Read Biete LEVIDÂN 18 Bible Online

LEVIDÂN 18 - Biete bible

LEVIDÂN 18

¹PUMAPA khan Mosia kha

²Israel richihei rang thu a pêk a. “Keimah hi, PUMAPA nin Pathian chu ki nit.

³Nin lei omna tâk Aigupta ram mihei itho ngai angkah khan tho no unla, nangni ki ṭhui inlûtna rang Kanan ram mihei om dân khom zôm no rei.

⁴Ki dânhei izômin, ki thupêk angkah takin nin om rang a nit. Keimah hi PUMAPA nin Pathian chu ki nit.

⁵Ki dânhei zôm unla, ki balam nangni pêkhei khah zui rei; khahei khah sin unla ring nin ti. Keimah hi PUMAPA chu ki nit” a ti a.

⁶PUMAPA khan hi dânhei hih a pêk a. Tukhomin mahni suapui rinâi a siatpui rang ni mak e. Keimah hi PUMAPA chu ki nit.

⁷Ni pa mualphoi isak rangin ni nu ni siatpui rang ni mak. Ni nu a nit a, ani khom mualphoi sak no roh.

⁸Ni pa nupui dang khom isehpuin ni pa mualphoi ni sak rang ni mak.

⁹Nen zirpui ni farnu manih, nen zirpui nino ni far ngir ni pa nainu manih, ni nu nainu manih insung khatka ta ni seilianpui manih, insung khatka ni seilianpui nino manih khom ni siatpui rang ni mak.

¹⁰Ni nai ipa nainu khom, ni nai nupang nainu khom ni tunu rêng rêng ni siatpui rang ni mak; mahnia mualinphoi risak ni nit.

¹¹Ni pa nupui nainu ni pân ai op zel khah ni siatpui rang ni mak; ani khom ni farnu a nit.

¹²Ni ni manih, ni puingâk manih khom ni siatpui rang ni mak.

¹⁴Ni pangâk nupui khah ni siatpui rang ni mak; ani khah ni puingâk kêng ai nit.

¹⁵Ne moinu khom ni siatpui rang ni mak e.

¹⁶Nen zirpuipa nupui khom sehpui no roh.

¹⁷Nupang ni lei isiatpui tâk nainu manih, tunu manih ni siatpui rang ni mak; ni thisen ikop a nit duai thei; khasikin, siat porinche tak a nit.

¹⁸Ni nupui a la damsung kârkah chu ân zirpuinu khah nupuiin ni nei rang ni mak.

¹⁹Nupang thi a nei lâiin nupang ipa nitna mangpui no roh, â nim lâi kêng ai nit.

²⁰Mi nupui sehpui no roh; mahni nimna a nit.

²¹Moleka[13] chubai ûnna mang rangin ne rila râ rêng rêng khah ni pêk rang ni mak e; a nit non chu PUMAPA, Pathian riming ni înbor rang a nit.

²²Ipa khan ipa dang neh an siat rang ni mak; porinche tak a nit.

²³Nupang khomin, ipa khomin, mîring an siatpui rang ni mak; siatna porinche tak a nit a, rithiang nona a nit.

²⁴Hi thilhei hih ithon porinchen om no rei; hi thil murdiheiah hin kêng nin matona kî ûmisua tâk namhei khah an lei iporinche tâk ngai a nit.

²⁵An thil tho sikah khan ram khah porinchen an siam a; kha mi omhei siatna sikin ram khah kuttum ki tho a, ram khan a sunga omhei khah a îluak suak vang tâk a nit.

²⁶Anni khan hi thil porinchehei hih ithon, ram khah an innim a; khannisela, nangmanin chu kha thilhei khah nin tho rang ni mak e. Nin rêngkan Israel mi khomin, ram dang mi nin lâia om khomin, ki dânhei neh ki thupêkhei hih nin zôm ngêt rang a nit.

²⁸Khanchu, nin matona lei iom namhei an porinche sika ram khan a îluak suak angkan nangni chu ram hin nangni luak suak no nih.

²⁹Tukhom hi thil porinchehei ithotu kangân chu ṭhângsena vôr rang a nit.

³⁰PUMAPA khan, “Nin matona hi rama lei iomhei itho ngai balam zui loiin, ki thupêkhei zôm unla; kha thil porinchehei khah ithon porinchen om no rei. Keimah hi PUMAPA nin Pathian chu ki nit,” a ti a.