Read Biete JEREMIA 1 Bible Online

JEREMIA 1 - Biete bible

JEREMIA 1

¹Hi lekhabu hih Benjamin ram sunga Anathot khuaa thiampuhei lâia khatkah, Hilkia naipa Jeremia thusîr chu a nit.

²Judai ram rêng Amona naipa Josia inlal kum sômleiithumna kumin Jeremia ziangah PUMAPA thu a zuang tlung a.

³Josia naipa Jehoiakima rêng chang lâi khomin a zuang tlung ngai a, Josia naipa Zedekia inlal kum sômleikhatna, a thla ringanaa Jerusalem mihei suaka an ṭhui idênah khan PUMAPA thu chu Jeremia ziangah a zuang itlung a nit.

⁴PUMAPA thu chu ki ziangah hingka hin a zuang tlung a:

⁵“Pum sunga nang ki siam ma khomin nang ki riat a, sûl ata ni suak ma khomin nang ki serinran tâk a, nam tinhei zianga zânthla rangin nang ki înkung tâk a nit,” itin.

⁶Keiman ki sâm a, “O, Tinrêngthothei PUMAPA, naipangte pai ki nit a, thusîr khom thiam mang,” ki ti a.

⁷Khanniseh, PUMAPA khan ki ziangah, “Naipangte pai ki nit riti no roh, nang ki tirna mi murdi ziangah fen la, thu nang kî pêk murdi ne sîr rang a nit.

⁸Anni chu ṭi no roh, ni ziangah om ki ta, nang ikuaminzôk mai ki ti, Keimah, PUMAPA hin kî ti a nit,” a ti a.

⁹Khanchu, PUMAPA khan a ne ban a, ki mûr a hei tôn a, ki ziangah, “Ringai roh, ni bâiah ki thuhei kî sia tâk a nit.

¹⁰Vuanah hin namhei neh rêngram chungheiah thuneina nang ki însil a nit. Iphâi suak rang hei, ṭhetisim rang hei, isehchit rang hei, inlîr rang hei, sin inding rang hei, iphun rang hein,” a ti a.

¹¹PUMAPA khan ki ziangah, “Jeremia, im ni mu?” a ti a. Keiman, “Almon thing iṭang ki mu,”[1] ki ti a.

¹²PUMAPA khan ki ziangah, “Ni mu indik, ki thuhei ilen suak a nit theina rangin kî en ṭian kêng ai nit,” a ti a.

¹³PUMAPA khan â tharin ki ziangah, “Im a dang nî mu sa a la om im?” a ti a. Keiman, “Mâr tiang bêl ritlok nguan nguan ki mu a, hi tiang a zuang îlêt lôk lôk a nit,” ki ti a.

¹⁴PUMAPA khan ki ziangah, “Hi ram sunga om murdi chungah mâr tianga rithokin siatchitna hong ithlun ki ta;

¹⁵mâr tiang ram nam tin tinhei koi bûm ki ti. An rênghei hong an ta, Jerusalem kulbanghei ihualin, a kotbâiheiah an rêngṭhungmun dông an ta, Judai ram khopui danghei khom hual sâng an ti.

¹⁶Ki mihein pathian danghei ziangah ribôlna lanin an ne phial a, an kutsuak mirmil chubai an ûn a, thil isual an tho tâk sikin anni chu kuttum kî tho rang a nit.

¹⁷Atûn risiam roh, Jeremia; ni kong khit inla, thu nang kî pêk murdi chu isîr roh. An makungah indôp no roh; khanonchu, an makungah thâiindôpin nang kî siam rang a nit.

¹⁸Ringai roh, Jeremia, hi rama mi murdi Judai ram rênghei, ruaituhei, thiampuhei ram mipuihein nang an idoi rang a nit. Khan vuanah hin keiman anni idan theina rang râtna nang kî pêk a nit; khopui kul idet tak inei, thîr chopui neh sumsen bang inei angkah nîng ni ti. Nang inê thei no nih, ni zianga omin, nang ki îkuam inzôk mai rang a nit. Keimah, PUMAPA hin kî ti a nit,” a ti a.