Read Biete LEVIDÂN 11 Bible Online

LEVIDÂN 11 - Biete bible

LEVIDÂN 11

¹PUMAPA khan Mosia neh Arona ziangah Israel mihei mang rangin a thuaia dânhei hih a pêk a.

²Rinêng chunga sa tin sa rêng lâia nin fâk thei ranghei chu hihei hih an nit:

³a ketin riphal, an fâk zong la khâi inchip nôk ngai sa murdi chu fah thei nin ti.

⁴Saringsei hei, zupui hei, zusakhi hei hih nin fâk rang ni mak, hihei sa hih sa rithiang ino a nit; an fâk zong khah la khâi inchip nôk ngai khom sela an ketin kha arphal ino a nit.

⁷Voksa fah no rei, a ketin chu arphal a; nikhomsela, a fâk zong khah khâi inchip nôk khâi ino a nit sikin sa rithiang ino a nit.

⁸Hi mîring sahei rêng rêng hih nin fâk rang ni mak a, an ruak khom nin tôn rang ni mak, nin ta rangin â nim a nit.

⁹Inga chi tinrêng tuia omhei khah a lip neh a tuizâp ineihei murdi chu fah thei nin ti.

¹⁰Khannisela, tuia om a lip neh a tuizâp nei inohei chu nin fâk rang ni mak e.

¹¹Khahei khah sa rithiang ino a nit a, nin fâk rang ni mak a, itôn khom nin tôn rang ni mak e.

¹²Tuia om lip neh tuizâp nei ino rêng rêng chu nin ta rangin thil porinche a nit.

¹³Hi ivahei hih â nim an nit a, an porinche a, fah loi rang a nit: musimpui hei, simbu hei, muduk hei, mukhâi hei, vasatel hei, vaâk hei, vangalsâng hei, valambok hei, varingsei hei, tuikhanglian iva hei, rimu chi rêng rêng hei, inga fah ngai iva hei, simbu chi rêng rêng hei, tui vatôkhei, tui vaârôn hei, tui vaârngoi hei neh dîl iva chi rêng rêng hei, vathitôk hei neh ibâk hei hih nin fâk rang ni mak e.

²⁰Mîring, rithla nei, ke lika[8] lôn chi rêng rêng chu nin ta rangin porinche a nit.

²¹Vuan theina rang malpui inei chi chu fah thei nin ti.

²²Khahei lâia nin fâk thei ranghei chu: khâifapôl chi hei, khuangbâi chi hei, khâiṭial chi hei hi an nit.

²³Khannisela, rithla nei, ke lika rivâk chi murdi chu nin ta rangin thil porinche korong a nit.

²⁴Hi sahei ruak hih tukhom a va tôn murdi chu kholoi idênin a înim rang a nit: Mîring a îchi khom a ketin riphal khom seh a fâk zong khâi inchip[9] nôk khâi ino hei, a ketin riphal ino hei, ke lika neia keṭim inei hei khah â nim a nit. Tukhomin hi saruak hih a tônin chu a silbomhei khah arsûk infâi rang a nit a; nikhomsela, kholoi idênin a la irthiang ino ngir rang a nit.

²⁹Rinênga a boka rivâkhei hih nin ta rangin a înim a nit: ibûi hei, ichâi hei, itîr hei, totke hei, sartang hei, in-ôt hei, chalru hei, khinrât hei arthiang ino a nit.

³¹Tukhomin hihei va man neh an thi nunga va tôn murdi chu kholoi idênin rithiang ino ai nit rang a nit.

³²Khante, â thi tâk khah thing chunga manih, puan chunga manih, savun chunga manih, bora chunga manih, îthil chung khomah a ṭulin chu kha thilhei khah rithiang ino nîng a ta, tuia ichia rang a nit; nikhomsela, kholoi idênin a la nim ngir nîng a ta, kha rizoin chu rithiang tâng a ti.

³³Ipil bêl sungah a ṭulin chu a sunga om murdi khah â nim nîng a ta, a bêl khah ito khoi rang a nit.

³⁴Thil ifah rua îkhom kha bêla tui ibuaka om tâk rêng rêng chu a înim a nit a, kha bêla iin rua om rêng rêng khom a înim a nit.

³⁵Hi mîring ithi ruak ibai suang bêla manih, ibai urna lungthua manih a tlâkin chu â nim tâk a nit a, ikhoi chit rang a nit.

³⁶Mîring ithi ruak khah îthil khomin a tônin chu â tôntu kha rithiang ino a nit a; khannisela, tuikuanga manih, tuipanga manih a ṭulin chu a înim ino a nit.

³⁷Ichî rang chimu rêng rêng chungah a thi ruak khah a om khomin chimu khah â nim ino ai nit rang a nit.

³⁸Khannisela, chimu khah tuiah ichia nungin hi mîring ithi ruak hih a ṭulin chu chimu khah a înim a nit.

³⁹Mîring nin ifâk thei chi rêng rêng khom thi sela, a ruak itôn murdi chu kholoi idênin â nim ngir ai nit rang a nit.

⁴⁰A sa fa chu a puanhei arsûk rang a nit a; nikhomsela, kholoi idênin â nim ngir ai nit rang a nit. A sa pêltu khomin a puanhei arsûk rang a nit a; nikhomsela, kholoi idênin â nim ngir ai nit rang a nit.

⁴¹Mîring, rinênga bok rivâk chi murdi khah thil porinche an nit a, ifah rang ni mak e.

⁴²A phûnga ritol chi manih, ke lika nei chi manih, ke tam tak inei chi manih, rinênga bok rivâk chi rêng rêng khah nin fâk rang ni mak, thil porinche a nit.

⁴³Khahei khah nin fâkin chu porinche nîng nin ta, nin înim rang a nit.

⁴⁴Keimah hi PUMAPA nin Pathian ki nit a, Keimah ki irthiang angkan nangni khom nin rithiang rang a nit. Rinêng chunga om bok rivâka lôn chi rêng rêng sikin innimin om no rei.

⁴⁵Nin Pathian inih rangin Aigupta ram ata nangni ṭhui suaktu PUMAPA chu ki nit. Keimah ki irthiang angkan nangni khom nin rithiang ngêt rang a nit.

⁴⁶Hihei hih ramsa hei, iva hei, mîring tuia om hei, imuanga lêng chi tinrêng hei chungchâng thua dân chu a nit.

⁴⁷Rithiang neh rithiang ino, ifah thei neh fah thei ino mîringhei khah nin ithlei ngêt rang a nit.