Read Biete JEREMIA 10 Bible Online

JEREMIA 10 - Biete bible

JEREMIA 10

¹Israel mihei o, PUMAPA khan nin ta ranga thucha ai nei hih lei ringai rei.

²PUMAPA khan hingkan a ti: “Nam danghei om dân la no unla, Rivâna thil danglam nin imuhei ṭi no rei, Nam danghein kha thilhei khah ṭi ngai khom seh, Nangni chu ṭi no rei.

³Hi mihei sakhua hih mangmunboi a nit, Rampuia thing an lâk a, Kutithiamin mangrua dang dang imangin a sin a,

⁴Tangkarua neh rângkachakin a vo a, Amakhah a tlâk[20] nona rangin â kilnan a îkil indet ngai a nit.

⁵Ama angkana mirmilhei kha chu chimu bila vaṭi angkah hi a nit a; Ṭong thei mak a, ilôn khom lôn thei mak a, Miriamin ithon an inang a nit. Khahei khah ṭi no rei; Nangni innah thei no nia, Thil iṭha khom nangni tho pêk thei no nih.”

⁶O PUMAPA, nangma angkana hih tute zel omak e; Tinrêngthotheia ni nit a, Ner ming chu a roinpui a, sin ai tho thei a nit.

⁷Nam tinhei Rêngtak, tûm nang a chôiinrisâng ino ranga? Chôiinrisângna chu ni dong rang pial a nit. Nam tina mi vârhei lâiah neh an rênghei lâiah, Nangma angkana tute zel hi omak.

⁸An rêngkan an intlôkin an învêt a nit, Thing mirmila rithokin im an risei thei ranga?

⁹Tarsisa rithokin tangkarua suk inphêk an hong chôi a, Upaz rama rithokin rângkachak, Kutithiamhei neh rângkachak inluan ithiamhei kutsuak an mirmil khah, Puan dumpôl neh senduk an insil a, Khahei murdi khah kutithiamhei kutsuak ringot a nit.

¹⁰PUMAPA, nang chu Pathian dik ni nit a, Pathian iring neh kumtluang rêng ni nit. Ni ning â murin chu rammual â nîng a; Namhein ni ningthik tuang zoi ngai mak.

¹¹(Nangmani ngêiin annihei chu hingkan nin iril ngêt rang a nit: Hi pathian, rinêng neh rivân isiamtu ninohei hi chu isehchit nîng an ta, hi rinêng chungah hin tak munah khom imu ni khâi no nih.[21])

¹²PUMAPA khan a sinthotheinan rinêng a siam a; A vârnan rammual ân ding a, rivânhei ai kâiphar a nit.

¹³Thu a pêk a, rivâna tuihei chu â rî vung vung a; Kôlkomonga rithokin sûmhei a hong chôi a. Rua sûr kârah khothlâr ân rilek a, A siana muna rithokin phâivua ân râng ngai a.

¹⁴Hihei hih an mun chu miriamhei khan, Inmôl neh riatna nei ino an nit iti an riat a; Mirmil isiam ngaihei chu an izak tâk a, An pathian siamhei khah a lem, ringna nei ino an nit a.

¹⁵Lutna nei ino, musit iom tak an nit, PUMAPA a zuang tikin chu rimang vang an ti.

¹⁶Jakoba Pathian chu hihei angkah hi ni mak; Ani chu tinrêng siamtu a nit a, Israel khom a dongtum nam an nit. Arming chu Tinrêngthothei PUMAPA a nit.

¹⁷Jerusalem mihei o, nin ram imah rangin nin neinunhei siam infel ta rei, rihual khapin nin iom tâk a nit.

¹⁸Hi ram sung ata hih PUMAPA khan nangni ai ûmisua rang a nit a, nin suak riai mâkah chu nangni a îpotsuak rang a nit. PUMAPA khan ai ti a nit.

¹⁹Jerusalem mihei chu an ikhêk suak a, “Ei nat vang na! Ei sâbe chu indam thei ni khâi mak. Ei ituang zoi rang manih ei lei son ngai a.

²⁰Ei puan-inhei chu a siat a, Ân detna ruihei chu a chat zoi tâk a. Ei naihein an ne mâk zoi tâk a, Ei Puan-inhei inding rang tute om khâi mak a, A puanhei kâiphar rangtu khom om khâi mak,” an ti a.

²¹Keiman ki sâm a, “Ei ruaituhei an intlôk a; PUMAPA ruaina ngên nachâng khom reh mak e. Khasikin, lo an sam a, ei mihei an irthekindar tâk a nit.

²²Ringai ta u, thu a zuang tlung e! Mâr tianga mihei ribûm khôm thu chu, Judai ram khopuihei inram riai a, Sihalhei lêngna muna siam rangtuhei chu,” ki ti a.

²³O PUMAPA, tute mahni ringna chunga thunei omak iti ki riat tâk a; Tutên mahni om rang dân rêl thei mak.

²⁴O PUMAPA, ni mihei isôi roh; Khanniseh, châng inrum rai non la, Ni ningthikin kuttum ne tho no roh; Khanonchu, kin mongna a nit duai lôiin.

²⁵Nam dang, nangmah reh ngai ino neh, Ner ming rilam ngai inohei chungah ni ningthikna chu iṭhum roh. Ni mihei an that a, an inrimang vang a, Kin ram khom â ramin an imâk tâk a nit.