Read Biete LEVIDÂN 16 Bible Online

LEVIDÂN 16 - Biete bible

LEVIDÂN 16

¹Arona nai pasal inikahei ruaiin PUMAPA ziangah mei rithiang ino an lana, an thi zoi nungah khan PUMAPA khan Mosia â sôn a,

²a ziangah, “Ni suapuipa Arona iril roh, Thuthlung Bôm sîng chunga lungkhamna ṭhungmun chungah sûm lâiah khan ki zuang înlâr ngai a nit sikin puanzâr sung Mun Rithiang takah khan a hong lût pai pai rang ni mak, amakhah a zôm non chu ai thi rang a nit.

³Arona kha Mun Rithiang takah khan sual ribôlna thillan, serâtchaltuai neh hâlrivâm thillan, berachal ilan rang bangin hong lût thei a ti,” a ti a.

⁴Khanungchu, PUMAPA khan hi dânhei hih a pêk a. Arona khan Mun Rithiang tak kha a lût man tui risil a ta, thiampu silbom puan zâirimi zakorfual khah ihâk a ta, tuman ribun a ta, pat zâirimia không kongkhit khah vong a ta, puan zâirimi lukôm kôm a ta, a lût rang a nit.

⁵Israel mipuihei khan Arona khah sual ribôlna rang kêlchal inikah neh hâlrivâm thillana rang berachal khatkah an pêk rang a nit.

⁶Arona khan serâtchal khah amah neh a insung mihei sual ribôlnan Sual ribôlna thillanin a lan rang a nit.

⁷Khanungchu, kêlchal inikah kha Ritongna Puan-In kotbâi bulah kâi a ta,

⁸amakhan kêlchal inikahei khah a îkhôk khâm PUMAPA dongtum ai nit rang, a îkhôk khâm Azazela[11] dongtum ai nit rang iti riatnan lungte inikah, khatkah “PUMAPA ta rang” iti riziak, khatkah “Azazela ta rang” iti riziak imangin thla sân a ti.

⁹PUMAPA dongtum ranga rithlanga om kêlchal khah sual ribôlna thillanin Arona khan lan a ti.

¹⁰Azazela ta ranga rithlang kêlchal kha chu â ringin PUMAPA ziangah lan a ta; khanungchu, mipuihei sual ribôlna rangin Azazela ziangah ramchârah isua a ti.

¹¹Arona khan amah neh a insungkuahei rang bîka sual ribôlna serâtchal a lan tikin

¹²meiluakin mâichâma mei ri-al khah luak a ta, ihâl ngai namhoi khah kut inika isôk a ta, Mun Rithiang takah khan a hong chôi rang a nit.

¹³PUMAPA maah meiah khan namhoi khah phul a ta, namhoi khû khan Thuthlung Bôm sîng lungkhamna ṭhungmun khah a ur rang a nit; khanchu, Arona khan mu thei no nia, ai thi no rang a nit.

¹⁴Serâtchal thisen ichînkah kha lâng a ta, a kutṭimin Thuthlung Bôm sîng lungkhamna ṭhungmun nisua tiang pang kha rithe a ta; khanungah khan Thuthlung Bôm matiang bul vêl khom voi sarikah arthe rang a nit.

¹⁵Kha rizoin chu kêlchal khah mipui sual ribôlna thillanin that a ta, a thisen khah Mun Rithiang takah khan chôi a ta, serâtchal thisen a tho lam angkah khan thông a ta; Thuthlung Bôm mah bul vêl neh a sîng lungkhamna ṭhungmun khah arthe rang a nit.

¹⁶Kha angkah khan Israel richihei rithiang nona sik hei, an thonsualna sik hei, an sualna sik hein Mun Rithiang tak kha a thâr inrithiang rang a nit. Ritongna Puan-In khah riabuk kôl zela om a nit a, riabuk rithiang nona sikin khangkana thâr rithiang khah ai nang a nit.

