Read Biete JEREMIA 11 Bible Online

JEREMIA 11 - Biete bible

JEREMIA 11

¹PUMAPA khan ki ziangah hingka hin a ti a:

²“Hi thuthlung thuhei hih ringai unla, Juda mihei neh Jerusalema omhei iril rei.

³Keimah, PUMAPA Israelhei Pathian hin hi thuthlung thu zôm inohei chu vânisalna an chungah ki irngat ṭian tâk a nit.

⁴Ama thuthlung hih an chibulhei Aigupta ram, thîr hâlinzôina meikuang angkana ram ata ki ṭhuisua nî-a anmani neh kî siam a nit. Ki thu zôm rang neh an zianga ki thupêk murdi an sinin chu ki mihei nîng an ta, kei khom an Pathian nîng ki ti, iti ki îril a nit.

⁵Khaangkan ram richong neh â ṭha atûna an ilua tâk hih, an chibulhei zianga ki ṭonginkung ilenin anni chu kî pêk tâk a nit,” a ti a. Keiman, “Amen PUMAPA,” itin ki sâm a.

⁶Khanchu, PUMAPA khan ki ziangah, “Judai ram khopuiheiah neh Jerusalem kotsuaheiah fen la, ki thucha inpuang inla, mipuihei chu thuthlung thuhei ringaia izôm rangin iril roh.

⁷An chibulhei Aigupta ram ata ki ṭhuisua nî-a rithoka vuani tenah hin anni chu ṭhatnemringai takkan ki ngo a, ki thu zôm rangin ki lei hong îril mai ngai a nit.

⁸Nikhomsela, ringai nuam mak a, zôm nuam mak e. Tuklul ilian takkan sûn tin sual an lai sin mai a nit. Ki thupêk an zôm nuam no sikin Thuthlunga vânisalna kha an chungah ki îthlun tâk a nit,” a ti a.

⁹Khante, PUMAPA khan a ti nôk a, “Juda mihei neh Jerusalema omhei chu ne doiin an inrual a.

¹⁰An chibul, ki thu ringai nuam inohei sualnaah khan an kîr a, pathian danghei izuiin an sinhei an tho a, Israelhei neh Judahei khan an chibulhei neh thuthlung kî siam kha an îsiat tâk a nit.

¹¹Khasikah khan Keimah, PUMAPA hin an chungah siatripna zuang iṭhum ki ta, zôk thei tlak no nih iti hih ki înriat a nit. Iṭangpui ranga an ne sam tik khomin ringai pêk no ning e.

¹²Judai ram khopuia mihei neh Jerusalema omhei khan, an pathian, namhoi an ilan pêk ngaihei chu ipunin ṭangpuina ngên an ta; khanniseh, an chungah siatripna a zuang tlung tikin chu ṭangpui thei no nih.

¹³Juda mihei chu an khopui nei tam dôrkah pathian khom an nei intam a, Jerusalema omhei khomin itiriom Baal pathian zianga ribôlna rang mâichâm, Jerusalem kotsua tam dôrkah an înding a nit.

¹⁴Jeremia, hi mihei hih ṭongṭai pêk non la, an ta rangin ngên pêk no roh. An chungah vânduaina a zuang tlung tikin nê sam khom sela, ringai pêk no ning e,” a ti a.

¹⁵PUMAPA khan, “Ki lungthlunghein thil ṭhanohei an tho mai pumin ki Tempilah dongtum im an nei khâi rang tâk a? Ṭonginkungna neia ribôlna sa an ilanhei khan siatripna zuang itlung ranga rithokin a înzôk thei rang mani? Pualoi sin itho mai pumin an ilôm thei rang mani?

¹⁶Oliv thing enihoi, irâ nuam tak itin ki lei koi ngai a; khan atûn chu, khuarî irî vung vung angkana natinsat meipuin a nâhei chu hâl ki ta, â ṭanghei chu ikhiak vang ki ti.

¹⁷“Keimah, PUMAPA Tinrêngthothei hin Israel neh Juda chu kî phun an nit a; atûn chu vânduaina an chungah ki înpuang tâk a nit. Sual an sin a, Baal ziangah ribôlna lanin ki ning an inthik sikah khan anmani ngêiin an chungah siatna an îthlun a nit,” a ti.

¹⁸Keimah ne doia ke râlhein an ne phiar thu khah PUMAPA khan a ne ril a.

¹⁹Kei chu berate lungringam tak ithat ranga an iṭhui angkah ki nit. Keima siatna rang thil ṭhanohei an iphan a nit iti reng kî riat ino a nit. “Thing chu â râ pumin iphûr ei ta, that ei ta; khanchu, arming khom tutên an iriat mai khâi ino rang a nit,” an ti a.

²⁰Khanungchu, ki ṭongṭai a, “Tinrêngthothei PUMAPA, nang chu roirêltu dik ni nit a, mihei lungril neh ngaituana ni enfia ngai a. Ki chungchâng thu hih ni kutah ken kol a, hi mihei chunga phuba ni lâk chu nen mu roh,” ki ti a.

²¹Anathot mihein ithata kî om an nuam a, PUMAPA thucha ken puang maiin chu an ne ithat rang a nit iti khom an ne ril a.

²²Hi sikah hin PUMAPA Tinrêngthothei khan hingkan ai ti a nit: “Anni chu kuttum thông ki ti, an tlangvâlhei chu ridoina munah thîng an ta; an naihei khom vonṭâm ituangin an ithi rang a nit.

²³Anathot mihei chunga vânduaina ke thlun rang zoro ki rêl diam tâk, a zuang tlung tenan chu tute â dam suak om no nih,” itin.