Read Biete LEVIDÂN 23 Bible Online

LEVIDÂN 23 - Biete bible

LEVIDÂN 23

¹PUMAPA khan Mosia kha,

²Israel richihein inkhômpui rithiang an mang rang zoron dang bîk, sakhua kûthei chungchângah khan hi dânhei hih a pêk a.

³Sûn rukka sung nangmani sin nin tho rang a nit a, a sûn sarinî chu sabatnî a nit a, ringam rang a nit. Kha nî-ah khan chu sin îte nin tho rang ni mak a, Pathian chubai iûn rangin nin inkhôm ngai rang a nit. Sabatnî chu PUMAPA ta a nit, nin omna kipah nin ser rang a nit.

⁴PUMAPA ranga Kûthei chu hihei hih a nit, a zoro dik thap thapa nin mang rang a nit.

⁵Thla khatna, sûn sômlei sûn linî, inî tlâkah khan PUMAPA Kalkan Kût imang rang a nit.

⁶Kha thla ngir sûn sômlei ringanî kha PUMAPA ranga Bairiam Kût a nit, sûn sarika sung chu bairiam ringot nin fâk rang a nit.

⁷A sûn masatak nî-ah khan inkhômpui rithiang nei nin ta, sin rêng rêng nin tho rang ni mak.

⁸Sûn sarika sung chu nîn tin PUMAPA ziangah farua thillan nin lan rang a nit. A sûn sarinî-ah khan chu inkhômpui rithiang nei nôk nin ta, kha nî khomah khan sin rêng rêng nin tho rang ni mak e.

⁹PUMAPA nangni ipêk ram khah nin hong tlung a, bu nin invâng tikin, nin fathlu masatak khah thiampu ziangah nin hong chôi rang a nit.

¹¹Ani khan fathlu khah PUMAPA ziangah ngaihoi thilpêkin lan a ta; khanchu, nangni lei iham a ti. Sabatnî a nitin chu kha fathlu khah thiampu khan sabatnî tûkah khan a lan rang a nit.

¹²Fathlu nin lan nî-ah khan beratuai, demnaboi, kumka mi, hâlrivâm thillan rangin PUMAPA ziangah nin lan rang a nit.

¹³Kha rualah khan bubâl thillanin baidi ṭha chi her inikah, oliv riak neh met inripol PUMAPA ziangah nin hong lan sa rang a nit. Kha thillan inam khan PUMAPA chu a înlôm ngai a nit; khabanah khan iin rua thillanin uain litar khatkah nin hong lan sa rang a nit.

¹⁴Nin bu thar khah Pathian ziangah nin hong lan mâkah chu ibaia zêiin manih, tangpêrin manih, â hûma chipin manih khom nin fâk rang ni mak e. Hi dân hih nin richi suanpâr idêna kumkhuaka nin zôm rang a nit.

¹⁵Fathlu, PUMAPA ziangah nin hong lan nî, sabat ṭumnîa rithoka tepin hapta sarikah vun a ta,

¹⁶sabat voi sarika tûk, a sûn sômringanî-ah khan bubâl thillanin nin bu thar khah nin hong lan rang a nit.

¹⁷Insungkua tinin mahni mun chitah chol ipol baithliam nin zêi rang a nit. PUMAPA ziangah ngaihoi thilpêkin baithliam inik nikah nin hong lan rang a nit, kha bai thliamhei khah baidi thar iṭha chi her inikah seng sengin nin siam rang a nit.

¹⁸Ibai nin lan rualah khan kumka mi berate sarikah, serâtchaltuai khatkah neh berachal inikah demnaboi korong khah nin lan rang a nit. Khahei khah farua thillan neh iin rua thillanhei neh khan hâlrivâm thillanin PUMAPA ziangah nin lan rang a nit. Hi thillan inam hin PUMAPA chu a înlôm ngai a nit.

¹⁹Khabanah khan Sual ribôlnan kêlchal khatkah lan nin ta, Ringeina thillanin berachal tuai inikah kumka mi seng seng nin lan rang a nit.

²⁰Thiampu khan bu thar ibai khah berate inikah neh khan thiampu dongtum rangin PUMAPA ziangah ngaihoi thilpêkin a lan rang a nit. Kha thillan khah arthiang a nit.

