Read Biete LEVIDÂN 19 Bible Online

LEVIDÂN 19 - Biete bible

LEVIDÂN 19

¹PUMAPA khan Mosia ziangah,

²“Israel mipuihei murdi khah iril roh: Nin rithiang rang a nit, Keimah, PUMAPA nin Pathian hih ki irthiang a nit.

³Mi tinin mahni nu neh pa nin marit rang a nit, ki thupêk angkan sabatnî nin ser rang a nit. Keimah hi PUMAPA nin Pathian chu ki nit.

⁴“Mirmil tiang ithlêkin nung ne song no unla, mirmil pathian nin ta rangin siam no unla, annihei khah chubai ûn no rei. Keimah hi PUMAPA nin Pathian chu ki nit.

⁵“Ringeina thillan PUMAPA ziangah nin lanin tho dân rang nangni kî pêk angkah khan tho unla, nin ribôlna khah ki lei îham rang a nit.

⁶Nin thillan sa khah nin that nî zelah khan manih, atûka manih nin fâk zoi rang a nit. A sûn thumnî tena la om kha chu ihâl rang a nit.

⁷A sûn thumnî tena ifa a la nit duaiin chu thil porinche a nit a, thillan khah iham no ning e.

⁸Tukhom a fahtu kangân chu PUMAPA thil rithiang ân nim sikin a siatna mo chu pêl a ta, ani khah a chipuihei lâia rithokin ipai rang a nit.

⁹“Nin loia buhei nin âtin loi vâikôm ibêrêtin nin ât rang ni mak a, fânung kha nin ritik nôk rang ni khâi mak e.

¹⁰Nin grep rikula grep irâ rimal inṭhelhei manih, â râ ṭulhei manih khah nin ritik nôk rang ni mak e, mi inrianghei neh ram dang mihei nin lâ pêk rang a nit. Keimah hi PUMAPA nin Pathian chu ki nit.

¹¹“Inruh no roh, mi lêm no roh, milak ril no roh.

¹²Ker ming ichingin milakin vâni risâm no roh, ni Pathian riming iseh no roh. Keimah hi PUMAPA nin Pathian chu ki nit.

¹³“Ni bungahei epde non la, an thil nei richupui no roh. Rilofahei lo khah zânkah khom ne rên pêk rang ni mak.

¹⁴Kuar isêt khah vâni sâm no roh; mitdel matonah arpâl rang îte ni sia rang ni mak. Ni Pathian hih ṭi roh. Keimah hi PUMAPA ni Pathian chu ki nit.

¹⁵Roirêlnaah khan idik neh ifel takkan rêl roh. Mi inriang khah ni ditsak rang ni mak a, mi richong khah ni ṭi rang ni mak e. Ifel takkan ni bungahei roi khah ni rêl pêk rang a nit.

¹⁶Mi chungchâng, milak thu sîr indartu ni no roh. Thi thei dingmuna ding iṭangpui rangin ni thu riat lam lam ne sîr rang a nit. Keimah hi PUMAPA chu ki nit hi.

¹⁷Ni lungrilin tute mumâk no roh, ri-ong takka thu sîr suakin nin kârvâna thu om khah nen fel rang a nit; khanchu, ama sikin thil isual nî tho no rang a nit.

¹⁸Tute chungah phuba ni lâk rang ni mak, ni mumâk mai rang khom ni mak; nangmah lung ni irthlung angkan ni bungahei lungthlung roh. Keimah hi PUMAPA chu ki nit.

¹⁹“Ki thupêkhei hih zôm rei. Nin mîring vâi khah chi dang neh chi dang inripôlin tê innei no rei; nin loiah chimu inikah nin song rang ni mak. Thil chi nika không puan nin sil rang ni mak e.

²⁰“Suak nungâk khah mîn thâikêm rangin hual sela, a man la pe no manih, lar tlan isua no manih a nitin chu mi dangin lei châipui khom seh, suak a nit a, ithat rang ni mak a; khanniseh, an ruaikan kuttum chu itho rang an nit.

²¹Ipa khan siat ribôlna thillan, Ritongna Puan-In kotbâi bulah PUMAPA ziangah berachal a hong lan rang a nit.

²²Kha mi siat ribôlna rang rithârna thillan khah thiampu khan lei lan pêk a ta; khanchu, Pathianin ngaidam a ti.

²³“Kanan ram khah nin va lua tikin, theikung chi tinrêng phun nin ta, â râ khah kum ithumka sung chu nin ta ranga rithiang inoa bê rang a nit a, kha sungah khan chu nin fâk tlak rang ni mak e.

²⁴A kum ilina kumin chu â râ murdi khah keimah PUMAPA nin Pathian zianga nin lômthu rilnan nin lan rang a nit.

²⁵A kum ringana kumah khan chu â râ khah fah thei tâng nin ti; khangkah khan nin thon chu nin theikung khah â râ hong kûr ngut a ti. Keimah hi PUMAPA nin Pathian chu ki nit.

²⁶“Sa rêng rêng a thisen neh khan nin fâk rang ni mak. Dôi chi rêng rêng imang hei, thlasân hei nin song rang ni mak.

²⁷Nin bengberêp sam nin voiinkol rang ni mak a, nin rikhamul khom nin voi rang ni mak.

²⁸Mi thi sûnna sikin nin taksa nin ât rang ni mak a. Nin taksa rêng rêng khom nin inṭial rang ni mak e. Keimah hi PUMAPA nin Pathian chu ki nit.

²⁹“Ni nainu khah Tempil nochizuar ranga pen mualphoi sak no roh. Nam dang pathian tiang ingatin, ram kha siat porinchenan sip duai a ti.

³⁰Ki sabatnî ser roh, chubai nin ne ûnna mun khah marit tho roh. Keimah hi PUMAPA nin Pathian chu ki nit.

³¹“Khori dôi ithiamhei manih, mithi sôn thiamhei manih pan no roh; khangkan ni thon chu rithiang ino ni nit rang a nit. Keimah hi PUMAPA nin Pathian chu ki nit.

³²“Lua kêlmul iṭoihei khah marit unla, nin ngîk rang a nit. Nin Pathian ṭi rei. Keimah hi PUMAPA nin Pathian chu ki nit.

³³“Ram dang mi nin rama lênghei khah nin nuaisia rang ni mak e.

³⁴Nangmani chipui angkah takin en unla, nangmah lung ni irthlung angkah takin anni khah lungthlung rei. Nangni khom Aigupta ramah khan khualmi nin lei init tâk ngai khah remai rei. Keimah hi PUMAPA nin Pathian chu ki nit.

³⁵“Rikhîna dikino hei, hîllung dikino hei, ritâna dikino hei, imangin mi lêm no rei.

³⁶Rikhîna dik thap, hîllung idik thap, ritâna dik thap nin mang rang a nit. Keimah hi PUMAPA nin Pathian, Aigupta rama rithoka nangni ṭhui suaktu chu ki nit.

³⁷Ki dânhei neh thupêkhei murdi nin zôm rang a nit. Keimah hi PUMAPA nin Pathian chu ki nit,” a ti a.