Read Biete LEVIDÂN 9 Bible Online

LEVIDÂN 9 - Biete bible

LEVIDÂN 9

¹Serinranna sûn sarikah arzoi nî tûk, a sûn iriat nî-ah khan Mosian Arona neh a naipahei khah Israel ruaituhei neh khan a koi a.

²Arona ziangah, “Berachaltuai neh serâtchaltuai demnaboi kâi inla, Serât khah sual ribôlna thillanin neh bera khah hâlrivâm thillanin PUMAPA ziangah lan roh.

³Khanungchu, Israel mihei khan sual ribôlna thillana rang kêlchal hong kâi sela, hâlrivâm thillana rang serâtte kumkah mi neh berate kumkah mi, demnaboi seng seng hong kâi riseh.

⁴Serâtchal neh berachal, Ringeina thillan rang hong kâi sela, bubâl thillan siriak neh met inripol ibai PUMAPA ziangah hong lan sa riseh. Vuanah hin nin ziangah PUMAPA a zuang îlang rang a nit,” a ti a.

⁵Mosia thupêk angkah khan Ritongna Puan-In kottualah khahei khah an hong kâi a. PUMAPA chubai iûn rangin amakhan mipui murdi an ribûm riai a.

⁶Mosia khan an ziangah, “Hihei hih nin tho ranga PUMAPA khan thu nangni ai pêk chu a nit. PUMAPA roinpuina vâr ri-el khah a zuang îlang rang a nit,” a ti a.

⁷Khanungchu, Mosia khan Arona ziangah, “Mâichâmah khan fen la, sual ribôlna neh hâlrivâm thillan khah nangma sual thârna rang neh mipuihei sual thârna rang lan roh. PUMAPA thupêk angkan mipuihei sual ribôlna khah lan pêk roh,” a ti a.

⁸Arona kha mâichâmah a fe a, ama sual ribôlna serâtchaltuai khah a that a.

⁹A naipahei khan a thisen khah an hong chôi pêk a, thisenah khan a kutṭim â chia a, mâichâm rikîheiah khan a nôt a, a bân thisen la om kha chu mâichâm bulah khan a bun suak a.

¹⁰Khanungchu, a thâi hei, â bêhei neh â thin lûm iṭha hei khah Mosia zianga PUMAPA thupêk angkah khan mâichâmah a hâl a.

¹¹Khannisela, a sa neh a vun kha chu riabuk dâiputiang a hâl inrivâm a.

¹²Ama rang bîka, hâlrivâm thillan khom khah a that a, a naipahei khan a thisen khah an hong chôi pêk a, ani khan mâichâm khah arkhîlkan a lei rithe a.

¹³A lu neh a sa danghei khom an hong pêk a, ani khan mâichâmah a lei hâl a.

¹⁴A sungkua hei, a kehei khah arsûk infâi a, mâichâmah a danghei chunga sian a hâl sa tâk a.

¹⁵Kha rizoiin chu mipui thillan khah a lan a. Mipui sual ribôlna thillan kêl khah a that a, ama sual ribôlna a lan lam angka takah khan a lan a.

¹⁶Hâlrivâm thillan rang bera khom khah a lan a, tho dân rang irît lam angka takin ai lan a nit.

¹⁷Bubâl thillan khah a lan a, baidi khah a kutin â sôk a, mâichâmah khan a hâl a. Amakhah zîng tina hâlrivâm thillan lâiah khan ai hâl sa a nit.

¹⁸Mipuihei rang bîka Ringeina thillan, serâtchal neh berachal khah a that a; a thisen khah a naipahei khan an hong pêk a, ani khan mâichâm khah arkhîlkan a lei rithe a.

¹⁹Arona khan serâtchal thâi neh berachal thâi hei, bera rimei thâi hei, a sung thâi hei, â bêhei, â thin lûm iṭha hei khah

²⁰a lung-er chungah a sia a, mâichâmah khan a chôi tâk a.

²¹Mosia ti pêk lam angkah khan a lung-er neh a malpui changtianga kha chu thiampuhei rangin PUMAPA ziangah ngaihoi thilpêkin a lan a.

²²Aronan ribôlna murdi a lan zoiin chu mipui chungah a kut a phar a, ṭhat a vur a; khanungchu, a zuang ṭum tâk a.

²³Mosia neh Arona khah Ritongna Puan-In sungah khan an lût a, an hong suak nôkin chu mipuihei ṭhat an vur a, PUMAPA roinpuina vâr ri-el khah mi murdi chungah a zuang ilang tâk a.

²⁴Voikazelin PUMAPA khan mei â ṭhum a, mâichâma hâlrivâm thillan neh sathâihei khah a zuang kâng rivâm tâk a. Amakhah mipuihein an mun chu an ipâi dur dur a, lingisikin an ibok tâk a.