Read Biete ISAIA 64 Bible Online

ISAIA 64 - Biete bible

ISAIA 64

¹Rivân ithlêrin zuang ṭum inla chu o, mualtlânghei chu iṭin an înthing nat nat rang a nit.

²Tui ilum ritlok nguan nguan angkah hin nam tinrêng ni maah inîng an ti. Zuang inla, ne râlhei mitmuah ni sinthotheizia zuang inlang roh.

³Kin isabei ino thil inrît tak tak ithoa ni zuang lâiah khan mual ilian tak takhei kha ni maah an inîng a.

⁴Ni chunga tûngna ringathei ta ranga mita mu ngai ino neh ikuara reh ngai ino thil itho ngaitu Pathian dang zel tute omak e.

⁵Thil dik itho nuam a, ni lungdoa om dân iriahei chu ni lôm ngai a. Kin chungah ni ning a thik tâk a; nikhomseh, kin la sual mai a; ni ningmurna a natinsat tak tak khoma tianlâi ata thil dikino kin lai tho mai ngai a nit.

⁶Kin rêngkan kin porinche korong tâk a, kin ṭhatna murdi innôt puanṭet porinche tak angkah a nit. Thingnâ châr phâivuan ai sêm inlêng angkan kin sualnahei khan a nen lêng a nen lêng tâk a.

⁷Tute ner ming rilam rêng rêng om khâi mang ung a, ṭangpuina ngên rangin tute ni tiang hong khâi mang ung. Kin sualhei sikin ni mêl ni thup pêk tâk a, ni ne imâk tâk a nit.

⁸Nang chu PUMAPA kin Pa ni nit, keini hi bêpil kin nit a, nangmah bêl ivuaktu ni nit. Kin rêngkah hin ni kutsuak kin nit.

⁹Khasikin, PUMAPA, kin chungah hin ni ning inthik tlak khâi non la, kin sualna remai khâi no roh. Ni mihei kin nit a, lung nen kham roh.

¹⁰Ni khopui rithianghei chu ramchâr inthim a chang zoi tâk a, Jerusalem chu a ram zoi tâk.

¹¹Kin Biak In rithiang neh enihoi, kin pi puhein nang an lei inpâkna ngai khah meiin a kâng isiat zoi tâk a. Kin mun ihoi murdihei khom a chim zoi tâk.

¹²PUMAPA hihei hih ân khôk nî ti no mani? Îte tho loiin kin diar ban ni ne la întuang mai rang mani?