Read Biete LEVIDÂN 5 Bible Online

LEVIDÂN 5 - Biete bible

LEVIDÂN 5

¹“Hi thonchâinaheiah hin sual ribôlna lan ai nang a nit. “Roirêl munah thuretua koi khan a thil mu manih a thil riat manih inpuang ranga ti a nit a, ân puang nuam non chu thil isual ai tho a nit; a mo ai pêl rang a nit.

²“Mi tukhomin thil rithiang ino, sa ruak hei, â lian manih, â chîn manih, a boka rivâk chi manih hei a tôn duaiin chu thil isual itho a nit; a thiltho khah a riatsuak kaneh thiamno chang a ta, ani khah a înim a nit.

³“Miriama rithoka suak, thil rithiang ino rêng rêng a tôn duaiin chu a thiltho kha îdik mak iti a riat kaneh rithiang ino ai chang zel a nit.

⁴“Mi tukhomin thil iṭha manih thil ṭhano manih itho rangin ngaituan fel loiin vâni risâm sela, a thiltho khah a riat suak kaneh thiamno ai chang a nit.

⁵“Mîn thil isual a thon chu, a thil isual tho khah ân puang rang a nit,

⁶a thil thonsual lei tuaknan PUMAPA ziangah bera manih, kêl manih, apui, a hong lan rang a nit. Thiampu khan kha mi sual ribôlna khah a lan pêk rang a nit.

⁷“Bera manih, kêl manih a nei non chu a thil thonsual manin PUMAPA ziangah vaṭhu bopka manih, pharvali bopka manih a hong lan rang a nit. Khatkah kha sual ribôlna thillan nîng a ta, a dang khatkah kha hâlrivâm thillana rang a nit.

⁸Thiampu ziangah hong chôi a ta, ani khan sual ribôlna khah a lan masa rang a nit. A lu isat loiin a ring iherkhiak a ta,

⁹a thisen ichînkah kha mâichâm pangah rithe a ta, a dang chu mâichâm bulah khan ân zung vang rang a nit; amakhah sual ribôlna a nit.

¹⁰Khanungchu, a dang khatkah kha dân angkan hâlrivâm thillanin a lan rang a nit. Khangkah khan thiampu khan thil isual ithotu ta rangah khan ribôlna lan pêk a ta, ani khah ingaidam ni tâng a ti.

¹¹“Vaṭhu bopka manih, pharvali bopka manih khom a nei zoi non chu sual ribôlna thillanin baidi ṭha chi herkah a hong lan rang a nit. Oliv riak manih, bero manih a hong ikhop rang ni mak; hâlrivâm thillan ni mak a, sual ribôlna thillan a nit.

¹²Thiampu ziangah hong chôi a ta, ifarua thillan angkan PUMAPA ziangah ilan riai a nit iti entîrnan kut kiangkah isôk a ta, mâichâmah ifarua thillanin a hâl rang a nit. Amakhah sual ribôlna a nit.

¹³Khangkah khan thiampu khan thil isual ithotu ta rangah khan ribôlna lan pêk a ta; ani kha ingaidam ni tâng a ti. Bubâl thillan angkah ngirah khan a hâl bân baidi kha chu thiampu dongtum rang a nit,” a ti a.

¹⁴PUMAPA khan Mosia ziangah rimang rang tlia dânhei a pêk a.

¹⁵“Mi tukhomin PUMAPA dongtum thil rithiang khah peh loiin om duai sela, thil isual ai tho a nit. A thil isual tho manin thillan PUMAPA ziangah bera manih, kêl manih, achal, demnaboi a hong kâi rang a nit, a man zâk chu biak in tangka sût ngai balamin isût rang a nit.

¹⁶Thil rithiang a lei pêk no zâk khah thung a ta; khabanah, a bâk ringaka ṭhena bâkkah a pêk sa rang a nit. Thiampu ziangah pêng a ta; Thiampu khan bera khah siat ribôlna thillanin lei lan pêk a ta, ani khah ingaidam ni tâng a ti.

¹⁷“Mi tukhomin tho loi rang thua PUMAPA thupêk a lei tho duaiin chu thil isual ai tho a nit a, a siatna mo khah pêl a ti.

¹⁸Khante, thiampu ziangah siat ribôlna thillan rang bera manih, kêl manih, achal, demnaboi, a hong kâi rang a nit. A man zâk rang chu biak in tangka sût ngai balamin isût rang a nit. Thiampu khan kêlchal khah siat ribôlna thillanin lei lan pêk a ta; ani khah ingaidam ni tâng a ti.

¹⁹Amakhah PUMAPA chunga a thil thonsual man siat ribôlna chu a nit,” a ti a.