Read Biete LEVIDÂN 25 Bible Online

LEVIDÂN 25 - Biete bible

LEVIDÂN 25

¹PUMAPA khan Sinai tlângah Mosia khah â son a,

²Israel richihei kha hi dânhei hih ipeh rangin thu a pêk a: “Nangni kî pêk ram khah nin va tlung tikin chu PUMAPA chôiinrisângnan kum sarina kum ikipah khan ram khah nin in-ôl ṭian rang a nit.

³Kum irukka sung kha nin loiah khan chimu thông nin ta, nin grep kunghei khah rikhei nin ta, â râhei nin rimal rang a nit.

⁴A kum sarina kum kha chu PUMAPA ranga kum inran a nit a, ram khah a ôl ṭian rang a nit. Nin loiah khan buhei, chimuhei nin tho rang ni mak a, nin grep kunghei khom nin rikhei rang ni mak.

⁵Nin farlihei khom nin ât rang ni mak a, nin irkhei ino grep khom nin rimal rang ni mak; ram ôl ṭian kum ai nit rang a nit.

⁶Ram khah in-ôl ṭian khom unla, nin suakhei rang, nin ina rilofahei rang, nin zianga om ram dang mihei rang, nangmani rang, ifah rang om ngir a ti.

⁷Nin ranhei rang neh ramsahei ta rang khom om a ti. Ramin a îsua murdi khah nin fâk rang nîng a ti.

⁸“Kum sarikah voi sarika tepin, kum sômilikah kum ikuakkah a vun zoi kum,

⁹a thla sarina sûn sômnî, Ritlan Nî-ah khan ram pumpuiah bekul itum rangin mi nin tir rang a nit.

¹⁰Kum sôm ringana khah serinrithiang nin ta, ram sunga om murdi ziangah zalenna thu inpuang nin ta, nin ta rangin Jubili nîng a ti. In neh loi izuara om tâk murdi khah â neitu bul zianga manih archihei zianga manih ipe khîr nôk rang a nit a, suaka izuar tâk khom inzalenin, a insungah inkîr nôk rang a nit.

¹¹Kha kum sômringana khah nin ta rangin Jubili nîng a ta, nin loiah îte nin tho rang ni mak a, nin farlihei khom nin ât rang ni mak a, nin grep rikhei ino râ khom nin rimal rang ni mak.

¹²Jubili kum a nit a, nin ta ranga kum rithiang ai nit rang a nit; ram irâ bang khah nin fâk rang a nit.

¹³“Hi Jubili kumah hin mi tinin mahni ta chit nin nei nôk rang a nit.

¹⁴Khasikin, ram ni zuarin manih, ner chôkin manih, ni chipuihei Israel mi khah dikino takkan ni tho rang ni mak.

¹⁵Jubili kum a tlung nôk mâka ram khan a thil isua rang khah insûtin ram man khah ikhit rang a nit.

¹⁶Kum a la tamin chu a man khah risâng a ta, kum a roi tâkin chu a man khah a roi rang a nit; ram khah izuar thal tak tak ni mak a, ram khan chimu â sua thei rang bang khah izuar a nit.

¹⁷Nin Israelpuihei lêm no rei, PUMAPA nin Pathian nin ṭi rang a nit. Keimah hih PUMAPA nin Pathian chu ki nit.

¹⁸“PUMAPA dânhei neh thupêkhei zôm unla; khanchu, kha ramah khan thlangam takkan lêng nin ti.

¹⁹Ram khan irâ isuang a ta, khop ithlâi takkan fâng nin ta, thlangam takkan nin ilêng thei rang a nit.

²⁰“A kum sari kuma khan loiah lak îte tho mang me a, chimu lak îte invâng iloiin, im fah tâng ei ta? nin ti thei a.

²¹Khannisela, a kum irukna kumah khan PUMAPA khan ram khah ṭhatvur a ta, kum inika sunga irin rang irâ isuang a ti.

²²A kum iriatna kuma nin loia nin chimu tho a vâng tenan khom nin bu lui a kum irukna kuma nin învâng khah la nei mai nin ta, bu thar a vâng nôk idênin bu lui nin fasiara khah nin lai nêk mai rang a nit.

²³“Kumkhuaka rangin nin ram khah nin zuar thal rang ni mak a, ram khah nin ta ni mak a, Pathian ta kêng ai nit, nangni chu khualmi pai nin nit.

²⁴“Ram khah nin zuar a nit khomin, a neitu bul khan artlan kîr thei ngêt rang a nit.

²⁵Israel mi khah a hong inriang tak tak a, a ram khah a zuar ngêt tâkin chu a takiti tak khan a ram zuar khah a hong ritlan rang a nit.

²⁶Mi, suapui takiti, a hong ritlan pêk rang nei ino kha, nungah chu amah a hong inṭum nôk a nitin chu, amah ngêiin artlan kîr nôk thei rang a nit.

²⁷Khangkana thilah khan chu Jubili kum tlung tena chimu vâng thei zâk insûtin a man khah ikhita richoh kîr nôk thei rang a nit. Jubili kumah khan a nei kîr nôk ngir rang a nit.

