Read Biete LEVIDÂN 6 Bible Online

LEVIDÂN 6 - Biete bible

LEVIDÂN 6

¹PUMAPA khan Mosia ziangah rimang rang tlia dânhei a pêk a.

²“Mi tukhomin a Israel chipuin a zianga thil a înkol hei manih, siakhama a îtung hei manih, pe kîr nuamno ta sela, a ṭhen iru pêkin manih lêm ta sela;

³anitnole, thil rimang hei irût chakkan rût mang itin milakin vâni risâm ta sela,

⁴hingkana thilisual, a îkhom hi tho sela; a thil irûkhei, milaka a thil lâkhei, a zianga sum an înkol ai leprukhei, thil rimang ai rûthei, milaka vâni arsâmna thilhei kha, a rêngkan a thung nôk rang a nit; khabanah khan mun ringaka ṭhena munkah a pêk sa rang a nit. Thilsual ai tho a nit iti imu suak a nit nî a khan â neitu ziangah a pêk rang a nit.

⁶A siat ribôlnan PUMAPA zianga lan rang thiampu ziangah bera manih, kêl manih, achal, demnaboi, a hong kâi rang a nit. A man chu Mun rithianga mang ngai tangka sût ngai balamin isût rang a nit.

⁷Thiampu khan PUMAPA ziangah sual ribôlna kha lan pêk a ta, ani kha ingaidam ni tâng a ti,” a ti a.

⁸PUMAPA khan Mosia ziangah,

⁹“Arona neh a naipahei khah hâlrivâm thillan chungchânga tho rang dânhei iril rangin thu a pêk a. Hâlrivâm thillan chu zântluanin mâichâm chungah, a hâlnaah khan a om rang a nit a, mâichâma mei khah a chok mai rang a nit.

¹⁰Atûkah thiampu khan a pat zâirimi zakorfual khah ihâkin neh pat zâirimi tuman ribunin mâichâmah hâlrivâm thillan kâng rivâmhei khah rût a ta, mâichâm sîrah khan a sia rang a nit.

¹¹Khanungchu, a silbomhei thleng a ta, riabuk dâiputiang mun iserah khan rivut khah a pai rang a nit.

¹²Mâichâma mei kha a chok mai rang a nit, a ramval rang ni mak e. Thiampu khan zîng tin thing tua mai a ta, hâlrivâm thillan khah hâl a ta, amakhan ringeina thillan sathâihei khom khah a hâlrivâm rang a nit.

¹³Mâichâma mei khah a chok mai rang a nit, a ramval rang ni tlak mak e.

¹⁴“Hihei hih bubâl thillan tho rang dân chu a nit: Arona richi thiampu khan bubâl thillan khah mâichâmah PUMAPA ziangah a lan rang a nit.

¹⁵Khanungchu, baidi neh siriak khah ichînkah lâng a ta, bero murdi neh khan mâichâmah hâl a ta, amakhah a rêngkan PUMAPA ziangah ilan a nit iti entîrna a nit. Hi thillan inam hin PUMAPA chu a înlôm ngai a nit.

¹⁶Lan bân kha chu thiampuhei fâk rang a nit. Amakhah chol pol ino bairiamin isiama, Puan-In kottual Mun rithiangah khan ifah rang a nit. Amakhah bubâl thillana rithoka thiampuhei dongtum ranga PUMAPA khan ai pêk a nit. Kha thilhei khah Sual ribôlna neh Siat ribôlna angkana thil iser, rithiang tak a nit.

¹⁸Arona richi ipa murdîn chu fah thei an ti. Amakhah PUMAPA zianga bubâl thillan ata kumkhuaka an dongtum ranga inkung a nit. Mi dang tukhomin kha bubâl thillan khah an va tônin chu arthiangna ritha sika khan an ituang rang a nit,” a ti a.

¹⁹PUMAPA khan Mosia ziangah,

²⁰“Arona richi thiampuhei riak inrithu dân rang a pêk a. Riak inrithu nî sûnin chu PUMAPA ziangah baidi ṭha chi herkah, nîn tina bubâl thillana an lan ngai zâk, zîngah arzâtkah, kholoiah arzâtkah thillanin an hong lan chit rang a nit.

²¹Oliv riak neh met inripola thîrbêla zêi inmin rang a nit a, a lek leka khoi a; khanungchu, PUMAPA inlôm ngai bubâl thillanin an hong lan rang a nit.

²²Arona richi, â nungithûl ranga riak inrithu, Thiampu Laltak khan hi thillan hih a lan rang a nit; amahih kumkhuaka tho dân rang a nit. PUMAPA zianga thillanin hâl inrivâm riai rang a nit.

²³Thiampun bubâl thillana PUMAPA zianga ai lan hih ifah rang ni mak, a rêngkan ihâl vang rang a nit,” a ti a.

²⁴PUMAPA khan Mosia ziangah,

²⁵“Arona neh a naipahei chu sual ribôlna thillan lan dân iril rangin thu a pêk a. Hingka hin sual ribôlna thillan lan rang dân chu a nit: Hâlrivâm thillan rang an thatna ngai mun mâichâm mâr tiangah khan sual ribôlna thillan khom kha PUMAPA maah an that rang a nit. Amahih ribôlna rithiang tak a nit.

²⁶Sual ribôlna lantu thiampu khan Ritongna Puan-In kottual mun rithiangah khan a fâk rang a nit.

²⁷Mi tukhomin kha sa khah a tônin chu arthiangna ritha sika khan ai tuang rang a nit. Îthil khom a thisenin a khianin chu mun rithiangah risûnfâi rang a nit.

²⁸A suangna bêl khah ipil bêl a nitin chu ito khoi rang a nit a, betaka suang a nitin chu inôt infâia, tuia risuh rang a nit.

²⁹Thiampu richi ipa murdîn chu a sa hi fah thei an ti, amakhah thil rithiang tak a nit.

³⁰Nikhomsela, a thisen khah sual ribôlna ranga Ritongna Puan-In sungah ichôi lût a nitin chu a sa khah ifah rang ni mak a; hâl inrivâm riai rang a nit,” a ti a.