Read Biete LEVIDÂN 3 Bible Online

LEVIDÂN 3 - Biete bible

LEVIDÂN 3

¹Ringeina thillan[6] rang mi tukhomin a sial lôm lâia mi a hong lanin chu apui manih achal manih khom ni sela, demnaboi khah PUMAPA ziangah a hong lan rang a nit.

²A sial lan lu-ah khan a kut ringat a ta, Ritongna Puan-In kotbâi bulah that a ta, Arona richi thiampuhei khan a thisen khah mâichâm rikhîlkan an rithe rang a nit.

³Ringeina thillana rithokin PUMAPA ziangah hihei hih a lan rang a nit: a sung thâi murdi,

⁴â bêhei neh â tuamtu thâi, â thin lûm iṭha hei.

⁵Khahei khah thiampuhein mâichâmah khan hâlrivâm thillanhei neh khan an hâl rang a nit. Hi thillan inam hin PUMAPA chu a înlôm ngai a nit.

⁶Ringeina thillan rang mi tukhomin a bera manih a kêl manih lâia mi PUMAPA ziangah a hong lanin chu apui khom, achal khom, demnaboi a lan rang a nit.

⁷A thillan kha bera a nitin chu

⁸a lu-ah a kut ringat a ta, PUMAPA omna Puan-In kottualah ithat rang a nit; thiampuhei khan a thisen khah mâichâm rikhîlkan an rithe rang a nit.

⁹Ringeina thillana rithokin PUMAPA ziangah hihei hih a lan rang a nit: a thâi hei, armei thâi a kongbûr ibêrêta tan hei, a sung thâi murdi hei,

¹⁰â bêhei neh â tuamtu thâi hei neh â thin lûm iṭha hei.

¹¹Khahei khah thiampu khan mâichâmah, PUMAPA ziangah ifarua thillanin a hâl rang a nit.

¹²PUMAPA zianga a thillan khah kêl a nitin chu,

¹³a lu-ah a kut ringat a ta, PUMAPA omna Puan-In kottualah that a ta, a thisen khah thiampuhei khan mâichâm rikhîlkan an rithe rang a nit.

¹⁴Hihei hih ifarua thillana PUMAPA zianga a lan rang chu a nit: a sung thâi murdihei,

¹⁵â bêhei neh â tuamtu thâi neh â thin lûm iṭha hei.

¹⁶Hihei hih ifarua thillan rangin thiampu khan mâichâmah PUMAPA inlôm ngai ifarua thillanin a hâl rang a nit. A thâi murdi chu PUMAPA dongtum a nit.

¹⁷Israel mi tukhomin sathâi neh thisen an fâk rang ni mak. Israel richihei chu takmun khomah om sela hi dân hih kumkhuaka an zôm ranga thupêk idet khap a nit.