Read Biete LEVIDÂN 20 Bible Online

LEVIDÂN 20 - Biete bible

LEVIDÂN 20

¹PUMAPA khan Mosia ziangah,

²Israel richihei iril rang thu a pêk a. “Israel richihei lâia mi manih, Israel rama om, ram dang mi manih, a tukhomin â rila râ Moleka chubai ûnna mang ranga petu kangân chu mipui murdîn kha mi khah lunga dêng that rang a nit.

³Mahni nai Moleka zianga lana ki mun rithiang innima, ker ming rithiang mualphoi isaktu chu nungsong ki ta, ki mi Israelhei lâia rithokin khâi inrimang ki ti.

⁴Nikhomsela, Israel mihei khan kha thil khah an ngainêpa, kha mi khah an that non chu,

⁵keimah ngêiin kha mi chungah neh a insungkuahei chungah neh a thu rilâkpui murdi chungah ṭuang ki ta, Moleka chubai iûna ki chunga iamom inohei murdi khah ki mihei lâia rithokin khâi inrimang ki ti.

⁶“Khori dôi ithiamhei neh mithi sôn thiamhei ipan a, an zianga thurôn ilatuhei khah nungsong ki ta, ki mihei lâiah tep khâi no ning e.

⁷Keimah hi PUMAPA nin Pathian ki nit sikin rithiang takkan om rei.

⁸Ki dânhei hih zôm rei; Keimah hi PUMAPA nangni inrithiangtu chu ki nit.

⁹“Tukhom a pa manih, a nu manih vânisâm kangân chu ithat ngêt rang a nit; a thisen mo chu aman pêl a ti.

¹⁰“Mi tin a bungtualbôm nupui a siatpuiin chu an ruaikan ithat seng seng rang an nit.

¹¹Mîn a pa nupui lâia khatka khôk a zâlpuiin chu a pa mualphoi ai sak a nit, an ruaikan ithat seng seng rang an nit. An thisen mo chu anmanin pêl an ti.

¹²Mîn â moinu a zâlpuiin chu an ruaikan ithat seng seng rang an nit. Siatna porinche tak an itho a nit a, an thisen mo chu anmanin pêl an ti.

¹³Mîn nupang izâlpui angkan ipa a zâlpuiin chu thil porinche tak an itho a nit a, an ruaikan ithat seng seng rang an nit. An thisen mo chu anmanin pêl an ti.

¹⁴Mîn nu rifâkah nupuiin a nei seng sengin chu siatna porinche tak ai tho a nit sikin an inthumkah khan ihâl that rang an nit. Kha angkana thil khah nin lâiah a om rang ni tlak mak e.

¹⁵Ipan ran a châipuiin chu a ran neh khan ithat ngêt rang an nit.

¹⁶Nupang khomin ran ichâipui itumin a zâlpuiin chu, amah neh a ran khah ithat seng seng rang an nit. An thisen mo chu anmanin pêl an ti.

¹⁷“Min a farnu manih, a pa nainu manih, a nu nainu manih nupuiin a neiin chu vântlâng lâiah mualphoi takka seh rang an nit; khua ata khom ûmisua rang an nit. A farnu ai châipui a nit a, a mo chu a pêl rang a nit.

¹⁸Mîn nupang thi a nei lâiin a châipuiin chu an ruaikan ûmisua seng seng rang an nit. Rithiang ino chungchânga dân khah an îsiat a nit.

¹⁹“Min a nu zuarpuinu manih, a ni manih a siatpuiin chu an ruaikan an siat mo chu an pêl rang a nit.

²⁰Mîn a pangâk nupui a siatpuiin chu a pangâk mualphoi ai sak a nit a, a nupang neh khan an siat mo chu pêl an ta, nai iboiin thi seng seng an ti.

²¹Mîn ân zirpuipa nupui archupuia a nei pêkin chu thil porinche a nit a, ân zirpuipa mualphoi ai sak a nit; nai iboiin om an ti.

²²“Ki dânhei neh ki thupêkhei murdi zôm rei; khanchu, nin omna rang ram, nangni ki ṭhui ithlun tikah khan kha ram khan nangni luak suak no nih.

²³Kha rama lei iom, nin matona ki ûm isua rang namhei om dân khah zui no rei, hihei hih itho an song a, thil porinche tak, ki îtir a nit.

²⁴Hi ram, khuaitui neh dût luangna ram hih, nin lua rangin nangni pe ki lei inkung tâk a, nangni kî pêk ngêt rang a nit. Keimah hi PUMAPA nin Pathian chu ki nit, nam dangheia rithokah khan nangni ki înran a nit.

²⁵Khasikin, sa rithiang neh rithiang ino, iva rithiang neh rithiang ino nin ithlei rang a nit. Sa rithiang ino manih, iva rithiang ino manih nin fâk rang ni mak. Rithiang inoa kî bê nin fâkin chu rithiang inon nin iom rang a nit.

²⁶Ki ta bîkhei nin nit a, keimah PUMAPA hih rithiang ki nit a, nangni khom nin rithiang rang a nit. Ki ta bîk inih rangin nam danghei lâia rithokin nangni ki înran a nit.

²⁷“Ipa khom, nupang khom, khori dôi ithiam manih, mithi sôn ithiam manih chu lunga dêng that ngêt rang a nit. A thisen mo chu aman pêl a ti,” a ti a.