Read Biete JEREMIA 12 Bible Online

JEREMIA 12 - Biete bible

JEREMIA 12

¹“O PUMAPA, ni chungah riphun mai ngai khom inlang, Nang chu ni îdik ngai a nit. Khanniseh, ni roirêl dân hi nang ki irdon a nit, Îtho rang im mi pualoihei vângisak takkan an iom a; Mi dik inohei lo an itluk ngai.

²Anni chu ni phun a, rizung an lâk a; An hong thuar a, an hong irâ ngai a. An bâiin nang an inpâk a, An lungril rêkin chu nang a lat vit a.

³O PUMAPA, nangman kei chu ni ne riat a, Ki sintho khom ni mu a, Lung nang ki thlungzia khom hi nî mu riai a nit. Mi pualoihei hih bera that rang angkan kâisuak inla; That zoro a tlung mâkah khuap khap roh.

⁴Itena sôt im kin ram chu inchârin, Mun tinah loisûlhei chu ai thêm rang tâk? Kin mihei sualna sikin ramsahei neh ivahei chu an rimang zoi a, Kha mihei khan, ‘Ei omdân hi Pathianin mu viat mak e,’ an iti ngai.”

⁵PUMAPA khan, “Jeremia, miriam iluan nang an rizûl insôlin teh, Sakorhei vânga teh itenâm risiakpui thei ni ta? Mun ihoia lua ne ding indet thei noa a nitin teh, Jordan rampuiah vâng teh ingkam ni tho rang tâk?

⁶Nen zirpui, ni insungkua mihei ngêiin nang an phiar a, Nang idoiin thu an înrual a nit. Iṭha takkan nang an risônpui khomin anni chu iam no roh.”

⁷PUMAPA khan hingkan a ti: “Israel chu ki mâk tâk a, Ki nam rithlang chu kî heng tâk a nit. Ki lungthlunghei chu an irâlhei kutah kî pêk tâk a nit.

⁸Ki mi rithlanghein an ne doi a; Rama sakeibaknei angkah takin an ne râm khum a, Khasikah khan anni chu kî nel a nit.

⁹Ki mi rithlanghei chu iva angkah an nit, Kil tinah rimuhein an ridîp ṭian mai a. Ramsahei koi bûm unla, an sa chu hong fah riseh.

¹⁰Ram dang roirêltuhein ki grep rikul an isiat a, Ki loihei chu an chîlpol neng tâk a; Ki ram enihoi tak chu ramchârin an isiam tâk a nit.

¹¹Ram iṭôlin an siam tâk a, Ki makungah irong vang kan a om tâk a. Ram pumpui chu ramchâr a chang tâk a, Tutên donsui khâi mak.

¹²Ramchâr tlângram khêl tianga rithokin rûntu an ihong tâk a nit. Ram pumpui isehchit rangin ridoina ki tir tâk a; Tute rithla ringamin om thei khâi no nih.

¹³Ki mihein bu an tu a; khanniseh, loisûl an ritikbûm a; Sin an takritâi tak tak a, kutpâr izui khomin îte mu ual mak a Ki ningmur rikhêl tak sikah khan an chimu ai vâng thei khâi ino a nit.”

¹⁴PUMAPA khan, “Israel kôlvêla om, ki mi Israelhei ram kî pêk isehchittuhei chungchângah hin iti rang kî nei a nit. Kha mi sualhei kha thing arzunga phâi paih angkah hin an rama rithokin kâisuak ki ta, an kuta rithokin Juda insungkuahei chu sanisuang ki ti.

¹⁵Khan ki kâisuak zoi nungah khan lung inkham nôk ki ta; nam tin anmani mun neh ram chitah ṭhui ikhîr nôk ki ti.

¹⁶Ki mihei chu Baal riming ichinga ṭonginkung an lei inrisei ngai a, kha angkah takin, ‘PUMAPA, â ring mai riming ichinga ṭonginkung’ an risei tikah ki mihei om dân zui an ta, an lâiah ṭang sa tâng an ti.

¹⁷Nikhomsela, â zôm nuam ino nam murdi chu kâisuak ki ta, inrimang vang ki ti. Keimah, PUMAPA hin ki ti tâk a nit,” a ti a.