Read Biete LEVIDÂN 2 Bible Online

LEVIDÂN 2 - Biete bible

LEVIDÂN 2

¹Tukhomin PUMAPA ziangah bubâl[4] thillan a lanin chu, baidi ṭha chi[5] hong chôi sela, oliv riak neh bero ikhop sa rang a nit.

²Khanchu, Arona nai thiampuhei ziangah chôi a ta; thiampu khan baidi khah kutkah isôk a ta, oliv riak ichîntekah neh bero murdi neh khan mâichâmah a hâl rang a nit, amakhah a rêngkan PUMAPA ziangah ilan a nit iti entîrna rang a nit. Hâlrivâm thillan a nit a, hi thillan inam hin PUMAPA chu a înlôm ngai a nit.

³Thillana hâl bân baidi kha chu thiampuhei dongtum rang a nit. PUMAPA zianga lan tâk a nit a, thil rithiang tak a nit.

⁴Khante, bubâl thillanin meikuanga ri-em inmin tâk a hong chôiin chu chol pol ino bairiam a nit rang a nit, oliv riak neh imet bai thliam isa manih, oliv riak inâl bai thliam riphân manih a nit rang a nit.

⁵Thîrbêl indara zêi, bubâl thillan khah baidi ṭha chi, chol pol ino, oliv riak neh imet a nit rang a nit.

⁶Bai thliam khah lan rangin ikhoia siriak inâl rang a nit.

⁷Thîrbêl taka zêi, bubâl thillan a nitin chu baidi ṭha chi, oliv riaka zêi a nit rang a nit.

⁸Kha angkana thil khah PUMAPA ziangah ni hong lan rangin chu thiampu ziangah pen la, ani khan mâichâmah chôi a ti.

⁹Thiampu khan thillan ata ichînkah kha la suak a ta, mâichâmah khan hâl a ta, amakhah a rêngkan PUMAPA ziangah ilan a nit iti entîrna a nit. Hâlrivâm thillan a nit a, hi thillan inam hin PUMAPA chu a înlôm ngai a nit.

¹⁰Lan bân, hâl ino kha chu thiampuhei dongtum rang a nit, amakhah PUMAPA zianga lan tâk a nit a, thil rithiang tak a nit.

¹¹Bubâl thillan, PUMAPA zianga lan rêng rêng chu chol ipola siam a nit rang ni mak a; chol neh khuaitui ipol rêng rêng PUMAPA ziangah hâlrivâm thillan rangin ilan rang ni mak e.

¹²Ni bubâl vâng masatak kha chu PUMAPA ziangah kum tin ni hong lan ngai rang a nit a; nikhomsela, mâichâmah khan ihâl rang ni mak e.

¹³Bubâl thillan rêng rêngah chu ichi in-al rang a nit, ichi hi Pathian neh nin thuthlung entîrna a nit a. Nin thillan murdiah khan ichi in-al riai ngêt rang a nit.

¹⁴Nin bubâl vâng masa nin hong lan zoron baithliam nin lan sa mai ngai rang a nit.

¹⁵Oliv riak neh bero nin ikhop sa rang a nit.

¹⁶Khante, thiampu khan baithliam neh siriak ichînkah, a rêngka rithûl rangin lâng a ta, bero murdi neh khan bubâl thillanin PUMAPA zianga ilan a nit iti entîrnan a hâl rang a nit.