Read Biete LEVIDÂN 1 Bible Online

LEVIDÂN 1 - Biete bible

LEVIDÂN 1

¹Ritongna Puan-Ina rithokin Mosia khah PUMAPA khan a koi a,

²Israela richihein an hong mang rang ribôl dân khah a pêk a. Tukhomin PUMAPA ziangah thillan a hong lanin, a bera manih, a kêl manih, a sial manih a hong lan ngai rang a nit.

³Thillan kha hâlrivâm thillan[1] rang a nitin chu sial lôm lâia achal, demnaboi a lan rang a nit. PUMAPA lei iham rangin Ritongna Puan-In kotbâi bulah â petu khan a hong lan rang a nit.

⁴Khante, kha mi khan hâlrivâm rang sechal lu-ah a kut ringat a ta, a sual ribôlna rangin iham nîng a ti.

⁵Sechal khah PUMAPA maah that a ta; Arona nai thiampuhei khan a thisen khah PUMAPA ziangah lan an ta; khanungchu, Ritongna Puan-In kotbâi bula mâichâm kha arkhîlkan an rithe rang a nit.

⁶A vun kha lîp a ta, a sa khah archan rang a nit.

⁷Arona nai thiampuhei khan mâichâmah thing lei siang an ta, mei sêm an ta;

⁸khanchu, satlinhei khah a thâi neh a lu neh khan, mâichâma meiah khan an hâl rang a nit.

⁹A sungkuahei neh a kehei kha chu tuiin risûn fâi rang a nit a, â lantu thiampu khan mâichâmah khan a rêngkan a hâl rang a nit. Amahih hâlrivâm thillan tho rang dân chu a nit, hi thillan inam hin PUMAPA chu a înlôm[2] ngai a nit.

¹⁰Bera lôm lâia mi manih, kêl lôm lâia mi manih, hâlrivâm thillana a lan rangin chu achal, demnaboi a nit ngêt rang a nit.

¹¹PUMAPA maah, mâichâm mâr tiang pangah khan that a ta; a thisen khah thiampuhei khan mâichâm kha arkhîlkan an rithe rang a nit.

¹²A sa khah richan a ta, thiampun mâichâma meiah khan a sa khah a lu neh a thâi neh a hâl rang a nit.

¹³A sungkua neh a kehei kha chu tuiin risûnfâi masa nîng a ta, a rêngka khan thiampu khan mâichâmah a hâl riai rang a nit. Hâlrivâm thillan a nit a, hi thillan inam hin PUMAPA chu a înlôm ngai a nit.

¹⁴PUMAPA zianga hâlrivâm thillan rang khah iva[3] a nitin chu vaṭhu manih, pharvali manih a nit rang a nit.

¹⁵Thiampu khan lei dong a ta, mâichâmah khan a lan rang a nit; a ring iher thlek a ta, a lu khah mâichâmah hâl a ti; a thisen kha chu mâichâm pangah khan ân zung vang rang a nit.

¹⁶Â ong neh a rôlrui kha chu mâichâm kôl sak tiang panga rivut sianaah ipai rang a nit.

¹⁷Arthlaah khan itun a pum kha rimapit loiin isân phar phat rang a nit a, mâichâmah khan a pumin a hâlrivâm rang a nit. Hâlrivâm thillan a nit a, hi thillan inam hin PUMAPA chu a înlôm ngai a nit.