Read Biete LEVIDÂN 27 Bible Online

LEVIDÂN 27 - Biete bible

LEVIDÂN 27

¹PUMAPA khan Mosia ziangah,

²hi dânhei hih Israel mihei ta rangin a pêk a. Min PUMAPA zianga ipeh rangin miriam ipe inkung sela, kha miriam ritlan man khah hingka hin isût rang a nit,

³Ipa puitling, kum sôminika rithoka kum sômirukka sunga mi a nitin chu tangka sekel sômringaka nîng a ti. Nupang puitling chu tangka sekel sômithumkah a nit rang a nit. Ipa naipang, kum ringaka rithoka kum sôminika sunga mi chu tangka sekel sôminikah nîng a ti. Nupang naipang chu tangka sekel sômkah a nit rang a nit. Ipa naipang kum ringaka thuai tianga mi chu tangka sekel ringakah nîng a ti. Nupang naipang kum ringaka thuai tianga chu tangka sekel ithumkah a nit rang a nit. Ipa kum sômirukka chung tianga mi chu tangka sekel sômleiringakah nîng a ti. Nupang kum sômirukka chungtianga mi chu tangka sekel sômkah a nit rang a nit.

⁸Kha ṭongrikhâmtu khah ân riang a, ritlanna rang balama man inkung kha a pêk thei non chu ipe a înkung miriam khah thiampu ziangah a hong ṭhui rang a nit. Ṭongrikhâmtu thei tôk rang lamin thiampu khan bituk lei irît pêk a ti.

⁹PUMAPA zianga thillana peh rangin ran nen kunga a nitin chu, PUMAPA ranga ilan rêng rêng kha chu serinran khap tâk a nit.

¹⁰Kha ṭongrikhâmtu khan kha ran khah a dangin a thleng rang ni mak. A thlengin chu a ruaikan a thlengna neh khan PUMAPA ta ai nit rang a nit.

¹¹Ran rithiang ino, PUMAPA zianga thillan ranga mang ngai ino a nitin chu, kha ran khah thiampu ziangah a hong kâi rang a nit.

¹²Thiampu khan a man rang rihoi lei khit pêk a ta, amakhah a man zâk chu ai nit rang a nit.

¹³Khannisela, kha ṭongrikhâmtu khan ritlan a nuamin chu a man ikhit tâk khah pêng a ta, khabanah khan bâk ringaka ṭhena bâkkah a pêk sa rang a nit.

¹⁴Mi tu manin ama in khah PUMAPA ta rangin a lanin chu a in ṭhat neh ṭhat no dân izirin thiampu khan a man khit a ta, amakhah a man dik thap ai nit rang a nit.

¹⁵Kha ama in ilantu khan ritlan kîr nôk a nuamin chu a man ikhit tâk khah pêng a ta, khabanah bâk ringaka ṭhena bâkkah a pêk sa rang a nit.

¹⁶Min ama ram ṭhenkah PUMAPA ta ranga a lanin chu a man khah chimu a vâng thei dân izira khit rang a nit; barli ṭin sôminika mun khah tangka sekel sômka man angkana sût rang a nit.

¹⁷Ram khah Jubili kum zoi zela ilan a nitin chu man khit lam itluk thap nîng a ta;

¹⁸Jubili kum nunga lan a nitin chu thiampun a man khah Jubili tlung nôkna rang kum tam dan izirin khit a ta, khit dân nêka roi ualin khit pêk a ti.

¹⁹Â lantu khan ritlan kîr nôk a nuamin chu a man ikhit banah bâk ringaka ṭhena bâkkah a pêk sa rang a nit.

²⁰PUMAPA ziang ata ritlan nôk bak loiin ram khah mi ziangah a zuarin chu ritlan nôk thei khâi no nih.

²¹Jubili kum nôk tenan chu kha ram khah PUMAPA ta ni thal tâng a ta, thiampuhei dongtum ni tâng a ti.

²²Mîn ama ram pial ni no, loi a irchôk khah PUMAPA ziangah a lanin chu,

²³Jubili kum tlung nôkna rang kum tam dân izirin a man khah thiampu khan khit a ta, kha â lantu khan kha nî zelah khan a man khah a pêk rang a nit; kha sum khah PUMAPA ta nîng a ti.

²⁴Jubili kumin chu â neitu bul zianga manih, archihei zianga manih ipeh kîr nôk rang a nit.

²⁵Hi thil man isût hih Tempil hîllung manglâi angka taka sût rang a nit. Sekel khatkah kha Gera sôminika neh ritluk bang a nit.

²⁶Ran lâia suak masa tak chu PUMAPA dongtum pial a nit a; khasikin, tutên ngaihoi thilpêkin a ziangah an lan rang ni mak. Serâtte manih, berate manih, kêlte manih khom ni sela, PUMAPA dongtum a nit.

²⁷Khannisela, ran rithiang ino a nitin chu a man ikhit banah a bâk ringaka ṭhena bâkkah ipeh san ritlan nôk thei a nit. Ritlan nôk a nit non chu a man khit lam angkan izuar rang a nit.

²⁸PUMAPA ta ranga serinran bîk mîn a nei thei a, miriam manih, ran manih, ram manih ai serinran tâk khah izuar thei ni mak a, ritlan nôk thei khom ni mak e. PUMAPA ta ai nit kumkhua tâk a nit.

²⁹Miriam khom ni seh, khangkana serinran tâk kha chu ritlan suak thei ni khâi mak; ithat ngêt rang a nit.

³⁰Ram sunga thil ivâng rêng rêng bu manih, thei manih khom sômka khatkah rêng rêng chu PUMAPA ta a nit.

³¹Mîn sômka khatka lâia mi a îkhom ritlan a nuamin chu a man ikhit banah bâk ringaka ṭhena bâkkah ipeh san ritlan thei a ti.

³²Ran rêng rêng khom sômka khatkah chu PUMAPA ta a nit. Ran lôm khah itepin a sômka chukna kip khah PUMAPA ta rang a nit.

³³A chongpu khan â seh ual murdi â sômna a hong chuka rithlang a nit thei rang lamin a ran khah a zêk rang ni mak a, â ṭha ual khah â seh ualin a thleng rang khom ni mak. A thleng ngân ngânin chu a ruaikan a thlengna neh khan PUMAPA ta nîng a ta, ritlan nôk thei ni khâi no nih.

³⁴Hi thupêkhei hih Sinai tlânga Mosia zianga Israel richihei ta ranga PUMAPA thupêkhei chu a nit.