Read Biete LEVIDÂN 17 Bible Online

LEVIDÂN 17 - Biete bible

LEVIDÂN 17

¹PUMAPA khan Mosia kha

²hi dânhei hih, Arona neh a naipahei neh Israel richihei murdi ipeh rangin thu a pêk a.

³Israel mi rêng rêngin PUMAPA ziangah thillan rang, sial manih, bera manih, kêl manih Ritongna Puan-In kotbâi bulah ni loia mun dangah a thatin chu dân a îsiat a nit. Ani khah thisen isuaa ibe nîng a ta, a chipuihei lâia rithokin khâi rikiangin a om rang a nit.

⁵Hi thupêk omzia chu Israel richihein an ribôlna sa mun iôl paia that an isong ngai khah PUMAPA ziangah an hong chôi mai ngaina rang tâka a nit. Atûna rithokin chu PUMAPA ziang ngêiah Ritongna Puan-In kotbâi bulah khan thiampu ziangah an hong chôi rang a nit; PUMAPA maah Ringeina thillanin an hong lan ngai rang tina a nit.

⁶Thiampu khan Puan-In kotbâi bula mâichâm khah arkhîlkan thisen khah rithe a ta; a thâihei khah a hâl rang a nit, kha thillan inam khan PUMAPA chu a înlôm ngai a nit.

⁷Israel richihei khan kêl i-ang khori[12] ziangah an ribôl sahei khah mun iola thatin PUMAPA chunga iamom loiin an om rang ni khâi mak e. Hi dân hih Israel richihein kumkhuaka an hong zôm rang a nit.

⁸Israel mi rêng rêngin manih, nam dang anni lâia om rêng rêngin manih, a tukhomin PUMAPA ziangah hâlrivâm thillan khom, thillan chi dang rêng rêng khom,

⁹Ritongna Puan-In kotbâi bulah bang an lan rang a nit; mun danga lantu chu Pathian mihein ṭhângsenah an vôr rang a nit.

¹⁰Israelhei lâia mi manih, ram dang mi anni lâia om sa manih, a tukhomin sa thisen a fâkin chu PUMAPA a chungah ṭuang a ti. Kha mi khah Pathian mihei lâi ata ûmisua rang a nit.

¹¹Mîring rêng rêng, an ringna khah an thisenah ai om a nit a, khasikah khan kêng nin sualhei infâina rangin thisen murdi kha chu mâichâma bunsuak riai rangin PUMAPA khan thu nangni ai pêk a nit. Thisen khah ringna chu a nit a, amakhan sual khah ai lâk inrimang a nit.

¹²Khasikin a nit, PUMAPA khan Israel richihei neh an lâia nam dang iomsahei khan sa thisen rêng rêng an fâk rang ni mak ai ti pêk a nit.

¹³Israel mi rêng rêngin manih, nam dang anni lâia om manih, sa rithiang khom, iva rithiang khom a ram rivâknaah a manin chu a thisen khah rinêngah inzung vang a ta, ipil a vur inrikhum rang a nit.

¹⁴Mîring tinrêng ringna khah a thisenah ai om a nit a; khasika khan kêng thisen rêng rêng fah loi rangin PUMAPA khan Israel mihei khah ai khap a nit. Tukhomin a fâk tênin chu, Israel lâi ata khâi rikiang rang a nit.

¹⁵Tukhomin, a tôta thi manih, sa isêa thi manih sa khah a fâkin chu Israel mi khom ni sela, ram dang mi khom ni sela, a puanhei risûnfâi a ta, tui risil a ta, kholoi idênin rithiang ino nîng a ta, kha rizoiin chu rithiang hong ni tâng a ti.

¹⁶A puan risûnfâi nuam ino manih, tui risil nuam ino manih chu an ituang rang a nit.