²¹Kha nî-ah khan chu sin rêng rêng nin tho rang ni mak a, Pathian chubai iûn rangin nin inkhôm rang a nit. Hi dân hih nin richi suanpârhei khomin an omna kipah kumkhuaka an zôm rang a nit.

²²Nin loia bu nin ât tikin, nin loi vâikôm ibêrêt kan nin ât rang ni mak e, fânung khom nin ritik nôk rang ni khâi mak; mi inrianghei neh ram dang mihei rangin nin lâ pêk rang a nit. Keimah hih PUMAPA nin Pathian chu ki nit.

²³Thla sarina sûn masatak khah ringamnî sûn bîkin nin khâm rang a nit a, bekul â ring kaneh Pathian chubai iûn rangin nin hong ribûm rang a nit.

²⁵PUMAPA ziangah bubâl thillan nin lan rang a nit; sin rêng rêng nin tho rang ni mak e.

²⁶Thla sarina a sûn sômnî khah kum tina nam pumpui sual ribôlna sûn roinpui a nit a, bu ngeiin Pathian chubai iûn rangin nin inkhôm rang a nit. PUMAPA ziangah hâlrivâm thillan nin lan rang a nit.

²⁸Kha nî-ah khan chu sin nin tho rang ni mak a; PUMAPA nin Pathian zianga nin sual ribôl nî a nit.

²⁹Tukhom kha nî sûna thil imanih lei ifah viat rêng rêng chu a chipuihei lâia rithokin khâi inrikiangin om a ti.

³⁰Tukhom kha nî sûna sin itho kangân chu PUMAPA ngêiin that inrimang a ti.

³¹Hi dân hih takmun khomah om unla, nin richi suanpârhei idêna kumkhuaka nin zôm rang a nit.

³²Kha thla ngir, a sûn ikuaknî, inî tlâka rithokin a sûn sômnî, inî tlâk idênin ringam nî sûnin nin ser rang a nit, kha sungah khan chu îte nin fâk viat rang ni mak e.

³³Thla sarina a sûn sômleiringaka nî-a rithokin sûn sarika sung Dângdi kût imang rang a nit.

³⁵A sûn masatak nî-ah khan Pathian chubai iûn rangin inkhômpui ringumtak nei nin ta, sin rêng rêng nin tho rang ni mak e.

³⁶Sûn sarika sung chu sûn tin bubâl thillan PUMAPA ziangah lan nin ta, a sûn iriatnî-ah khan â tharin Pathian chubai iûn rangin inkhômpui ringumtak nei nôk nin ta, bubâl thillan khom nin lan rang a nit. Kha nî sûn khah Pathian chubai ûn nî a nit a, sin nin tho rang ni mak e.

³⁷Hihei hih PUMAPA chôiinrisângna ranga kût nin mang ranghei chu a nit, inkhômpui nei nin ta, farua thillan hei, hâlrivâm thillan hei, bubâl thillan hei neh ribôlna chi dang dang neh iin rua thillan hei, a hun bi thap thapa nin lan rang chu a nit. Hi kût hih sabatnî ser bana ser rang a nit; khante, hi thillanhei hih PUMAPA zianga nin hong ilan ngai, ṭonginkung lenna thillan hei, ngaihoi thilpêk hei bana lan rang a nit.

³⁹Bu nin ât zoiin, thla sarina a sûn sômlei ringanîa rithokin sun sarika sung kût hih nin mang rang a nit. A sûn masatak nî kha ringam ṭian nî ai nit rang a nit.

⁴⁰Kha nî-ah khan nin theikunga thei irâ ṭha tak takhei, itûm ibânhei, thing iṭang inbûrhei chôi unla, PUMAPA nin Pathian chôiinrisângin kûtpui nin mang rang a nit.

⁴¹Khangkah khan sûn sarika sung nin mang rang a nit. Hi dân hih nin richi suanpârhei khomin kumkhuaka an zôm rang a nit.

⁴²Israel richihei murdi chu hi sûn sarika sungah hin dângdi nuaiah an om rang a nit.

⁴³Khanchu, nin naihei khan Israel richihei khah Aigupta rama rithokin PUMAPA khan a ṭhui suak lâiah khan dângdi nuaiah a în-om ngai a nit iti riang an ti. Ani khah PUMAPA nin Pathian chu a nit.

⁴⁴Khangkah takah khan Mosia khan Israel mihei khah PUMAPA chôiinrisângna kût mang dân rang khah ai siam pêk a nit.