Read Biete LEVIDÂN 22 Bible Online

LEVIDÂN 22 - Biete bible

LEVIDÂN 22

¹PUMAPA khan Mosia kha,

²Arona neh a naipahei zianga ril rang thu a pêk a; “Ker ming rithiang nin isiat rang ni mak; khasikin, Israel richihein ki zianga thillan rithiang an hong ilan khah marit takkan nin tôn rang a nit. Keimah hi PUMAPA chu ki nit.

³Israel richihein ki zianga thil rithiang an hong ilan khah nin richi suanpârhei tukhomin an rithiang no lâiin an tônin chu ki mâichâmah khan sin tho nôk tlak khâi no nih. Keimah hi PUMAPA chu ki nit.

⁴“Arona richihei tukhom phâr natna rî rivoi manih, â sera rithoka thil isuak inei manih khan arthiang mâkah chu thillan rithianghei khah a fâk rang ni mak e. Thiampun mithi ruak a tônin manih, â pa nitna chi a suakin manih a înim tâk a nit.

⁵Sa rithiang ino manih, mi rithiang ino manih a tônin chu rithiang ino ai nit rang a nit.

⁶Thiampu tukhom khangkana thil itôn kha chu kholoi idênin rithiang ino a nit a, tui risil bak loi vângin chu thil rithianghei khah a fâk rang ni mak e.

⁷Inî a tlâk nungin chu rithiang tâng a ta; khanungchu, thillan rithianghei khah fah thei tâng a ta; khahei khah ama dongtum pial a nit.

⁸A tôta thi sa manih, sa isêa thi sa manih a fâk rang ni mak; khanonchu, a înim rang a nit. Keimah hi PUMAPA chu ki nit.

⁹“Thiampu rêng rêngin ki thupêk an zôm rang a nit, an zôm nuam non chu thiamno changin om an ta, an ithi rang a nit. Keimah hi PUMAPA chu ki nit a, anni khah keimah ngêiin kî serinran an nit.

¹⁰“Thillan rithianghei khah thiampu insungmihei bangin an fâk rang a nit. Thiampu zianga om sa mi danghei manih, a zianga rilofaa omhei manih khan chu thillan rithianghei khah an fâk sa rang ni tlak mak e.

¹¹Khannisela, thiampu suak, ama suma a irchôk manih, a insunga inzirhei manih khan chu fah thei an ti.

¹²Thiampu nainu khom ni sela, thiampu nino pasalin a neiin chu thillan rithianghei khah fah thei no nih.

¹³Khannisela, thiampu nainu khah pasal isûnin manih, a pasal imâkin manih a om a, nai nei loiin a pa in tiang a kîr nôkin chu, a pan a thiampu nitnaa ifarua ai donghei khah fah thei a ti; khahei khah thiampu insungmihei bangin an ifâk thei rang a nit.

¹⁴“Thiampu insung mi nino mi tukhomin reh loiin thillan rithiang khah a fâkin chu, mun ringaka ṭhena munkah ibôkin, thil rithiang khah thiampu a pêk rang a nit.

¹⁵Thiampuhei khan PUMAPA zianga thillan rithianghei khah an innim rang ni mak.

¹⁶Â fah ngai rua ninohei an infâk rang ni mak; an infâkin chu thiamno chang an ta, an ituang rang a nit. Keimah hi PUMAPA chu ki nit a, keimah ngêiin hi thillanhei hih ki înrithiang a nit,” a ti a.

¹⁷PUMAPA khan Mosia kha,

¹⁸Arona neh a naipahei neh Israel richihei murdi, hi dânhei hih ipeh rangin thu a pêk a: “Israela richihei lâia mi manih, Israelhei lâia om ram dang mi manih, tukhomin ṭonginkung lenna thillan manih, ngaihoi thillan manih PUMAPA ziangah hâlrivâm thillan a hong lanin chu,

¹⁹a lei iham inrup rang sechal manih, berachal manih, kêlchal manih demnaboi a hong lan rang a nit.

²⁰Demna om viat rêng rêng khah nin hong lanin chu PUMAPA khan lei iham no nih.

²¹Tukhom ṭonginkung lenna thillan manih, ngaihoi thillan manih, Ringeina thillan rangin PUMAPA ziangah a hong lanin chu, a ran lan khah demnaboi a nit rang a nit; khanchu, lei iham pêk a ti.

²²PUMAPA ziangah khan ran, a mitidel manih, a ru kiak manih, sâbe ripuh tâk manih, â pân manih, a vun iphâr manih, a chung rilip manih khah nin hong lan rang ni mak, khangkana ran rêng rêng kha chu farua thillanin mâichâmah khan nin hong lan rang ni mak e.

²³Mahni ngaihoi thillana rangin chu mîring a suak tlia ṭha zoi tak inohei khom hong lan thei nin ti. Khannisela, ṭonginkung lenna ranga khan chu ipom thei ni no nih.

²⁴PUMAPA ziangah khan ran â til iloi rêng rêng neh â til ipop duai khom khah nin hong lan rang ni mak; nin ram sungah khangkana mîring khah ribôlna rangin nin mang rang ni mak.

²⁵“Nam danghei zianga rithoka nin ilâk mîring rêng rêng khah farua thillanin lan iloi rang a nit; khangkana mîring kha chu demna oma bê rang a nit a, ipom thei ni no nih,” itin.

²⁶PUMAPA khan Mosia ziangah, “Sialte manih, berate manih, kêlte manih, achal chu, a zuang suaka rithoka sûn sarika sung chu a puinu neh iṭhen rang ni mak e, a sûn iriatnîa rithokin chu PUMAPA zianga farua thillanin imang thei ni tâng a ti.

²⁸Sialpui neh a te, berapui neh a te, kêlpui neh a te, khah an nurfa kan sûnka sungin thillanin ilan rang ni mak.

²⁹Lômthu ril ribôlna thillan PUMAPA ziangah nin lanin dân angkah takin lan unla; khanchu, nangni ham pêk nîng a ti.

³⁰Kha nî zelah khan ifah zoi rang a nit a, atûk zîng idên rangin îte izua rang ni mak e. Keimah hi PUMAPA chu ki nit,” a ti a.

³¹PUMAPA khan, “Ki thupêkhei hih zôm rei; Keimah hi PUMAPA chu ki nit.

³²Ker ming rithiang hih mualphoi nin sak rang ni mak a; Israel richihein ker thiangzia hih an riat rang a nit. Keimah hi PUMAPA chu ki nit a, keimah ngêiin nangni ki înrithiang a nit.

³³Nin Pathian inih rangin Aigupta rama rithokin nangni ki hong iṭhui suak a nit. Keimah hi PUMAPA chu ki nit,” a ti a.