Read Biete LEVIDÂN 4 Bible Online

LEVIDÂN 4 - Biete bible

LEVIDÂN 4

¹PUMAPA khan Mosia khah â sôn a,

²“Israel mihei iril roh, mi tukhom an isual a, PUMAPA thupêk an isiat duaiin chu hingka hin itho rang a nit.

³“Thil thonchâi duaitu khah riak inrithu Thiampu laltak a nit a, mipuiin a sual thiamno changna an pêl rangin chu, a sual ribôlnan serât tuai, demnaboi, PUMAPA ziangah a lan rang a nit.

⁴PUMAPA maah, PUMAPA omna Puan-In kottualah, serât tuai khah hong kâi a ta, a lu-ah khan a kut ringat a ta, a that rang a nit.

⁵Khanungchu, a thisen khah chôi a ta, Ritongna Puan-In sungah lûtpui a ti.

⁶Khanchu, ani khan thisenah khan a kutṭim ichiang a ta, PUMAPA maah, Mun Rithiang puanzâr kha voi sarikah arthe rang a nit.

⁷Khanungchu, ani khan PUMAPA maah, Ritongna Puan-Ina namhoi hâlna mâichâm rikîheiah khan thisen ichînkah kha nâl a ta, a bân murdi kha chu Puan-In kotbâi kôla hâlrivâm thillan mâichâm bulah khan a bun riai rang a nit.

⁸Sual ribôlna serât thâi hei, a sung thâi hei,

⁹â bêhei neh â tuamtu thâi neh â thin lûm iṭha hei kha,

¹⁰thiampu khan la suak a ta, a thâi hei khah Ringeina thillan tho ngai balam angka khan hâlrivâm lanna mâichâmah a hâl rang a nit.

¹¹Khannisela, a vunhei, a sa murdihei, a lu hei, a ke hei, a sungkuahei kha chu

¹²riabuk dâiputianga, mun serinrithiang, mâichâm rivut painaah, meipui sêm a ta, a hâlrivâm rang a nit.

¹³“Israel nam pumpuiin thonsual an tho duaia, reh suak vak loiin PUMAPA thupêk an isiat duaia a nitin chu,

¹⁴an thil thonsual khah an riat suak kaneh nam pumpui khan sual ribôlnan serât tuai lan a ta, Ritongna Puan-In kottualah an hong kâi rang a nit.

¹⁵Nam ruaituhei khan serât lu-ah khan an kut ringat an ta, PUMAPA maah khan serât khah ithat rang a nit.

¹⁶Thiampu laltak khan serât thisen ichînkah kha Ritongna Puan-In sungah chôi a ta;

¹⁷Mun Rithiang tak puanzâr khah voi sarikah a kutṭimin thisen khah arthe rang a nit.

¹⁸Khanungchu, thisen khah Puan-In sunga namhoi hâlna mâichâm ikila arkîheiah khan nâl sa a ta, a bân murdi kha chu Puan-In kotbâi kôla hâlrivâm lanna mâichâm bulah khan a bun riai rang a nit.

¹⁹A thâi murdi kha chu mâichâmah khan a hâl rang a nit.

²⁰Sual ribôlna serâtchal tuai a tho lam angka takin hi khom hih a tho rang a nit. Hingka hin Thiampu khan mipuihei sual ribôlna khah a lan rang a nit; khanchu, an sual khah ingaidam ni tâng a ti.

²¹Khanungchu, serâtchal khah riabuk dâiputiang chôi a ta, ama sual ribôlna serâtchal a hâl lam angka khan a hâl rang a nit. Amahih nam pumpui sual ribôlna ranga thillan ngai rang chu a nit.

²²“Roirêltun thil isual a tho duai a, PUMAPA thupêk â siatin chu,

²³a thil thonsual khah an iril a, a riat suak kaneh, a sual ribôlnan kêlchal, demnaboi a lan rang a nit.

²⁴Kêl lu-ah khan a kut ringat a ta, mâichâm mâr tianga, hâlrivâm thillan an thatna ngai munah khan a that rang a nit.

²⁵Thiampu khan a thisen khah chôi a ta, hâlrivâm thillan mâichâm rikîheiah khan nâl a ta, a bân thisen la om kha chu hâlrivâm lanna mâichâm bulah khan a bun riai rang a nit.

²⁶Khanungchu, a thâi murdi kha chu ringeina thillan a hâl lam angka khan mâichâmah a hâl rang a nit. Khangkah khan roirêltu sual ribôlna, thiampun a lan rang dân chu a nit; khanchu, a sual khah ingaidam ni tâng a ti.

²⁷“Mi narânin thil isual a tho duai a, PUMAPA thupêk â siatin chu,

²⁸a thil isual tho khah a riat suak kaneh kêlpui demnaboi, a sual ribôlnan a hong lan rang a nit.

²⁹Kêl lu-ah khan a kut ringat a ta, hâlrivâm mâichâm mâr tiang pang, hâlrivâm thillan an thatna ngai munah khan a that rang a nit.

³⁰A thisen khah thiampu khan mâichâm rikîheiah khan a kutṭimin nâl a ta, a bân la om murdi kha chu mâichâm bulah khan a bun riai rang a nit.

³¹A thâi murdi kha chu ringeina thillan a lan lam angka takin mâichâmah a hâl rang a nit; amakhah PUMAPA inlôm ngai tak a nit. Khangkah khan thil isual ithotu sual ribôlna khah thiampu khan lan pêk a ta, kha mi sualna khah ingaidam ni tâng a ti.

³²“Sual ribôlnan bera a hong chôiin chu, apui, demnaboi a nit rang a nit.

³³Bera lu-ah khan a kut ringat a ta, hâlrivâm thillan an thatna mun, mâichâm mâr tiangah khan a that rang a nit.

³⁴A thisen khah thiampu khan hâlrivâm lanna mâichâm rikîheiah khan nâl a ta, a bân la om murdi kha chu mâichâm bulah khan a bun riai rang a nit.

³⁵Ringeina thillan bera angka khan a thâi murdi kha chu la riai a ta, PUMAPA zianga bubâl thillan neh khan a hâl rang a nit. Khangkah khan sual ribôlna khah thiampu khan lan pêk a ta; khanchu, a sual khah ngaidam ai nit rang tâk a nit.