Read Biete LEVIDÂN 21 Bible Online

LEVIDÂN 21 - Biete bible

LEVIDÂN 21

¹PUMAPA khan Mosia ziangah, Arona nai, thiampuhei iril rang thu a pêk a, “Thiampu tukhom a suapui ruak va tônin rithiang inon a om rang ni mak.

²Ama nu manih, pa manih, naipa manih, nainu manih, ân zirpuipa manih,

³a farnu pasal nei ino in khatka ai ompui manih a nitin chu ruak khah tôn thei a ti.

⁴A nupui insungkuahei ruak khom itônin rithiang inon a om rang ni mak.

⁵“Thiampu tukhom mithi a sûn iti inlangna rangin a sam a ep inkol rang ni mak a, arkhamul a voi rang ni mak a, a taksa khom a ât iphop rang ni mak e.

⁶Rithiang takkan a om rang a nit a, ker ming â siat rang ni mak. Hâlrivâm thillan ihâltu an nit a, ki zianga farua thillan ilan ngaitu an nit sikin an rivong rithiang ngêt rang a nit.

⁷Thiampu khan nupang nochizuar lei ichang tâk manih, numei manih, nungâk rithiang ni khâi ino manih nupuiin a nei rang ni mak; thiampu chu Pathian ta ranga mi rithiang ai nit a nit.

⁸Ki zianga farua thillanhei hong ilan ngaitu a nit sikin mi murdi khan thiampu khah mi rithiangin nin be rang a nit. Keimah hi PUMAPA chu ki nit a, ki irthiang angkan ki mihei khom ki înrithiang a nit.

⁹Thiampu nainu a tukhom nochizuar a changin chu a pa mualphoi ai sak a nit a, ani khah ihâl that rang a nit.

¹⁰“Thiampu laltak khah riak inrithu a nit a, thiampu silbom ihâk ranga serinran a nit; khasikin, lusûn inlangna rangin a sam khui loiin manih, a puanhei isânin manih a om rang ni mak e.

¹¹Ki ta ranga serinran a nit tâk a, rithiang inon a om rang ni mak a, ki mun rithiang iman mithi ruak omna ina lûtin ki mun rithiang ân nim rang ni mak; ân zirna a pa manih, a nu manih khom ni sela a fe rang ni mak.

¹³Nungâk rithiang bang nupuiin a nei rang a nit.

¹⁴Numei manih, mi imâk nung manih, min an lei ichâipui tâk manih, nochizuar manih nupuiin a nei rang ni mak. Ama chipui nungâk rithiang a nei rang a nit.

¹⁵Khanonchu, a naihei khah rithiang ino an init rang a nit, anni khom an rithiang rang a nit. PUMAPA chu ki nit a, keimah ngêiin ki Thiampu Laltak khah kî serinran a nit,” a ti a.

¹⁶PUMAPA khan Mosia khah,

¹⁷Arona zianga ril rang thu a pêk a, “Ner chihei lâia piangsualna nei rêng rêngin farua thillan ki ziangah a hong lan rang ni mak. Amahih kumkho dân rang a nit.

¹⁸Mi tukhomin piangsualna nei khan thillan a hong lan rang ni mak; mitdel hei, kebâi hei, nârinong hei, rurâng rikip ino hei,

¹⁹ke kiak hei, kut ikiak hei,

²⁰tingipo hei, mi dungbong hei, mit kiangka del hei, vun natna nei hei, thâinuzel hei khan thillan an lan rang ni mak.

²¹Thiampu Arona richi, takpuma piangsualna nei khan hâlrivâm thillan ihâl rangin manih, farua thillan ihâl rangin manih ki ziangah a hong rang ni mak.

²²Khangkana mi khan Pathian ranga thillan rithiang neh thiampu dongtum thil rithiang khah ifah chu fah thei a ta;

²³khannisela, piangsualna nei a nit sikin Mun Rithiang tak puanzâr kôlah khan a hong rang ni mak; mâichâm khom a hong nâi rang ni mak e. Kha thil rithianghei khah ân nim rang ni mak, Keimah hi PUMAPA chu ki nit a, kha thilhei khah keimah ngêiin ki înrithiang a nit,” a ti a.

²⁴Hi thu hih Mosia khan Arona neh a naihei khah â ril a, Israel richihei murdi khom â ril a.