Read Biete ISAIA 66 Bible Online

ISAIA 66 - Biete bible

ISAIA 66

¹PUMAPA khan hingkan a ti: “Rivân chu ki rêngṭhungmun a nit a, rinêng chu ki ke ringatna a nit. Ingkana in tak im nin ne isin pêk a, ki omna rang chu ai nit rang tâk?

²Keimah ngêiin rinêng neh rivân neh a sunga thil tinrêng hi kî siam a nit. Lungrila ringaiitlôm neh rilet a, ki thu zômtuhei murdi chu kî lôm ngaihei an nit.

³“Khanniseh, hi mihei hih chu an nuamlam takkan an ichâng a nit. Anmani ta rangin chu serâtchal ithata ribôlna lan manih miriam ithata ribôlna lan manih khom riphêr mak a; berate lan manih, ui irâk that ilan manih, baidi lan manih, vok thisen ilan manih, namhoi an ihâl manih, mirmil an ibiak manih, an ta rangin îte riphêrna omak e. Thil porinche chubai iûn hi an nuamlam tak a nit.

⁴Khasikah khan an chungah thil inrît tak zuang iṭhum ki ta, an thil ṭi ngai tak khah ki zuk îthlun pêk rang a nit. Ke sam lâiin ne sâm mak a, ke sîr lâiah khan ringai nuam mak e. Ki mitmuah ki nuamno lam thil an tho a, ki nuamno lam isin an irthlang tâk a nit.”

⁵PUMAPA ṭi a, a thu zômtuhei o, a thu sîr hih ringai rei, “Ki ta rangin iamom takka nin om sikah khan nin mihei ṭhenkan nangni nelin, rimanna îte nangni neipui nuam no nih. Nangni nuiso an ta, nin ziangah, ‘PUMAPA khan a roinpuina khah zuang inlangin nangni zuang inzôk riseh ba, khan kêng nin râifânna kha kin imu thei rang,’ an ti ngai a. Khanniseh, anmani ngei khah mualinphoiin la om ngêt an ti.

⁶Ringai rei, khopui sung irî vung vung, Tempil sunga irî chu im ai nit tâk? PUMAPA phuba lâk rihu a nit a, â râlhei kuttum ai tho tâk a nit.

⁷“Nupang naihan sê phâk loia nai inei zel angkah hin kha ki khopui rithiang khan nai ai nei tâk a nit.

⁸Khangkana thil khah tûm â reh tâk ngai? Tu ngân im â mu tâk ngai? Ram hih sûnkah thlâka hong iding ngai mani? Nam khom a hong îding suak zel thei mani? Zion khah naihân a hang sê kaneh nai ai nei zel tâk a nit.

⁹Ki mihei an suak rang zoro itlung vir kan isua loiin ki în-om rang mani?” PUMAPA khan ai ti tâk a nit.

¹⁰Jerusalem chu lômpui unla, nin râi infânpui rei, Nangmani hi khopui lungithlungtuhei. Nangmani, ama sika lei ingûi ngaihei, lômpui ta rei.

¹¹Naiten rinutui nuam dôra ai nêk ngai angkan, A roinpuina hong ithuar nôk chu nin nuam dôrkah manginhoi ta rei.

¹²PUMAPA khan hingkan a ti: “Vadung kang ngai ino angkan vângsakna chu nangni zuang ithlun pêk ki ta, nam danghei richongna chu tui ilian angkan nangni zuang inluang pêk ki ti. Nûn a naite ai enkol a, a îpom a, lungithlung takka a îduam ngai angkan nangni duam ki ti.

¹³Nûn a naite ai don inlian ngai angkah hin nangni don inlian ki ta; Jerusalemah khan rithlaringam takkan om tâng nin ti.

¹⁴Amakhah nin mu tikin chu lôm nin ta; irâtin har vak tâng nin ta, loisûl indon nuang angkan om tâng nin ti. Khatikin chu keimah PUMAPA hin ki thu zômhei chu ki ṭangpui ngai a, ke râlhei chungah ki ningthik ken lang ngai, iti reh tâng nin ti.”

¹⁵Ringai roh, PUMAPA chu mei neh a zuang e. Thlisim tâlia zuang ichuangin a ningthik isintuhei kuttum itho rangin zuang a ti.

¹⁶PUMAPA khan mei imangin roi rêl a ta, mi tin chungah khandai khah ilek a ta, mi itam takkah that a ti.

¹⁷“Nam dang pathian chubai iûn ranga rithâr rithiang a, rikul iser ipan a, rizôp dûl dûla fe a, voksa neh izusa fa a, thil porinche tinrêng ifatuhei rêng rêng chu an rimang rang nikhua a nâi teng tâk.

¹⁸An thil ngaituahei neh an sinthohei chu kî riat a nit. Nam tinrêng neh ṭong tinrêng imanghei chu ṭhui bûm rangin kî zuang thiai tâk a nit. An hong ribûm tenan chu ki roinpuina hong mûng an ta,

¹⁹keimah ngêiin anni chu kuttum kî tho a nit iti reh tâng an ti. “Khanniseh, an lâia ṭhenkah chu izuan, nam dang lâiah Tarsis-ah hei, [36] Libia-ah hei,[37] Luda-ah hei tir ki ta, thal kâp ithiamhei[38] chu Tubal-ah hei, Grik ramah hei,[39] ker ming inthangzia la reh tlak ngai ino neh ki roinpuizia la mu ngai inohei ziangah tir ki ta, nam tinrêng lâiah ki roinpuizia inpuang an ti.

²⁰PUMAPA zianga thil ilan rang an hong ichôi ngai angkah hin nam tinrêng lâi ata nin chipuihei chu hong ṭhui an ti. Sakor chungheiah chuang an ta, tâliheiah iṭhung an ta, tolaichuang sungheiah iṭhung an ta, sakuartung neh saringsei chungheiah hong chuang an ti. Israelhein khêng rithianga thil ilan rang an hong ichôi ngai angkah hin ke tlâng rithiang Jerusalemah khan hong an ti.

²¹An lâia ṭhenkah chu thiampuhei, Levia richihein lei siam ki ti.

²²“Rivân ithar neh rinêng ithar ki siam rang chu ki makungah khan ai om mai rang angkah takin nin richi suanpârhei neh nin riming khom om mai a ti.

²³Thla thar neh sabatnî feng kan chubai ne ûn rangin mi tin hong zut zut an ti,” PUMAPA khan a ti.

²⁴“An suak tiangah khan ki chungah rihel ngaihei ruak kha mûng an ta, an ruak ithu fah ngai rilunghei khah thi tlak no ni a, anmani kângtu mei khom khah thi viat no nih. Mi murdîn porinche itiriom ti tak tak an ti.”