Read Biete ISAIA 9 Bible Online

ISAIA 9 - Biete bible

ISAIA 9

¹Hi lungzîngna zoro ata zôkna rang lampui rêng rêng an ta rangin om khâi no nih. Zoro thleng tâkah khan Zebulun neh Naftali ram chu musit iom tak a nit a. Nikhomsela, zoro la hong rangah chu Mediteranean tuipui rikama rithoka Jordan dung râl Galili ram, Jentailhei omna ram chu chôiinrisângin la om a ti.

²Izîng nuaia lêng ngai namhei khan ivâr roinpui tak an mu tâk a; Ram izîng taka omhei rangah khan ivâr a zuang vâr tâk.

³Kha namhei khah nen pung a, An râifânna khom nen ribôk pêk tâk a. Bu ât zoro neh râllâk sum risem lâia an râiifân ngai angkan, Ni maah khan an râi ai fân a nit.

⁴An puakrik pêlna ringkolhei neh an thil rikotna ngai irolhei, Â sirdetun â tôkna tôkmol neh khan, Midianhei inê nî angkah khan, Ne khiak pêk chit tâk a.

⁵A hong irûntu sipai lôm pheikok hei, An thlukthla thisen ikâi nengnunghei murdi meiah ihâl la nîng a ti.

⁶Ei rang nai a zuang suak a, Naipa ipen ei om tâk. A dârah khan roirêlna ringat a ta, Arming chu, “Rikhêla, Roisaktu, Pathian Irât, Kumtluang Pa, Ringeina Rêng,” tîng an ti.

⁷A roirêlna det tîr tîr a ta, A ram sungah ringeina khan mongtik nei no nih. Thudik imanga idik taka roiirêlin, Davida rêngṭhungmunah iṭhung a ta, indet a ti, Atûna rithoka kumkhuantluangin. PUMAPA ṭhatnem ringaina khan amakhah ai tho rang a nit,

⁸PUMAPA khan Israel rama Jakoba richihei idemin thu â sîr a.

⁹Israelhei murdi, Samaria khopuia omhei murdi khan hihei hih aman ai tho a nit iti riang an ti. An ripâkin an risong tak tak ngai a:

¹⁰“Talung bang chim khom seh, lungisuk inrichuan nôk ei ti. Theichâng phakilâihei tan ikhiakin om khom seh, sidar thing iṭhan thûl nôk ei ti,” an ti a.

¹¹PUMAPA khan an irâlhei â thoi a, anmani hualtu ranghei â phung tâk a.

¹²Sak tiang Suria hei, thlang tiang Filistia hei, Israel ilem itumin an bâi an âng huang a. Khaten khomin PUMAPA ningthik la ṭuai mak a, kuttum itho rangin a kut a la îlek mai a nit.

¹³Israelhei chu insîrin rilet mak a, Tinrêngthothei PUMAPA khan kuttum a tho nung khomin a ziangah kîr nuam mak.

¹⁴Khasikin, sûnka sungin Israelhei lu neh rimei chu PUMAPA khan tan pêk a ta, an itûm ibân neh âiriahei khom rivât pêk sa riai a ti.

¹⁵An lu chu an ruaituhei neh an milianhei an nit a, an rimei chu zânthla milakbûrhei hi an nit.

¹⁶An ram ruaituhei hin mipui an ṭhui insual a, an iṭhuihei chu an irmang zoi tâk a nit.

¹⁷Pathian ngaisak loiin an rêngkan thilsual an tho riai a, an thu sapsuahei lak siatna korong a nit a. Khasikin, PUMAPA khan an tlangvâlhei kha zua no ni a, farahei neh numeihei khom lunginkham ual no nih. Khaten khomin PUMAPA ningthik la ṭuai ual mak a, kuttum itho rangin a kut a la îlek mai a nit.

¹⁸Mihei sualna hih ibuar neh rilingkunghei ikâng ngaitu mei angkah a nit a, ram ikânga a khû tor iding ngut ngai angkah a nit.

¹⁹Tinrêngthothei PUMAPA ningthikna kuttum khan mei angkan a ram pumpui ân kâng a, miriamhei chu ihâl rua ritikbûm angkah pai an nit. Mi tin mahni ta rang ringotin an iring a nit.

²⁰Ram sung mun tinah mihei khan an ivoitiang, an ichangtiang mi an lep a, an fâk a; nikhomseh, an dîp zel sip mak a. An naihei tena khom an ifâk a nit.

²¹Manasea namhei neh Efraima namhei kha an ridoi risak a, Juda richihei khom a rualin munkan an doi a. Khaten khomin PUMAPA ningthik kha la ṭuai ual mak a, kuttum itho rangin a kut a la îlek mai a nit.