Read Biete LEVIDÂN 24 Bible Online

LEVIDÂN 24 - Biete bible

LEVIDÂN 24

¹PUMAPA khan Mosia kha,

²hi thupêkhei hih Israel richihei ipeh rangin â ril a. Oliv riak rithiang tak ichok ranga sôm khah meiser ichok maina rangin hong chôi riseh.

³Ritongna Puan-In sunga Thuthlung Bôm omna, Mun Rithiang tak puanzâr chontanah khan zân tianga rithoka zîng idêna chok mai rangin PUMAPA maah Arona khan meiser khah kholoi tin â chok mai ngai rang a nit. Amahih nin richi suanpârhei idêna kumkho dân rang a nit.

⁴Arona khan rângkachak koronga siam meiser sianaa meiserhei khah a enkol rang a nit a, PUMAPA maah khan a zoro takah â chok mai rang a nit.

⁵Baidi ṭha chi her sômlei her inikah lan la, amakhan ibai thliam sômleiinikah isiamin zêi inla, ibai thliam khatkah kha baidi herkah chita siam a nit rang a nit.

⁶PUMAPA maah khan rângkachak inzena siam docham chungah khan ibai thliam khah rân inikan, rânka tah iruk rukkan nen ritlâng rang a nit.

⁷A rân ikipah khan bero rithiang tak izâka manih ibai rânah khan seh seng seng inla, amakhan ibai khah PUMAPA zianga farua thillan a nit iti inlang a ti.

⁸Sabatnî kipah, PUMAPA maah ibai ithar iseh mai rang a nit. Amahih Israel richihein kumkhuaka an tho ngêt rang a nit.

⁹Ibai khah Arona neh a naipahei fâk rang, an dongtum a nit, mun rithiangah khan an fâk ngai rang a nit, amahih thiampuhei dongtum ranga PUMAPA zianga thillan, thil rithiang tak a nit.

¹⁰Mi khatkah a om a, a pa chu Aigupta mi a nit a, a nu chu Israel mi, Dan nama mi Dibria nainu Selomiti a nit. Kha mi khah riabukah khan Israel mi khatkah neh an ringo a. Khante, an ringo lâiah khan kha mi khan PUMAPA vâni a sâm a; khanchu, ani khah Mosia ziangah an hong ṭhui a.

¹²Ingkana lo rang im ai nit iti PUMAPA bâia rithoka thu suak an ngâk sung kârkah chu an khum khap a.

¹³PUMAPA khan Mosia ziangah,

¹⁴“Kha miriam khah riabuk putiang ṭhui unla, Pathian vâni a sâm lâi iretu murdi khan thiamno chang a nit iti entîrnan a lu chungah an kut ringat sela; khanungchu, mipui murdi khan lungin dêng that riseh.

¹⁵Khanungchu, Israel richihei khah iril inla, tukhom Pathian vâni sâm kangân chu a sual mo chu pêl a ta,

¹⁶ithat ngêt rang a nit. Ram dang mi khom ni sela, Israel mi khom ni sela, PUMAPA vâni sâm rêng rêng chu mipuiin lungin idêng that ngêt rang a nit.

¹⁷“Tukhom mi thattu chu ithat ngêt rang a nit.

¹⁸Tukhom mi ran ithattu chu ân rithûl nôk ngêt rang a nit. Ringna sikah ringna iti dân a nit.

¹⁹“Mi tukhomin mi dang â phopin chu, a tho lam angkah takin a chungah itho rang a nit.

²⁰Ru khatkah â khiakin chu ama ru khom khatkah ikhiak pêk rang a nit a; mi mit ân del pêkin chu ama mit khom indel pêk rang a nit a; mi ha â ṭhul pêkin chu ama ha khom iṭhul pêk rang a nit. Mi chunga a tho lam angkah takin ama chungah khom itho rang a nit.

²¹Mi ran ithattu khan a thung nôk rang a nit a, miriam ithattu chu ithat ngêt rang a nit.

²²Hi dân hih Israel mi murdi rang a nit a, nin lâia om nam danghei khom a îhuap sa a nit. Keimah hi PUMAPA nin Pathian chu ki nit hi,” a ti a.

²³Mosia khan hi thu hih mipuihei khah â ril a; khanchu, kha miriam Pathian vâni sâmtu khah riabuk putiang an ṭhui a, lungin an dêng that tâk a. Mosia zianga PUMAPA thupêk angkah khan Israel richihei khan an tho tâk a.