Read Biete LEVIDÂN 7 Bible Online

LEVIDÂN 7 - Biete bible

LEVIDÂN 7

¹Hihei hih siat ribôlna thillan tho dân rang chu a nit.

²Hâlrivâm thillan ran thatna ngai mâichâm mâr tiangah khan siat ribôlna thillan khom hi ithat rang a nit a, a thisen khah mâichâm rikhîlkan rithe rang a nit.

³A thâi murdi khah ila suak vang a, mâichâm chungah ilan rang a nit; armei thâi hei, a sung thâi murdi hei,

⁴â bêhei neh â tuamtu thâi hei, â thin lûm iṭhahei khah

⁵Thiampu khan PUMAPA zianga ifarua thillanin mâichâmah a hâl rang a nit. Amakhah Siat ribôlna thillan a nit.

⁶Thiampu richi, ipa murdîn chu kha sa khah fah thei an ta; nikhomsela, thil rithiang tak a nit sikin mun rithiangah khan ifah rang a nit.

⁷Sual ribôlna neh Siat ribôlna thillan hih a lan dân ri-ang seng seng rangin tho dân khatkah bang imang a nit; kha sa khah ribôlna lantu thiampu dongtum a nit.

⁸Hâlrivâm thillana mang, ran vun kha chu ribôlna lantu thiampu dongtum rang a nit.

⁹Khante, bubâl thillan, a urnaa ur inmin ibai hei, thîrbêla zêi hei, bêl indara suang murdihei khah Pathian zianga lei ilantu thiampu dongtum rang a nit.

¹⁰Nikhomsela, bubâl thillan la min ino murdi, siriak neh met inripol manih, â hûl manih khom ni sela, Arona richi thiampuhei dongtum rang a nit, rizât natkan an risem mai ngai rang a nit.

¹¹PUMAPA ziangah Ringeina thillan khah hingka hin ilan ngai rang a nit.

¹²Ringeina thillan khah Pathian zianga lômthu sîrna ranga mîn a hong ilan a nitin chu, mîring a hong lan rualin ibai, chol pol ino bairiam, oliv riak neh imet a thliam isâ anih, oliv riak inâla siam ibai thliam riphân manih, oliv riaka zêi ibai manih a hong lan sa rang a nit.

¹³Khabanah khan chol pol ino ibai lûm ur inmin isai a lan sa rang a nit.

¹⁴Khante, ibai chi dang dang a hong ilan lâia mi a chi kipah khatkah kha PUMAPA ta rangin a pêk rang a nit, amakhah mâichâma sa thisen rithetu thiampu dong rang a nit.

¹⁵Ringeina thillana an hong ilan sa khah lan nî sûn ngêiah khan ifah zoi rang a nit, atûk idênin îte izua rang ni mak e.

¹⁶Ringeina thillan khah ṭonginkung lôntlukna sika manih, ngaihoi thillan manih a nitin chu, ribôlna a lan nî ngêia khan sa khah ifah zoi riai rang ni ual mak, atûkah khom ifah thei a nit.

¹⁷Nikhomsela, fâk bân la om, a sûn thumnî dêna la om kha chu ihâl rang a nit.

¹⁸A sûn thumnî dêna an la fâkin chu Pathianin a thillan khah ipom pêk no nia, â lantu khom khah ai lan angkan ibe pêk ni no nih; kha nêkan thil porinchea be nîng a ti. A fahtu khan a mo chu pêl a ti.

¹⁹A sa khah thil rithiang ino rêng rêng neh artônin chu ifah rang ni mak, meia hâl inrivâm rang a nit. Khante, mi rithiang nona nei inohei khan a sa khah fah thei an ti.

²⁰Khannisela, mi rithiang nona nei puma Ringeina thillan sa khah a fâkin chu kha mi khah a chipuihei lâi ata ṭhângsena vôr rang a nit.

²¹Miriam ata manih, ran ata manih thil inim isuak itôntu khan hi sa hih a fâkin chu kha mi khah a chipuihei lâi ata ṭhângsena vôr rang a nit.

²²PUMAPA khan Mosia ziangah,

²³“Israel mihei kha iril roh: Serât hei, bera hei, kêl hei rêng rêng a thâi khah an fâk rang ni mak.

²⁴Sa a tôta thi manih, ramsa isêa thi manih thâi khah ifah rang ni mak a, thil dangah chu imang thei nîng a ti.

²⁵Tukhom PUMAPA zianga farua thillana an ilan sathâi ifah murdi chu a chipuihei lâi ata ṭhângsena vôr rang a nit.

²⁶Israel naihei chu takmun khomah om sela, sa thisen manih, iva thisen manih, an fâk rang ni mak.

²⁷Tukhom hi dân zôm iloia â khiakin chu kha mi khah Pathian mihei lâiah tepsa khâi ino rang nit,” a ti a.

²⁸PUMAPA khan Mosia ziangah,

²⁹“Israel mihei kha iril roh: Tukhomin Ringeina thillan a hong lanin chu a ṭhen khah ngaihoi thilpêkin PUMAPA ziangah a hong pêk sa ngêt rang a nit.

³⁰PUMAPA zianga farua thillan khah ama kut ngêiin a hong chôi rang a nit. Sathâi neh a lung-er khah hong chôi a ta, PUMAPA ziangah ngaihoi thilpêkin a hong lan rang a nit.

³¹Thiampu khan a thâi khah mâichâmah hâl a ta, a lung-er kha chu thiampu dongtum rang a nit.

³²Ringeina thillanah khan a malpui changtianga khah thiampu ipeh rang a nit. Ringeina thillan sathâi neh thisen ilantu thiampu khan a malpui changtianga khah a dong rang a nit.

³⁴A lung-er khah ngaihoi thilpêk a nit a, a malpui changtianga khah ngaihoi tholôm a nit a, amakhah PUMAPA khan Israelhei ziang ata ila suaka thiampuhei ai pêk chu a nit. Israelhein PUMAPA ziangah Ringeina thillan an lanin a lung-er neh a malpui hih kumkhuakan thiampuhei an hong pêk ngêt ngai rang a nit.

³⁵Hihei hih PUMAPA zianga thilpêka rithoka Arona neh a naipahei, thiampua namindet an nit nunga an dongtum ranga pe chu a nit.

³⁶Riak inrithu-a an om nî-ah khan a nit PUMAPA khan Israel mihei ziangah ngaihoi thilpêk hi an zianga ipeh ngai ranga thu ai pêk a nit. Hi dân hih Israel mihein kumkhuaka an richi suanpâr idêna an hong zôm ngêt rang chu a nit.

³⁷“Khanchu, Hâlrivâm thillan hei, Bubâl thillan hei, Sual ribôlna thillan hei, Siat ribôlna thillan hei, Thiampu serinranna thillan hei, Ringeina thillan hei khah khangkah khan ilan ngai rang a nit.

³⁸Ramchâra Sinai tlângah, Israel mihei thillan rang dân a pêk ṭuma Mosia zianga PUMAPA thupêkhei chu khahei khah a nit,” a ti a.