Read Biete JEREMIA 13 Bible Online

JEREMIA 13 - Biete bible

JEREMIA 13

¹PUMAPA khan vâ fe a, ki ta rang diar puan riphânhei richo a, diar ikâi a, tuia khom ichia loi rangin a ne ril a.

²Khanchu, PUMAPA thupêk angkan puan riphânhei chu ker chôk a, ki kongah ki vong tâk a.

³Khante, PUMAPA khan a ne sôn nôk a,

⁴“Eufratis vadungah fen la, khantaka lungrikua kârah khan ni diar kha thup roh,” a ti a.

⁵Khanchu, PUMAPA ne ril lam angkah takin ki fe a, ki thup tâk a.

⁶Zoro sôt zanka nungah chu PUMAPA khan Eufratis vadungah ife a, ki diar thup kha ilah nôk rangin a ne ril a.

⁷Khanchu, Eufratis vadungah ki fe nôk a, ki thupna mun kha ki zong a, ki mu nôk tenan chu puan kha ki lâk suak a, khan a lei mon riai tâk a, â mangna rang zel om khâi mak a.

⁸Khanungchu, PUMAPA thu ki ziangah a zuang tlung nôk a,

⁹“Hingkah takah hin Judahei ripâkna neh Jerusalem risongna chu ki înboi rang a nit.

¹⁰Hi mi pualoihei, ki thu ringai nuam loi a, tuklul iliana om ngai, pathian dang sinithoa chubai iûn ngaihei hih hi diar puan mangmunboi angkah hih nîng an ti.

¹¹Min diar an konga an ikâi ngit ngai angkan Israel insungkua neh Juda insungkua murdi ki zianga om ngit rangin neh nen pâka ne chôiinrisâng rangin ken kung a, khan ki thu zôm nuam mak,” a ti a.

¹²PUMAPA Pathian khan, “Jeremi, Israel mi murdîn uain kola murdi uain sung insip rangin iril roh. Anni khan ni ziangah, ‘Kola murdi uain thun insip rang iti hih kin iriat ino mani?’ an tin chu,

¹³hingkah hin iril roh, ‘Amahih PUMAPA thu chu a nit. Hi rama om, Davida rêngṭhungmun iluatu rênghei, thiampuhei, zânthlahei neh Jerusalema om murdihei chu an inrui chit mâkah uain ki în-in rang a nit,’ iti hih.

¹⁴Khanungchu, an rêngkan inrisik ki ta, pa neh naihei khom inrisik ki ti. Lungkhamna, khorngaina neh lungthlungna ṭang riak iloiin ki înrimang rang a nit,” a ti a.

¹⁵Israel mihei o, PUMAPA thu sîr hih ringai unla, Risong no unla, nin ringaiintlôm rei.

¹⁶PUMAPA nin Pathian hi chôiinrisâng rei, Izîng a zuang ithlun a, itlângheiah izînga nin ibâ mânah hin; Ivâr nin ngâkmo a; khanniseh, zîng richel tak chang a ti. 1

¹⁷Amahih nin ringai nuam non chu, Nin risongna sikin idâirek kan ṭap ki ti; Ṭap ngûi ngûi ki ta, ki mitrithli luang zun zun a ti. PUMAPA mihei chu suaka tâng ranga ṭhui an nit tâk sikah khan.

¹⁸PUMAPA khan ki ziangah, “Rêng neh a nu [22] chu an rêngṭhungmun ata zuang iṭum rangin iril roh, an rênglukhum roinpui chu an lu ata ilîp pai ai nit rang a nit.

¹⁹Sim tianga Judai ram khopuihei chu an rihual khap tâk a, suak theina rêng rêng om khâi mak. Juda mi murdi suaka ṭhui rangin an man a, an ṭhui riai tâk,” a ti a.

²⁰Jerusalem, thlîr inla, en roh. Ne râlhei chu mâr tianga rithokin an zuang e. Ni enkol ranga ni kuta inkola om ni irsongpui ngai ni mihei kha takâm an iom tâk?

²¹Rualṭhaa ni nei ngai mihei khan nang irûnin ni chungah roirêl sela, im ni ti rang tâk? Nupang naiha isê angkah takin ina nî tuang rang a nit.

²²Îtho sika hihei hih kî tuang im ai nit iti lungrilin ni tin chu, ni sual sika a nit. Ni puanvêl nang an lîm pêk a, nuam ning nang an ilo a nit tâk.

²³Ethiopia mi dukin a vun indanglamin, keiârsin a zia mah thei a tîm a? Khaangkan, nangni thil isual itho ngaihei hin thil iṭha nin itho thei rang mani?

²⁴Ramchâr ithlîn farsi ai sêm inlêng ngai angkan PUMAPA khan nangni thekindar a ti.

²⁵Amah nin ringil a, pathian lemheiah nin ringat tâk sikin amahih nin rangtum inih rangin a lei ti thlâm tâk a, nin chungah ithlun rangin a înkung tâk a nit.

²⁶PUMAPA ngêi khan ni puanbomhei lîm vang a ta, [23] izak takkan nang siam a ti.

²⁷Inrê ni râtziahei, ni hoiinhâi irîhei, izak nachâng rêng rêng reh loia ner zuarziahei a riat a, sakor chalin apui ai zui ngai angkana sanong pathianhei itlângah neh phâiheiah ni zuizôp ngai tliahei nang ai mu vang a nit. O Jerusalem, ni chung ân khôk vang na! Tik tenan im ni la irthiang nôk rang tâk na?