Read Biete LEVIDÂN 26 Bible Online

LEVIDÂN 26 - Biete bible

LEVIDÂN 26

¹PUMAPA khan, “Chanlamboi rilim manih, mirmil manih, chubai iûn rang nin siam rang ni mak a, lungphun manih, lungisuk inriziak manih khom nin phun rang ni mak. Keimah hi PUMAPA nin Pathian ki nit hih.

²Ki sabatnîhei khah ser unla, ki mun rithiang khah nin marit rang a nit. Keimah hi PUMAPA chu ki nit.

³“Ki dânhei nin zôm a, ki thupêkhei nin ôiin chu,

⁴a zoro takka ruatuihei chu nangni insûr pêk ki ta; khanchu, nin loihei khan chimu invâng a ta, nin theikunghei khan irâ isuang a ti.

⁵Buhei invâng nin ta, grep irâ rimal zoro dênin nin buhei khah ât nin ta, grep irâ nin lar mal mai lâiin chichôi zoron nangni de nôk a ti. Nin nuam dôrka fah rang nei nin ta, nin ramah khan thlangam takkan lêng nin ti.

⁶“Nin ramah khan ringeina inlêng ki ta, iṭi rang rêng rêng nei loiin in thlar thlar nin ta, hi rama sarâng inrîthei khah ûm vang ki ta, khandaiin nin ram rifang no nih.

⁷Nin irâlhei khah rizûl nin ta, khandaia thatin nêna chang nin ti.

⁸Mi pasal ringakan mi rizakah rizûl nin ta, mi rizakan mi sîngkah rizûl nin ti; nin irâlhei khah nin maah khandaia thatin om an ti.

⁹Ṭhat nangni vur ki ta, richi suanpâr itam takkah nangni innei ki ti. Khante, nin zianga ki thuthlung khah indet ki ti.

¹⁰Kumka nin nêk ban rak rang buhei invâng nin ta, bu thar nin siana rangin â luihei khah inrong nin ti.

¹¹Ki Puan-In rithiangah khan nin lâiah om ki ta, nung nangni song tlak no ning e.

¹²Nangni ompui ki ta, nin Pathian nîng ki ta, nangni khom ki mihei nîng nin ti.

¹³Keimah hi PUMAPA nin Pathian, suak ni khâi loi ranga Aigupta ram ata nangni ṭhui suaktu chu ki nit. Nin ringkolhei khah ke khiak a, rithuak rizang takkan nangni ki înlêng tâk a nit hih,” a ti a.

¹⁴PUMAPA khan, “Ki thupêkhei hih zôm loi a,

¹⁵Ki dânhei nin nôl a, ki thuhei ipom loi a, nin zianga ki thuthlung nin ikhiakin chu,

¹⁶kuttum nangni kî tho rang a nit. Nin chungah thil inrît tak nin ringna fa hek diak diak neh nin mit inrizal tîr tîr indam thei ino natna rî neh inkhur rî inlêng ki ti. Chimuhei khom thông nin ta; khanniseh, â tlong nîng a ti, nin irâlhei khan an ifâk riai rang a nit.

¹⁷Nung nangni song ki ta; khanchu, nin irâlhei makungah tlôm nin ti. Nangni neltuhein nin chungah roirêl an ta, rilônthinga omin tutên nangni rizûl loiin lâizâm thông nin ti.

¹⁸“Khangkah dôrkan khom ki thu nin la zôm nuam no maiin chu nin sualhei sikin a bâk sarikan kuttum nangni la thông ki ti.

¹⁹Nin isong tak tak, nin râtna khah nangni seh pêk ki ta, nin rangin rivân khi thîr angkana rua pom inon siam ki ta, ruatui sûr khâi no ni a, nin ram kha sumsen angkana khirin ṭôl a ti.

²⁰Nin ritha sêngna khah â tlong nîng a ta, nin loiah khan îte vâng no nia, nin theikunghei khan irâ isua khâi no nih.

²¹“Nin ne la nôl mai a, ki thu nin la pom nuam no maiin chu a bâk sarikan nin kuttum tuang inpung ki ti.

²²Nin lâiah sarâng inrîthei tir ki ta, nin naihei, nin ranhei khah nangni that pêk an ta, nangni an that rôn rai tâk sikin nin lampuihei khah changpân kâi a ti.

