Read Biete ISAIA 8 Bible Online

ISAIA 8 - Biete bible

ISAIA 8

¹PUMAPA khan ki ziangah, “Riziakna rang lekhazuat ilianpa lan la, mi tin tep thei rangin, ‘Maher-Shalal-Has-Baza’ [5] iti thîr rizumin irol rutkan riziak roh.

²Riatpuitu rangin mi iamom tak tak inikah thiampu Uria neh Jeberekia naipa Zakaria ni riseh,” a ti a.

³Khante, zoro tôiteka nungah khan ki nupuiin nai a vong a, naiipa a nei a. PUMAPA khan, “Armingah, ‘Maher-Shalal-Has-Baza’ sak roh.

⁴Naite khan, ‘Enu’ ‘Epa’ a ti thei ma zelin Damaska richongna neh Samaria khua ata râllâk sum an ilâk khah Asuria rêng khan chôi vang a ti,” a ti a.

⁵PUMAPA khan ki ziangah thu â sîr nôk a.

⁶Ani khan, “Hi mihei hin Silo vadung idamzan tui khah an nôl a, Rezina neh Remalia naipa Peka an lei lôm a.[6]

⁷Khasikin, Keimah, PUMAPA hin Asuria rêng neh a sipaihei kha Judai ram irûn rangin zuang ṭhui ki ti. Eufratis vadung tui ilian, valong isipa zuang ilian angkan zuang del zut zut an ti.

⁸A valong sip a ta, a vakôlheiah khan ilêt zut zut a ti. Judai ram chu zuang dîl a ta, zuang fen thiai a ti. Ring ten iphâk dapkan ram pumpui dîl a ta, chîm riai a ti,” a ti a. O, Imanuel. (Pathian ei ziangah a om) Arthla phar rizat kha ram a irkhû a nit.

⁹Nam tinhei reh rei, nin irzal rang a nit. Ram ilah taka omhei o, nin ikuar sung rei. Risiam diamkan om unla, ṭi titak rei. A nit, risiam diamkan om unla; nikhomseh, ṭi tak tak rei.

¹⁰Râldoi rang tlia inrifûk thlâm khom unla, lo tluk no nih. Nin nuam dôrkan isîr khom unla, arfena om ual no nih. Kin Pathian chu kin ziangah ai om a nit.

¹¹Hi mihei lampui rô lâi hih zui loi rangin PUMAPA khan ikhir takkan a ne ril a.

¹²“Hi mihei hih inrualpui no roh, an iṭihei khom khah ṭi viat no roh, an rithla tlâk dipnaah khan ner thla intla dip no roh.

¹³Tinrêngthothei PUMAPA hih a nit marit nin tho rang chu. Amah bang hih a nit nin ṭia marit nin tho titak rang chu.

¹⁴Arthiang tak tak sikin Israel insungkua inikahei rangin risuina rang lung, risuia ibâna rang chu a nit. Jerusalema omhei rangin tlâkna rang dîp neh iôkna rang châng a nit.

¹⁵Mi tam takkah risuiin ibâ an ta; ilîr rinôi an ti. Iôk an ta, itâng khap an ti,” a ti a.

¹⁶Nangmani, ki kôilômhei, nin thu risei nangni ki îril khah vong inṭha unla, ikol ngit rei.

¹⁷Keiman chu PUMAPA hi ngâk mai ki ti, Jakoba richiheia rithokin a mâi a lai thup hi a nit; nikhomseh, keiman chu ki tûngna kha ama chungah ringat ngit ki ti.

¹⁸En ta, PUMAPA ne ipêk naipanghei neh hin munkan kin iom a nit. Zion tlânga om Tinrêngthothei PUMAPA khan Jerusalem mihei rang risinsiana thil rikhêl tak inih rangin a ne itir a nit.

¹⁹Mithi sôn ithiamhei, dôithiamhei, â pôltu neia chiar setsuta ikhêk êl-ûl ngaihei ipan rangin nangni la tîng an ti. Anni khan, “Rithlahei hih isôn rang a nit a, mithi tâkhei khom a la damhei ta rangin isôn rang an nit,” tîng an ti.

²⁰Annihei khah nin sâm rang a nit. PUMAPA inriseina thu nangni ki îril khah ngaitua mai rei. An thu ringai no unla, an thu sîr khah omzia nei tlak ino a nit.

²¹Lunginzîng tak neh von iṭâm takkan mihei khan ram khah la chai an ti. An vonṭâm sik an ningmur sikin rivân tiang ienin an rêng neh an Pathian vâni la sâm an ti.

²²Khanungchu, rinêng tiang zuk en an ta, lungzîngna neh izîng inrît tak mûng an ta, izîng richel tak, nam inlûta an omna ngêi khah mûng an ti.