Read Biete LEVIDÂN 10 Bible Online

LEVIDÂN 10 - Biete bible

LEVIDÂN 10

¹Arona naipahei Nadaba neh Abihua hei khan an meiluakah mei ri-al an sia a, namhoi ihâl ngai an phul a, PUMAPA ziangah mei rithiang ino[7] khah an lan a. Khangkana mang khah PUMAPA khan ai khap a nit.

²Khanchu, voikazelin PUMAPA zianga rithokin mei a zuang ṭum a, PUMAPA maah an ruaikan a kâng that tâk a.

³Khanungchu Mosia khan Arona ziangah, “PUMAPA khan hi chungchângah hin hingka hin a ti; ‘Ki sinthotuhei murdi khan ker thiangna hih marit an tho rang a nit. Ki mihei maah ki roinpuizia ki înlang rang a nit,’ PUMAPA iti khah amahih a nit hi,” a ti a. Arona khah a dâirek a.

⁴Mosia khan Arona pangâk Uziela naipahei, Misaela neh Elzafana hei khah a koi a, an ziangah, “Hong nâi unla, nin suapuihei ruak hih mun rithiang ata la suak unla, riabuk dâiputiang rizôn suak rei,” a ti a.

⁵Khanchu, an hong a, Mosian thu a pêk lam angkah khan an ruak khah an thiampu zakorfualah khan riabuk dâiputiang an rizôn suak tâk a.

⁶Mosia khan Arona neh a nai Eleazara neh Ithamara hei ziangah khan, “Lusûnin, nin sam ithla no unla, nin puanhei khom potthlêr no rei, khangkan nin thon chu nin ithi rang a nit; PUMAPA kha nam pumpui chungah a ning ai thik rang a nit. PUMAPA meiin ai kâng thathei khah nin suapui Israel danghei khan sûn thei an ti.

⁷Nangmani chu Ritongna Puan-In kotbul khah mah no rei, a nit non chu nin ithi rang a nit; PUMAPA riak inrithu kêng nin init,” a ti a. Khanchu, Mosia ti pêk lam angkah khan an tho tâk a.

⁸PUMAPA khan Arona ziangah,

⁹“Puan-In sung nin hong lût rangin nangmah neh ni naihei hin uain neh zu nin in zoiin nin lût rang ni mak e, nin in-in chu nin ithi rang a nit. Hi dân hih nin richihei murdîn kumkhuaka an hong zôm rang a nit.

¹⁰Thil iser neh ser ino, thil rithiang neh rithiang ino nin ithlei thiam ngêt rang a nit.

¹¹Mosia zianga dân nangni kî pêk murdi khah Israel mihei nin inrisei rang a nit,” a ti a.

¹²Mosia khan Arona neh a naipa a la damhei ruai Eleazara neh Ithamara hei ziangah khan, “Bubâl thillana rithoka PUMAPA zianga ilan bân ibaidi khah lah unla, chol pol ino bairiamin siam unla, mâichâm bulah khan fah rei, thillan rithiang a nit.

¹³Mun rithiangah khan fah unla, PUMAPA zianga farua thillana rithoka nin naihei neh nin dongtum a nit. Amahih PUMAPA thupêk a nit.

¹⁴A lung-er neh a malpui, PUMAPA zianga ngaihoi thilpêk neh ngaihoi tholôm, thiampuhei dongtum ranga an hong ipêk kha chu nangmah neh ni insungkuahein mun rithiang takmun khomah fah thei nin ti. Hi thillanhei hih nangmah neh ni naihei fâk ranga Ringeina thillana rithoka nin dongtum rang chu a nit.

¹⁵PUMAPA zianga farua thillana sathâi an hong lan zoro kipah a lung-er neh a malpui an hong chôi ngai rang a nit. PUMAPA thupêk angkan amakhah kumkhuaka nangmah neh ni naihei dongtum rang a nit,” a ti a.

¹⁶Mosia khan sual ribôlna kêl chungchâng thu khah iṭha takkan ardon a; an lei ihâl zoi pial tâk a nit iti a riat tâk a. Khanchu, Eleazara neh Ithamara hei ruai chungah khan a ning a thik a, a ngo a,

¹⁷“Îtho sik im sual ribôlna kêlchal sa khah mun rithiangah nin fâk no? Thil rithiang tak kêng ai nit, mipui sual ribôlnaa rithoka nin dongtum ranga PUMAPA nangni ipêk kêng ai nit.

¹⁸Ringai ta u, a thisen lak khah Puan-Inah hong lah lût mak chei a, thu nangni kî pêk angkah khan a sa khah mun rithiangah nin fâk ngêt rang kêng ai nit,” a ti a.

¹⁹Arona khan Mosia ziangah, “Khateh sual ribôlna sa khah vuanah hin la fan lang, PUMAPA khan la ham a tîm? Mipuihei khan an sual ribôlna neh an hâlrivâm thillan khah PUMAPA ziangah vuanah hin an hong lan a, khangkan a nit khomin hingkana thil inrît hih ki chungah a zuang itlung a nit,” a ti a.

²⁰Amakhah Mosian a riatin a lung a ôi tâk a.