Read Biete ISAIA 7 Bible Online

ISAIA 7 - Biete bible

ISAIA 7

¹Uzia nai Jothama naipa Ahaza, Judai ramah ân lal lâiin Suria rêng Rezina neh Israel rêng Remalia naipa Peka chu Jerusalem irûn rangin an hang fe a; khanniseh, hang inê thei mak a.

²Suria sipaihein Israel ram an hong tlung tâk iti Judai ram rêng an irilin chu amah neh a mipuihei khan an ṭi tak tak tâk a, rampui thing phâivuan ai sêm angkah takin an inthing tâk a.

³PUMAPA khan Isaia ziangah, “Ni naipa Shear Jesuba ṭhui inla, Rêng Ahaza var mupui roh, dîl sak ita rithoka tui lâkna lampui mongna puan risuh ngaihei mun panna lamilianah khan a om.

⁴A ziangah, ‘Intûng ṭiankan om inla, thâiindôpa rithlavâiin om no roh. Suria rêng Rezina neh Remalia naipa Peka ningmur hih thingthu bong ikhû angkah pai kêng an init.

⁵Suria neh Israel rêng Remalia naipa Peka khan ni chungah thil ṭhano an iphan a nit.

⁶Judai ramah hang fêng ei ta, inbuai ei ta, ṭhen chit ei ta, an rêng rangin Tabela naipa hih phun ei ti,’ an iti a nit.

⁷“Khanniseh, keimah PUMAPA Pathian hin kî ti a nit, khangkah khan tlung tlak no ni a, lo khom tluk tlak no nih.

⁸Suria khom a khopui tak Damaska nêkan rât ual mak a, Damaska nêkan Rezina khom rât ual bîk mak e. Israel khom kum sômirukkah kum ringaka sungin hek riai an ti.

⁹Israel khom a khopui tak Samaria nêkan rât ual mak a, Samaria nêkan Remalia naipa rêng Peka khom rât ual bîk mak e. Nin ne iam non chu iding suak thei no tin u,” a ti a.

¹⁰PUMAPA khan Ahaza ziangah thu â sîr nôk a,

¹¹“Khurmongboia rithokin manih, rivâna rithokin manih risinsiana nang in-en rangin zong roh,” a ti a.

¹²Ahaza khan, “Risinsiana ngên no ning e, PUMAPA rinak chu nuam mang e,” a ti a.

¹³Isaia khan, “Rêng Davida richihei o, ringai ta u, mi dang insôl ân rup ti loiin ei Pathian ten khom insôl nin inuam mani?

¹⁴Khasikin, PUMAPA ngêiin risinsiana nang in-en a ti: Ringai ta, nungâk[2] khatkan nai vong a ta, naiipa nei a ta, arming ‘Imanuela,’ [3] sak a ti.

¹⁵Â sia â ṭha â thlei theia rithokin mihei khan dût neh khuaitui in an ti.

¹⁶Kha nai khan â sia iheng a, â ṭha arthlang thei ma khomin nî ṭi tak takhei ram chu inramin om tâng a ti.

¹⁷“PUMAPA khan nangmah neh ni mihei neh ni pa insungkuahei chungah, Israelhei kha Judai rama rithoka a tuma an om ata la tlung ngai ino intakna rikhêl tak a îthlun rang a nit; Asuria rêng kha hong ṭhui a ti.

¹⁸“Kha nikhuaheiah khan chu PUMAPA khan Aigupta rama Nail vadung iṭangheia rithokah khan ithoi lôm silrisîtin koi a ta, Asuria rama rithok khomin ikhuai lôm koi sâng a ti.

¹⁹Hong vuang zut zut an ta, vadung rikua irôl chadanheiah, tlângram irôl chadanheiah, rilingbukheiah neh ran lêngna munheiah fuh zut zut an ti.

²⁰“Kha nikhuaah khan chu Eufratis vadung rikama om, mi lu voiinkol irât, Asuria rêng khah PUMAPA khan mang a ta, nin sam neh nin mul murdi nin rikhamul tena ziat infâi a ti.

²¹“Kha nikhua khah a hong tlungin chu serâtpui khatkah neh kêlpui inikah bang min vâi khom sela,

²²an dût khah tam a ta, a fâk khop rang nei tâng a ti. A nit, kha rama a la om isunhei khan dût neh khuaitui iin rang nei an ti.[4]

²³“Kha nikhua kha a hong tlungin chu, tangka sângkah neh inrihen thei grep kung sângka omna murdi khom kha ibuar neh rilingkungin ibô khap tâng a ti.

²⁴Amakhan phel neh thal ichôiin mihein ramsa zong pupêt an ti. Ram pumpuiah rilingkunghei neh ibuarhei ai sip rang a nit.

²⁵Tutloa an iṭuan infâi ngai mual murdi chu ibuarhei neh rilingkunghein ibô khap a ta, tute fe ngam khâi no nih. Kha mun khah serât lôm neh bera lôm lêngna mun ni tâng a ti.”