²³“Khangkah dôrka kuttum nin tuang nung khomin ki thuhei nin la pom ual no a, ne kal khapa nin la om maiin chu,

²⁴kei khom nangmani kal khapin om ki ta, keimah ngêiin matona nêka bâk sarika nah ualin kuttum nangni thông ki ti.

²⁵Thuthlung nin isiat sika phuba lâknan khandai nin chungah inlêng ki ta, zôkna ranga nin khopui kulpui sungheiah nin ribîk ṭian khomin, nin lâiah ripui inlêng ki ta, nin irâlhei kutah ripeh ngîr nin ti.

²⁶Nin fâknêk lâkna nangni dan chat pêk ki ta; khanchu, nupang sômkan lungthu khatkah bang an ibai nei murdi zêina rangin nang tâng an ti. Risem sap sap an ta, an dongtum an fâk zoi khomin an von la ṭâm ṭian mai a ti.

²⁷“Khangkah dôrkan khom ki thu nin ipom ual noa, ne kal khapa nin la om maiin chu,

²⁸ningmurin nin chungah ṭuang ki ta, matona nêka a bâk sarika natinsat ualin kuttum nangni thông ki ti.

²⁹Nin vonṭâm rai sikin nin nainuhei, nin naipahei sa khom fâng nin ti.

³⁰Itlângheia nin bôlkuanghei khah isim ki ta, nin namhoi hâlna mâichâm khah ṭhet chit ki ta, nin mirmilhei inlîr ki ta, nin ruakhei khah nin mirmil ilîrhei chungah pai ki ti. Nangni nel titakin,

³¹nin khopuihei khah inram ki ta, nin mun rithianghei isiang ki ta; nin ribôlna thillanhei kha nangni lei iham pêk no ning e.

³²Nin ram kha isehchit ki ta; kha ram hong iluatu, nin irâlhei khan arkhêl tîng an ti.

³³Nin chungah ridoina hong tlung a ta, nam danghei lâiah nangni chekindar ki ta, nin ram khah ramipônin om a ta, nin khopuihei kha chim rem rum a ti.

³⁴Khanungchu, nin om lâiah khan nin ram khah inringam nuam mak chei a, nin omno sung chu ram khah a irngam rang tâk a nit. Ram kha irialin om a ta, nin irâlhei ramah suaka nin om sungah khan ram khah a irngam ṭian rang tâk a nit.

³⁶“Nin irâlhei rama bôia tânghei khah iṭi rithlavâiin om an ta, thingnâ ṭong ithlîn ai sêm irî khomin lâizâm thông an ta, khandaia rizûl angkan lâizâm thông an ta, tutên rizûl viat loiin ilîr an ti.

³⁷Tutên rizûl viat loi khomin khandaia rizûl angkah dôrkan iban ilîr rem rum an ta; nin irâlhei lei doi kîrna rangin râtna rêng rêng nei no tin u.

³⁸Mi ramah thîng nin ta, nin irâlhei ram khan nangni lem zoi a ti.

³⁹Nin irâlhei rama a la dam isunhei khom nin sualna sik neh nin pi neh puhei sualna sikin nin irâlhei ramah khan ram tîr tîr nin ti.

⁴⁰“Khannisela, nin richihei khan ki chunga an sualna neh an pi neh puhei sualna, ne nel a, ki chunga rihel a,

⁴¹kei khom anmani nung isonga an ne siamna sika an irâlhei rama suaka ken omna khah an riat suak a, an sual kha an inpuang a, an lungril an inriniam a, an sual man khah an mu zoi tenan chu,

⁴²Jakoba hei, Isaka hei, Abrahama hei zianga ki thuthlung khah remai ki ta, ki mihei chu hi ram hih ki mihei ipeh rangin ṭonginkung inthar nôk ki ti.

⁴³Khannisela, ram khah arngam ṭian theina rangin ram ata mihei chu ilah suak vang bak rang a nit. Ki dânhei neh ki thupêkhei an nôl sika an kuttum tuang rang khah an tuang bak rang a nit.

⁴⁴Khangkah tak takin intuang khom inlang an irâlhei ramah an om mai lâi khomin marak no ning a, inrimang rip no ning e.

⁴⁵Keimah PUMAPA hi an Pathian ki nit theina ranga nam tinhei mitmua Aigupta ram ata ki hong iṭhui an chibulhei zianga ki thuthlung khah inthar nôk ki ti, ti roh,” a ti a.

⁴⁶Hihei murdi hih Sinai tlânga Mosia zianga PUMAPA dân neh thupêk, Israel mihei ta ranga ai pêk chu a nit.