Read Biete LEVIDÂN 8 Bible Online

LEVIDÂN 8 - Biete bible

LEVIDÂN 8

¹PUMAPA khan Mosia ziangah,

²“Arona neh a naipahei khah ki omna Puan-In kottualah ṭhui inla, thiampu zakua hei, inrithu ngai siriak hei, sual ribôlna rang serâtchaltuai hei, berachal inikah neh chol pol ino ibai khamlukah hong chôi riseh.

³Khanungchu, kha munah khan mipui murdi ribûm rangin koi riai roh,” a ti a.

⁴PUMAPA thupêk angkan Mosia khan a tho a, mipui murdi khah Ritongna Puan-In kottualah khan an hong ribûm a.

⁵Mosia khan an ziangah, “Atûna ki tho rang hih PUMAPA thupêk a nit,” a ti a.

⁶Mosia khan Arona neh a naipahei khah matiang a hong ṭhui a, dân angkan tuirisil rangin â ril a.

⁷Arona khah sunglût zakua hei, zakorfual hei ân hâk a, kongkhit khom ân khit a, Efod ân hâk a, kong khitna enihoi taka khôngah khan a kong a khit pêk a.

⁸Ṭângvêl khah ân vêl a, ṭângvêlah khan Urim neh Thumim khom â khop pêk a.

⁹Lukôm ân kôm a, lukôm matiang pangah khan rângkachak phêk, “PUMAPA ta ranga serinran,” iti riziakna khah â khop a. Khahei khah PUMAPA thupêk angkah takin ai tho a nit.

¹⁰Khanungchu, Mosia khan inrithu ngai siriak khah a lâk a, Puan-In neh a sunga thil iom murdi khah â nôt a, PUMAPA zianga lanin a thâr inrithiang riai a.

¹¹Khante, siriak a ṭhen khah a lâk a, PUMAPA zianga thâr inrithiang nan mâichâm neh a bûrbêl murdihei, tâbor neh â ṭhungna hei khah voi sarikah arthe a.

¹²Inrithu ngai siriak a ṭhen khah Arona lu chungah a buak a, a serinran tâk a.

¹³Khanungah khan Mosian Arona naipahei khah a hong ṭhui a, zakua ân hâk a, kongkhit ân khit a, lukhum ân khum a; khahei khah PUMAPA thupêk angkah takin ai tho a nit.

¹⁴Khanungchu, Mosia khan sual ribôlna serâtchal khah a kâi a, Arona neh a naipahei khan serâtchal lu-ah khan an kut an ringat a.

¹⁵Mosia khan a that a, a thisen ichînkah khah a lak a, a kutṭimin mâichâm rikîheiah khan thâr inrithiang nan a nâl a, a nâl bân thisen la om khah mâichâm bulah khan a bun a, khangkah khan mâichâm khah ai thâr inrithiang a nit.

¹⁶Mosia khan a sung thâi murdihei, â thin lûm iṭha hei, â bêhei neh â tuamtu thâi khah a lâk a, mâichâmah khan a rêngkan a hâl a.

¹⁷A dang murdi kha chu, a vun hei, a sa hei, â rilhei khah a lâk a, riabuk dâiputiang a hâl tâk a. Khahei khah PUMAPA thupêk angkah takin ai tho a nit.

¹⁸Hâlrivâm thillan rang berachal khom khah Mosia khan a hong kâi a, Arona neh a naipahei khan berachal lu-ah khan an kut an ringat a.

¹⁹Mosia khan a that a, a thisen khah mâichâm rikhîlkan arthe a.

²⁰Berachal khah archan chit a, a sungkuahei neh a kehei khah arsûk infâia, a lu hei, a thâi hei, a sa hei khah a rêngkan mâichâmah a hâl riai a, khahei khah PUMAPA thupêk angkah takin ai tho a nit. Hâlrivâm thillan a nit a, hi thillan inam hin PUMAPA chu a înlôm ngai a nit.

²²Khanungchu, Mosia khan berachal dang, thiampuhei namindetna berachal khah a hong kâi nôk a, Arona neh a naipahei khan berachal lu-ah khan an kut an ringat a.

²³Mosia khan a that a, a thisen khah ichînkah a lâk a, Arona kuar changtiang kuarchang a nâl a, â changtiang kutpui hei, a changtiang kepui môr hei khom â nôt pêk a.

²⁴Khanungchu, Mosia khan Arona naipahei khah a hong ṭhui a, an ikuar changtiang kuarchang hei, an kut changtiang kutpui hei, an ke changtiang kepui môr heiah â nôt pêk a, a bân thisen la om khah mâichâm rikhîlka rithe nan a mang a.

²⁵Bera thâi hei, armei thâi hei, a sung thâi murdihei, â thin lûm iṭha hei, â bêhei neh â tuamtu thâi hei, a changtiang malpui hei khah a lâk a.

²⁶PUMAPA ziangah bubâl thillan, chol pol ino bairiam khah khamlu ata khatkah a lâk a; khabanah, siriak neh met inripol ibai khatkah, bai thliam riphân siriak inâl khatkah a lâk sa a, khahei khah sathâi neh sa malpui chungah khan a sia a.

²⁷Arona neh a naipahei kutah a pêk a, anni khan PUMAPA ziangah ngaihoi thilpêkin an lan a.

²⁸Mosia khan khahei khah an kut ata a lâk nôk a, hâlrivâm thillan chungah khan serinranna thillanin mâichâm chungah khan a hâl a. Amakhah farua thillan a nit; â nam khan PUMAPA a înlôm ngai a nit.

²⁹Mosia khan a lung-er khah a lâk a, PUMAPA ziangah ngaihoi thilpêkin a lan a. Amakhah thiampu serinranna berachala rithoka Mosia dongtum chu a nit. PUMAPA thupêk angkah takin Mosia khan tinrêng ai tho a nit.

³⁰Mosia khan inrithu ngai siriak ichînkah neh mâichâma thisen ichînkah khah a lâk a. Arona neh a naipahei chungah neh a silbomhei chungah arthe a. Khaangkah khan Arona neh a naipahei khah an silbomhei neh khan PUMAPA ta rangin ai serinran tâk a nit.

³¹Mosia khan Arona neh a naipahei ziangah, “Ritongna Puan-In kot bulah sa khah suang unla, PUMAPA thupêk angkah takin amakhan namindetna thillan khamlua ibai neh khan fah rei.

³²Sa neh ibai nin fâk bânhei kha chu nin hâl rang a nit.

³³Serinrannaa itho rua murdi arzoi riai mâkah chu Ritongna Puan-In kot bul khah mah loiin sûn sarika sung nin om mai rang a nit.

³⁴PUMAPA thupêk angkan kha thilhei khah nin sual ribôlna rangin vuanah hin kî tho a nit.

³⁵PUMAPA thupêk angka khan sûn sarikah neh zân sarikah Ritongna Puan-In kot bulah khan nin om mai rang a nit. Nin om non chu nin ithi rang a nit. Amakhah PUMAPA thupêk a nit,” a ti a.

³⁶Khanchu, Arona neh a naipahei khan Mosia zianga PUMAPA thupêk murdi khah an tho tâk a.