neh râtna sila hong duai duai soh?” PUMAPA, Saninzôktu roinpui, â nêna inpuang ranga hong a nit.

²“Îtho sik im a silbomhei a îvût phung a, grep irâ sômtu silbomhei angkan teh ai nit?”

³PUMAPA khan a sâm a, “Keima khât bangin nam danghei chu grep irâ angkan ki siririala, tute ne san rangin hong mak e. Ki ningthikin ki chîlpol neng a, an thisen khan ki silbomhei ai kâi a, a înim tâk a nit.

⁴Phuba lâk zoro a nit tâk ki ti a, ki mihei ken zôk rang zoro ai tlung tâk a nit.

⁵Ne ṭangpui rang tute omak iti ki mun chu ke lung arlak ok a. Nikhomsela, ki ningmur khan ritha a ne pêk a, keima khâtin nêna kî chang tâk a nit.

⁶Ki ningthikin nam tinhei khah ki chîl neng a, ke chekindar chit tâk a, an thisen khah rinêngah ki înluang suak tâk a nit.”

⁷PUMAPA lungkhamlianzia hi inpuang ki ti; Ki ta ranga a thilthohei murdi sikin ani chu ki înpâk a nit. A ṭhatna neh a lungkhamlianna sikah khan, Israel insungkuahei chu ṭhatvurna itam takkah ai vur a nit.

⁸PUMAPA khan, “Ki mihei an nit a; ne lêm tlak no nih,” a ti a. Khasikah khan an ta rangin saninzôktu ai chang tâk a nit.

⁹An tuangna tinrêng a tuangpui a, Vântirtôn ni loiin, PUMAPA ngêiin anni chu a înzôk a nit. Lung a thlung a, a kan tak tak sikin a irtlan a nit. A lei hong donsui mai ngai a;

¹⁰nikhomsela, a chungah an rihel tâk a. Ama Rithla Rithiang khom ngaisiat an sak a. Khasikah khan PUMAPA chu an irâl hong ichangin ai doi tâk a nit.

¹¹Khan zoro thlenga PUMAPA som Mosia damlâi sûnhei khah an riat suakin ṭongridon an siam a, “A mihei an ruaituhei tuipui ata inzôktu PUMAPA khah taktiang im ai om tâk? Mosia zianga Rithla petu PUMAPA khah taktiang im ai om tâk?

¹²Mosia changtianga om a, thil roinpui tak takhei itho a, tuikhanglian tuihei iṭhen a, kumkhuaka ranga riming inthangna a mu theina ranga, a mihei ruai ikhâitu PUMAPA khah takâm ai om tâk?” an ti a. PUMAPA îruaiin, anni chu ram sakorhei angkan an kal a det a, an îba viat ino a nit.

¹⁴Loisûl ṭhatna phâia ran lôm an ilêng dûl dûl ngai angkan PUMAPA khan a mihei chu ama Rithla ngêiin thlangamna a pêk a. A mihei chu iruaiin riming ṭhatna a lo tâk.

¹⁵PUMAPA, ni omna mun rithiang neh roinpui rivân ata ne zuk thlîr inla, ne zuk en roh. Ni ne ngaisakna liantak neh ni râtna, ni lungkhamlianna neh ni ṭhatna khah taktiang im ai om tâk? Nung ne song tlak no roh.

¹⁶Nang chu kin Pa ni nit. Kin chibul Abrahama neh Jakoban ne reh phâk mak; khanniseh, nang chu PUMAPA, kin Pa ni nit. Tiklâi khoma ne saninzôk ngaitu ni nit.

¹⁷PUMAPA, îtho tâk im ni lampui ata kin pêt rang ni ne iphala? Nung nang isong rangin teh ithôm tuklul iliana ni ne isiam? Ni dongtum nam, ni sin itho ngaihei sikah hin kin tiang ngat nôk roh.

¹⁸Keimani, ni mi rithianghei hi itôiteka sung kin irâlhei irzûl paiin kin om a; ni In rithiang hi an chîl isiat chit tâk a.

¹⁹Kin rêng inih tlak ngai ino angkan nangman ni ne en tâk a, ni mihei lei inih tlak ngai ino angkah kin nit tâk hih.