²⁸Khannisela, artlan kîr nôk thei non chu ai zuar tâk khah Jubili kum idênin archotu kutah khan om a ta, Jubili kum tenan chu ram kha â neitu bul khah a pêk ikhîr nôk rang a nit.

²⁹“Kulpui inei khopuia a in, min a zuarin chu a zuar ata kumka sungah khan chu ritlan nôk thei a ti.

³⁰Khannisela, kumka sunga artlan thei non chu in khah kumkhuan archi suanpâr idên khomin archotu ta ai nit mai rang tâk a nit. Jubili kum khomin ipeh kîr ni khâi no nih.

³¹Kulpui nei ino, thingtlâng khuaa inhei kha chu ram richo angkana bê rang a nit a, ritlan thei nîng a ta, Jubili kumin chu ipeh kîr nôk rang a nit.

³²Khannisela, Levihei khan chu an dongtum ranga ipe khopuiheia an inhei khah tiklâi khomin ritlan thei an ti.

³³Levihei lâia mi khan kulpui inei khua khatka khôka a in khah a zuar a, artlan thei khâi no khom a, Jubili kumah khan ipeh kîr nôk rang a nit; Levia chihein an omna ranga inkung khuaa an inhei khah Israela richihei lâia an dongtum idet a nit sikin.

³⁴Levia chihei khopui kôl vêla sial hei, kêl hei lêngna ram khah izuar thei ni no nih, an kumkho dongtum a nit.

³⁵“Ni suapui Israel mi, ni kôla om kha, a hong inriang a, nang a hong ribêlin chu ni lei donsui rang a nit; ni ziangah a om mai theina rangin rilo mi angkan ni lei ifa rang a nit.

³⁶A ziangah sum manih, thil manih, â pung la no roh, Pathian ṭin la, ni suapui khah ni kôlah in-om mai roh.

³⁷Sum nen ritângin â pung ni lâk pêk rang ni mak, ni buhei nen richôkin ni lep rang ni mak.

³⁸Kanan ram hi nangni peh rang neh nin Pathian inih ranga Aigupta ram ata nangni ṭhui suaktu PUMAPA nin Pathian thupêk a nit.

³⁹“Ni suapui Israel mi, ni kôla om, a hong inriang a, ni suak ichang rangin ni ziangah hong rizuar khom seh, suak angkan ni mang rang ni mak a.

⁴⁰Rilofa angkan ni ziangah om a ta, Jubili kum tenah ni sin a tho rang a nit.

⁴¹Kha rizoiin chu, amah neh a naihei khah ni ziang ata suak an ta, anmani insungkua ziang ngêiah lût nôk an ta, an in neh loi khah an lua nôk rang a nit.

⁴²Israel mihei khah PUMAPA suakhei an nit a, Aigupta ram ata a hong iṭhui suak a nit; suaka zuar rang ni mak e.

⁴³Pualoi takkan an chungah ni châng rang ni mak, ni Pathian khah ni ṭi rang a nit.

⁴⁴Boi inei ni nuamin chu ni kôlvêla namhei lâia mi ner chôk rang a nit.

⁴⁵Nin lâia om nam dang naihei chu richoh thei nin ta, khangkana mi, naihei nin rama suakhei kha chu nin ta nîng a ti.

⁴⁶Nin naihein richon angkan hong dong thal thei an ta, an damsung kârkah an sin inthông an ti. Khannisela, nin Israel champuihei chu pualoi takkan nin tho rang ni mak.

⁴⁷“Ram dang mi nin lâia om khah a hong richonga, khan nin Israel champui khah a hong inrianga, kha ram dang zianga manih, kha ram dang mi insungkua zianga manih bôi rangin arzuar a,

⁴⁸arzuar zoi nung khomin ritlan nôk thei nîng a ti. Ama inzirpuihei lâia mîn ritlan thei a ta,

⁴⁹a pangâkin manih, a pangâk naipan manih, a pa ulian naipan manih, anitnole, a suapui takiti takin manih ritlan thei a ti; Amah khomin a hong richong nôkin chu a khâtin ritlan thei a ti.

⁵⁰Arzuar lûtna pa neh risôn an ta, arzuar kum ata Jubili kum idênin rilofa balamin izâkâm lo phâk a ti isûtin ama ritlanna man khah an khit rang a nit.

⁵¹A sôt im a nâi im Jubili kum tlung tena a lo thei zâk rang khah ama ritlanna manin a pêk ikhîr rang a nit.

⁵²

⁵³Rilofa, kumka ranga sin intho angkan sin ân tho rang a nit. A pu khan a chungah pualoi takkan a châng rang ni mak.

⁵⁴A îlam khomah ritlan a nit kher no khom a, Jubili kumin chu amah neh a naihei khah inzalen an nit rang a nit.

⁵⁵Israel mi rêng rêng, tute suakah kumkhuakan an itâng rang ni mak; Israel mihei khah PUMAPA suak, Aigupta ram ata a irtlan suakhei an nit; PUMAPA an Pathian chu ki nit,” a ti a.