Read Biete LEVIDÂN 15 Bible Online

LEVIDÂN 15 - Biete bible

LEVIDÂN 15

¹PUMAPA khan Mosia neh Arona khah hi dânhei hih a pêk a.

²Ipa tukhom, â sera rithoka thil isuak a omin chu â nim a nit.

³A suak mai manih, arngam nôk zel manih a nit khom a, rithiang nona ai nei rêng rêng tâk a nit.

⁴Khangkana mi zâlna zâlmun neh â ṭhungna murdi khah rithiang ino a nit.

⁵Tukhom, kha mi zâlmun itôn manih,

⁶â ṭhungnaa ṭhung manih murdi chu a puanhei risûnfâi a ta, tui risil a ta; kholoi idênin rithiang ino ai nit rang a nit.

⁷Tukhom kha mi takpum itôn kangân chu a puanhei risûnfâi a ta, tui risil a ta, kholoi idênin rithiang ino ai nit rang a nit.

⁸Kha mi khan, mi nim ino â chilin chu, a îchilah khah â nim nîng a ta, a puanhei risûnfâi a ta, tui risil a ta, kholoi idênin rithiang ino ai nit rang a nit.

⁹Kha mi chuangna sakor ruangdâp khom khah rithiang ino ai nit rang a nit.

¹⁰Tukhom kha mi lei iṭhungna rêng rêng itôntu khom khah kholoi idênin rithiang ino nîng a ti. Tukhom kha thilhei ichôia thontu khom khan a silbomhei risûnfâi a ta, tui risil a ta, kholoi idênin rithiang ino ai nit rang a nit.

¹¹Thil isuak ineitu khan a kut risuh loia mi dang a tônin chu, ai tônah khan a silbomhei risûnfâi a ta, tui risil a ta, kholoi idênin rithiang ino ai nit rang a nit.

¹²Ipil bêl a tônin chu kha bêl khah ito khoi chit rang a nit; thing khêng hei chu iṭha taka lap infâi rang a nit.

¹³A thil isuak ngai khah a dam a rithokin a hong rithiang nôkna rangin sûn sarikah ngâk a ta; khanungchu, a puanhei risûnfâi a ta, vadung tui iluang risil a ta, rithiang hong ni tâng a ti.

¹⁴A sûn iriatnî-ah khan vaṭhu bopka manih, pharvali bopka manih chôiin Ritongna Puan-In kotbâi bulah khan hong a ta, thiampu khah a pêk rang a nit.

¹⁵Thiampu khan khatkah sual ribôlna thillanin, khatkah kha hâlrivâm thillan rangin lei lan pêk a ti; kha angkah khan thiampu khan kha mi nimna khah rithârna lei siam pêk a ti.

¹⁶Ipa khah â pa nitna chi a suakin chu tui arsil rang a nit, kholoi idênin rithiang ino ai nit rang a nit.

¹⁷A chi zungna, puan manih, savun mania siam a îthil khom ni sela risûnfâi ngêt rang a nit; kholoi idênin rithiang ino ai nit rang a nit.

¹⁸Khante, nupang neh ipa munkan an zâla nupang ipa nitna an mangin chu, an ruaikah khan tui an risil seng seng rang a nit; kholoi idênin rithiang ino an init rang a nit.

¹⁹Nupang, a balama thlaboi thladet a riat zoron sûn sarika sung rithiang ino nîng a ti. Tukhom ama tôn kangân chu kholoi idênin rithiang ino ai nit rang a nit.

²⁰Kha a om hoino sunga a zâlnahei neh â ṭhungnahei khah rithiang ino korong nîng a ti.

²¹Tukhom a zâlna manih, â ṭhungna manih itôn kangân chu a silbomhei risûnfâi a ta, tui risil a ta, kholoi idênin rithiang ino ai nit rang a nit.

²⁴Ipa tukhomin nupang a om hoino lâiin a pôlin chu a porinchena khan kha mi khah a înnim a nit a, sûn sarika sung rithiang ino nîng a ta, a zâlmun khom rithiang ino ai nit rang a nit.

²⁵Nupang, a balama om hoino zoro ngai pial ni loia, thi a suakin manih, a om hoino ngai pial nêka sôt thi a neiin chu, a thi nei sungkah chu rithiang ino ai nit rang a nit.

²⁶Hi zoroa a zâlna zâlmun manih, â ṭhungna manih khah rithiang ino nîng a ti.

²⁷Tukhom kha thilhei itôn kangân chu rithiang ino nîng a ta, a silbomhei risûnfâi a ta, tui risil a ta, kholoi idênin rithiang ino ai nit rang a nit.

²⁸A thi kha arngam tenan sûn sarika sung ngâk a ta; khanungchu, rithiang hong ni tâng a ti.

²⁹A sûn iriatnî-ah khan vaṭhu bopka manih, pharvali bopka manih chôi a ta; Ritongna Puan-In kotbâi bulah thiampu ziangah a hong pêk rang a nit.

³⁰Thiampu khan khatkah kha sual ribôlna thillanin, a dang khatkah kha hâlrivâm thillanin a lan pêk rang a nit; kha angkah khan thiampu khan PUMAPA maah rithârna lei siam pêk a ti.

³¹Khante, PUMAPA khan Mosia ziangah, “Israel mipuihei khan an rithiangno lâiin ki Biak In, an riabuk inlâina taka om kha, an innim nona rangin riningna thu peh roh. An innim duaiin chu an ithi rang a nit,” a ti a.

³²Hihei hih, ipa, â sera thil isuak inei manih, â pa nitna chi suak manih,

³³nupang, thlaboi thladet nei zoro manih, a om hoino lâia pôltu manih chungchânga dân chu a nit.