Read Biete LEVIDÂN 13 Bible Online

LEVIDÂN 13 - Biete bible

LEVIDÂN 13

¹PUMAPA khan Mosia neh Arona ziangah hi dânhei hih a pêk a.

²Mi tukhom a taksa vun â pânin manih, â lôtin manih, â thlingin manih, iphâr natnaa hong rilet thei angkan â langin chu thiampu ziangah iṭhui rang a nit.

³Thiampu khan ipân khah iṭha takkan lei en a ta, â pânna muna mul khah a ṭuak a, â pân dân khah taksa vun nêka inthûka â langin chu pharna rî a nit a, thiampu khan mi rithiang ino a nit iti ân puang rang a nit.

⁴Ipân khah a hong vâr a, vun nêka inthûk uala â lang no a, a mul khah a hong ṭuak non chu thiampu khan rî rivoitu khah sûn sarika sung a ranin ân om rang a nit.

⁵Sûn sarika nungah thiampu khan ani khah en nôk a ta, â pân khah a ngaingirin a om a, a ṭêi indar ual non chu sûn sarikah dang a ranin in-om nôk a ti.

⁶Sûn sarika nungah khan â tharin en nôk a ta, â pânhei khah a lei châr a, a ṭêi indar khâi noa a nitin chu, thiampu khan kha mi khah arthiang a nit iti inpuang a ta; a natna khah ipân pai a nit. Kha mi khan a puanhei risûnfâi ata rithiang hong ni tâng a ti.

⁷Thiampu khan a en a, arthiang itia ân puang nungah khan â pân khah a ṭêi indarin chu thiampu ân en nôk rang a nit.

⁸Thiampu khan â tharin lei en nôk a ta, â pân khah a ṭêi indara a nitin chu rithiang ino a nit iti inpuang a ti; a natna khah iphâr natna a nit.

⁹Tukhomin phâr natna rî arvoiin chu thiampu ziangah iṭhui ngêt rang a nit.

¹⁰Thiampu khan iṭha takkan lei en a ta, ipân khah a ṭek a, a mul khah a hong ṭuak a, a nâi a hong omin chu,

¹¹pânsia, a dam intak chi a nit; thiampu khan rithiang ino a nit iti inpuang a ta, ien nôk ranga a rana in-om khom nang ual no ni a, rithiang ino a nit iti ai fel a nit.

¹²Khante, kha natna khah a ṭêi indar a, thiampu mu thei inrupa, a lua rithoka a ke môr idêna phâr natna khan a lei bôm tâkin chu,

¹³Thiampu khan iṭha takkan en a ta, phâr natna khan a taksa murdi khah a tuam suak riai tâkin chu rî rivoitu khah arthiang[10] a nit iti an puang rang a nit. A vun murdi khah a vâr zoi tâkin chu a irthiang tâk a nit.

¹⁴Khannisela, ipân rikông a hong omin chu a irthiang ino a nit.

¹⁵Thiampu khan lei en nôk a ta, arthiang ino a nit iti ân puang rang a nit; taksaa ipân rilông iom khah phâr natna a nit a, kha mi khah arthiang ino a nit.

¹⁶Nikhomsela, taksaa ipân khah a hong dam a, a hong ṭek nôkin chu thiampu ân en nôk rang a nit.

¹⁷Ani khan lei en pêk a ta, ipân rilông khah a lei ṭekin chu kha mi khah arthiang a nit iti inpuang rang a nit.

¹⁸Mi tukhomin sakhuai arvoi a, a hong dam tâk a,

¹⁹nungah chu sakhuai omna mun khah a hong ithlingin manih, â senin a hong ilôtin manih a nitin chu thiampu ân en rang a nit.

²⁰Thiampu khan ani khah lei en a ta, rithiang ino a nit iti ân puang rang a nit; sakhuaia rithokin phâr natna a hong irphut a nit.

²¹Khannisela, thiampu khan a lei en a, mul iṭuak a om noa, vun nêkan ân thûk no a, a vun a hong idanglam viatkah bang a nitin a riatin chu thiampu khan ani khah sûn sarika sung a ranin ân om rang a nit.

²²Khante, vunah khan a hong ṭêi indarin chu, thiampu khan arthiang ino a nit iti ân puang rang a nit; amakhah rî ṭha no a nit.

²³Khannisela, a om ngaingirin a om a, a ṭêi indar non chu, sakhuai pânser pai a nit; thiampu khan arthiang a nit iti ân puang rang a nit.

²⁴Mîn a taksa vun a kâng a, a kâng rilôngna mun khah â ṭekin manih, a senin manih a nitin chu,

²⁵Thiampu khan a lei en pêk rang a nit. Â pânna muna mul khah a ṭuak a, vun nêka inthûkin â langin chu a kângna munah khan phâr natna a hong irphut a nit.

²⁶Khannisela, thiampu khan a lei en a, â pânna muna mul khah a ṭuak no a, vun nêka inthûk ino a, â nûm viat bang a nitin chu thiampu khan ani khah sûn sarikah a ranin ân om rang a nit.

²⁷Khanchu, thiampu khan a sûn sarinî-ah khan ani khah â tharin en nôk a ta, vunah khan a ṭêi indarin chu, iphâr rî a nit a, thiampu khan ani kha rithiang ino a nit iti ân puang rang a nit.

²⁸Khannisela, â pân khah a ngaingirin a om a, vunah khan a ṭêi indar non chu iphâr rî ni mak a, mei ikâng pânser bang a nit a; thiampu khan kha mi khah arthiang iti ân puang rang a nit.