¹⁷Mun Rithiang tak ithâr ranga Arona a lûta rithoka a hong suak nôk mâkah chu tute Ritongna Puan-In sungah khan an om rang ni mak e. Amah neh a insungkuahei sual neh Israel mipuihei sual ribôlna a siam zoiin chu putiang hong suak a ta,

¹⁸hâlrivâm thillan mâichâmah khan fêng a ta, thâr inrithiang a ti. Serâtchal thisen neh kêlchal thisen ichînkah khah lâng a ta, mâichâm rikîhei khah nâl a ti.

¹⁹A kutṭimin thisen ichînkah kha mâichâmah voi sarikah rithe a ta; khangkah khan Israel richihei sualna sikin thâr inrithiang a ti.

²⁰Arona khan Mun Rithiang tak hei, Ritongna Puan-In sung murdi hei, mâichâm hei a thâr zoiin chu Azazela ta rang kêlchal khah PUMAPA ziangah lan a ti.

²¹Arona khan kêl lu-ah khan a kut kang ruaikan ringat a ta, Israel richihei pualoina neh sualna neh siatna murdihei khah inpuang a ta, khahei khah kêl lu-ah khan bâng a ta; khanungchu, mi lei inkung thlâm khan kha kêl khah ramchâr tiang ûm rizûl a ti.

²²Kêl khan an siatna murdi khah pêl a ta, ramchâr inthimah khan isua a ti.

²³Khanungchu, Arona khah Puan-In sungah khan lût a ta, Mun Rithiang tak a lût rang lâia thiampu silbom a îhâk khah khek a ta, amakhan mah riai a ti.

²⁴Mun Rithiangah khan risil a ta, ama silbomhei â hâk nôk rang a nit. Kha rizoiin chu suak a ta, hâlrivâm thillan, ama ta rangin neh mipui ta rangin a lan rang a nit.

²⁵Sual ribôlna sathâi kha mâichâmah khan a hâl rang a nit.

²⁶Ramchâra Azazela ta ranga kêl va suatu khah a hong kîr nôk a, riabuk a lût maah khan a puanhei risûnfâi a ta, tui arsil rang a nit.

²⁷Serâtchal neh kêlchal, sual ribôlna ranga that, Mun Rithiang taka sual ritlanna ranga an thisen ichôi lûta om tâk sa khah, a vun hei, a sa tak hei, a sungkua hei a rêngkan riabuk putiang ichôiin ihâl rang a nit.

²⁸A va hâltu khah a hong kîr nôkin, riabuk a lût maah khan a puanhei risûnfâi a ta, tui arsil rang a nit.

²⁹Hi dân hih kumkhuaka zôm mai rang a nit. Thla sarina, kha thla a sûn sômnî-ah khan Israel mi murdi neh an lâia ram dang mi om sa murdihei khan bu ngei an ta, sin rêng rêng an tho rang ni mak e.

³⁰Kha nî-ah khan a nit, an hong rithiang theina rangin an sual murdi ribôlna thillan ilanin, rithârna an nei rang a nit.

³¹Kha nî khah nikhua ser, ser inri-îp khap rang, bu ngeia sin khom tho loia om nî sûna khâm rang a nit. Hi dân hih kumkhuaka hong izôm rang a nit.

³²Thiampu Laltak ranga riak inrithu neh a pa thûl ranga dân angkah taka namindeta serinrana om khan hi ritlanna hih a siam rang a nit. Thiampu thlukthla rithianghei â hâk rang a nit.

³³Mun Rithiang tak hei, Ritongna Puan-In sung hei, mâichâm hei, thiampuhei neh mipuihei thârna sin khah a tho rang a nit.

³⁴Hi dânhei hih kumkhuaka zôm rang a nit. Israel mihei khah kumkatah voikah, an sual thârna a siam pêk ngai rang a nit. Khanchu, Mosia khan PUMAPA thupêk lam angkah takin a tho tâk a.