Read Biete ISAIA 65 Bible Online

ISAIA 65 - Biete bible

ISAIA 65

¹PUMAPA khan, “Ki mihei ṭongṭaina sâm rangin ker siam ṭian a, khan ker ming rilam nuam zel omak a. An ne mu zel theina rangah ki lei om a, khan ne zong nuam tute omak a, ‘Hin ki om; nangni ṭangpui ki ti,’ iti rangin ki lei risiam ṭian a, khan a nam pumin ki ziangah ṭongṭai ngai mak.

²Sûn thluanin ki mihei lei ilôm rangin ke bân ki phar ngai a, khan tuklul ilian takkan thil dikino thon an lungdo bang an zui ngai a, an omdân hi dik ino tak a nit.

³Hi mihei hin izak viat loiin ningthik an ne sak mai ngai a. Nam dang pathian rang rikul iserheiah ribôlna an lan a, nam dang pathian mâichâmheiah namhoi an hâl a.

⁴Mithi rithla sôn rangin zânah ipûk neh ithlânheiah an fe ngai a. Voksahei an fâk a, nam dang pathian zianga lan sa rithiang ino buttuihei iinin an phûng an ibênpama an suak a.

⁵Mi dang ziangah, ‘Ki ziang ata rikiang rei; nin ne tônin chu kin îbor rang a nit, keini chu kin irthiang kêng ai nit,’ an ti ngai a. Khangkana mihei kha chu meikhû, sûn thluana ne ur mai ngaitu an nit.

⁶“Annihei kuttum ki tho rang dân ken dang infel thlâm tâk a, an sik rang chu riziak infel thlâm a nit tâk. An thil thohei chu mu pelêm tho no ning a, an malpui chungah ki îṭhum rang a nit.

⁷An sualnahei neh an chibulhei sualnahei sikah khan anmani chungah kî thung rang a nit. Itlângheia nam dang pathian bôlkuangheiah namhoi an hâl ngai a, mualheiah khan an ne musitzia an inlang ngai. An thil thohei sika kuttum an chunga thla rang kha ki irkhî zoi diam tâk a nit,” a ti.

⁸PUMAPA khan, “Grep la ṭha chu tutên pai ngai mak a, uainin an siam ngai. Ki mihei khom hi an rêngkan chu inrimang vang no ning a, ki sin ithohei chu inzôk ki ti.

⁹Israel mi Juda richihei chu ṭhatvur ki ta, an richi suanpârhei khan ki tlângram chu luang an ti. Ki mi rithlang, ki sin ithohei chu kha munah khan om mai an ti.

¹⁰Anni khan chubai ne ûn an ta, nithlâk tianga Saron phâi neh nisua tianga Akor phâi chu an berahei neh an serâthei lêngna mun nîng a ti.

¹¹“Keimah, PUMAPA ne marak a, ke tlâng rithiang Zion ringil a, Gad neh Meni [35] chubai iûntuhei ta rangin chu ai danglam rang a nit.

¹²Nin tuang rangtum chu khandaia thi a nit, nangni that rangtu makungah la khûn ngêt nin ti. Nangni ki koi lâiin ne sâm mak chei a, nangni ke sôn lâiin ringai mak chei a; ki thu zôm loiin thil ṭhano tho mai nin rithlang a.

¹³Khasikah khan nangni ki îril a nit, chubai ne ûn a, ki thu zômhei khan fâknêk nei intam an ta, nangni chu voniṭâm dangindan om nin ti. Anni chu lôm an ta, nangni chu izak mâimôkin om nin ti.

¹⁴Ke somhei lungril râifânin lôm a ta, nangni chu lunginah takkan ṭap ngûi ngûi nin ti.

¹⁵Ki mi rithlanghei khan nin riming chu vânisâm nan mang an ta, Keimah, Tinrêngthothei PUMAPA ngêi hin nangni that ki ti. Khanniseh, ki thu zômhei chu riming ithar pêng ki ti.

¹⁶Ram sunga mi tukhom ṭhatvurna zong kangânin chu Pathian iamom ṭhatvurna zong an ti. Ṭonginkungna nei nuam kangânin chu Pathian iamom riming ichingin rikhâmna nei an ti. Zoro thlenga buainahei chu rilen tâng a ta, ringilin om tâng a ti,” a ti.

¹⁷“Rinêng ithar neh rivân ithar ki siam tâk. Tianlâia thilhei a vun zoi tâk a, iremai ni khâi no nih.

¹⁸Ki thil siam tharah khan râifânin lôm kumkhua tâng nin ti. Jerusalem ithar kî siam chu râifânnan sip a ta, a mihei khom lôm mai an ti.

¹⁹Jerusalem chungah lôm ki ta, ki mihei sikah khan râifânin kî sip rang a nit. Iṭap om khâi no nia, lungzîng khêk irî khom om tlak khâi no nih.

²⁰Ramtea thi om khâi no ni a, itar lua kêl mul iṭoi korongin dâm tâng an ti. Kum riza kâi loia thi chu ‘vânglâia thi’ ti tâng an ti. Khan mi sual kum riza kâi loia thi chu ‘vânisalna ai dong a nit’ tîng an ti.

²¹Inhei sin an ta, anmani ngir a sungah khan om an ta, tute dangin lua pêk khâi no nih. Grephei phun an ta, tute dangin dong pêk khâi no nia, anmani ngêiin a uain chu in an ti. Ki mihei chu hâi itarin dam an ta, an kut sintho râ chu an ring kongkârkah fâng an ti.

²³An sinthona chu thluantlung an ta, vânduaina rang ringotin nai nei ngai no nih. An richi suanpârhei idênin keimah, PUMAPA hin ṭhatvur mai ki ti.

²⁴Ki zianga an ṭongṭai a mong man, an ṭongṭainahei chu sâm ki ti.

²⁵Iniahei neh beratehei munkan lêng an ta, sakeibakneihei khomin serâthei angkan bupôl fah tâng an ta; irûlhei khomin ipil khah bun rin tâng an ti. Ke tlâng rithiang Zionah khan chu thil ṭhano neh mi innah thei rêng rêng om khâi no nih,” PUMAPA khan a ti.