²⁹Nupang khom ipa khom, an lua manih, an rikhaa manih ipân a omin chu,

³⁰thiampu khan a lei en rang a nit, vun nêka inthûk uala â lang a, a muldi khah a eng chiakin chu phâr natna rî a nit a, thiampu khan rithiang ino a nit iti ân puang rang a nit.

³¹Thiampu khan a lei en a, â pân khah vun nêka inthûk ualin ilang no khom seh, a mulhei khah a duk ṭhat ual non chu thiampu khan ani khah sûn sarika sung a ranin ân om rang a nit.

³²Thiampu khan a sûn sarinî-ah khan â pân khah en nôk a ta, vun nêka inthûk uala â lang no a, muldi eng chiak a om no a, a ṭêi indar ual non chu,

³³kha mi khan a pânna mun kôlvêl khah voi inkol vang a ta; thiampu khan ani khah sûn sarika dang a ranin ân om nôk rang a nit.

³⁴Khante, thiampu khan a sûn sarinî-ah khan â pân khah en pêk nôk a ta; â pân khah a lei ṭêi indar no a, vun nêka inthûk uala â lang non chu thiampu khan ani khah arthiang a nit iti ân puang rang a nit. Kha mi khan a puanhei risûnfâi a ta, hong rithiang tâng a ti.

³⁵Khannisela, arthiang a nit iti inpuanga a om zoi nungin â pân khah a hong ṭêi indarin chu

³⁶thiampu khan ani khah lei en nôk a ta, â pân khah a ṭêi indara a nitin chu thiampu khan a mul a eng chiak neh a eng chiak no a en kher nang ual mak, arthiang ino a nit zel tâk.

³⁷Khannisela, â pân khah a ngaingira omin, a sam khom sam iduk iṭha a nitin thiampu khan a riatin chu â pân khah ai dam tâk tina a nit a, kha mi khah arthiang a nit iti ân puang rang a nit.

³⁸Nupang khom ipa khom, an vunah khan â ṭek a hong omin chu

³⁹thiampu khan kha mi khah a en rang a nit. A vuna ṭek khah arvâl viat manih a nitin chu a vun rikhok viat pai a nit a, kha mi khah arthiang a nit.

⁴⁰Mi tukhom a sam, â chal sam manih, a lusîp sam manih a ṭul riaiin chu lûkol manih chalkol manih bang a nit a; nikhomsela, ani khah arthiang ai nit mai rang a nit.

⁴¹

⁴²Khannisela, kha a lukolna munah khan â sen rivâl a hong omin chu iphâr rî a nit.

⁴³Thiampu khan ani khah lei en a ta, a lukolnaah khan sen rivâla pân a omin chu

⁴⁴a lu-ah iphâr natna om sika khan ani khah thiampu khan arthiang ino a nit iti ân puang rang a nit.

⁴⁵Mi iphâr rî rivoiin chu a silbom a ṭet fap rang a nit a; a sam a khui rang ni mak a, a mûr tuam a ta, “Rithiang ino, rithiang ino,” itin â khêk rang a nit.

⁴⁶Iphâr rî khan a bôm sung kârkah chu rithiang ino nîng a ta, riabuk putiang om a ta, mi danghei ata a ranin a om rang a nit.

⁴⁷Silbom khom, samul silbom manih, puantak silbom manih,

⁴⁸puan zâi rimi puan manih, samul puan manih, savun manih, savuna siam thil dang manih puṭuak i-ap a om a,

⁴⁹silbom puanheiah khan â em viatin manih, â sen viatin manih a hong ilang suakin chu rî rikâi thei a nit a, thiampu in en rang a nit.

⁵⁰Thiampu khan enfia a ta, sûn sarika sung a ranin a sia rang a nit.

⁵¹Sûn sarika nî-ah khan en nôk a ta, silbomah khan a ṭêi indarin chu amakhah phârna rî dettak a nit a, kha silbom, puanhei khah arthiang ino a nit.

⁵²Silbom puanhei iphâr rî omna khah thiampu khan a hâl rang a nit, rî ṭha no a nit sikin ihâl inrivâm ngêt rang a nit.

⁵³Khannisela, thiampu khan a lei en nôk a, a lei ṭêi indar non chu,

⁵⁴thiampu khan inrisûnfâi a ta, sûn sarika dang a ranin seh nôk a ti.

⁵⁵Khanungchu, thiampu khan enfia nôk a ta, â ap puṭuak khah â lang dân a danglam non chu ṭêi indar no khom sela, arthiang khâi ino a nit; â ap omna khah a sungtiang bang manih, a putiang bang manih ai om a nit khoma ihâl rang a nit.

⁵⁶Nikhomsela, thiampu khan a lei enfia nôk a, risûk infâi nungah khan a hong boi thiaia a nitin chu, a omna mun khah puana rithokin manih, savuna rithokin manih khom isân pai rang a nit.

⁵⁷Rî khah a hong ilang nôk a, a hong ṭêi indar nôkin chu â neitu khan a hâl rang a nit.

⁵⁸Silbom khah arsûk a, a hong boi theiin chu, â tharin risuh nôk a ta, kha angkan arthiang hong ni tâng a ti.

⁵⁹Hihei hih silbom neh puan hei, samul khom, puan zâirimi khom, ikhông manih, iphiar manih khom ni sela, savuna siama thil rêng rênga manih khom â ap puṭuak ikâi a om a, arthiang neh arthiang no thlei theina dân rang chu a nit.