Read Biete JEREMIA 14 Bible Online

JEREMIA 14 - Biete bible

JEREMIA 14

¹PUMAPA khan khokang chungchângah hingkan ai ti a nit:

²“Judai ram khan a tuang a; A khopuihei chu ai ram thiai tâk a nit, A mihei chu ngaiinsian rinêngah an ibok a, Jerusalem chu â san rang izongin a îkhêk a nit.

³Mi richonghein an suakhei tui ichôi rangin an tir a, Tuikuangah an fe a; khanniseh, tui mu mak a, An tuibêlhei â rongin an hong kîrpui nôk a, Izak neh beindong takkan an mâihei kha an rikhû a.

⁴Ram sungah ruatui a sûr no sikin rinêng a kak zoi tâk a, Loi ineituhei an ilung a zîng a, an luhei an irkhû tâk a nit.

⁵Sazukpuiin a lêngna mualah, Sûl iring a om khâi no sikin a te a suak let kha a mâk rak a.

⁶Itlâng ichârah ram sakuartunghei an iding a, Sihal angkan an rithuak huan huan a; Sûl iring ipet rang an mu khâi no sikin an mit â vâi zoi tâk.

⁷Ki mihei chu ki tiang an ikhêk suak a, ‘Kin sualnahein mualphoi ne sak khom seh, PUMAPA, ni ṭonginkung angkan ne ṭangpui roh, Voi izâkah ni ziang ata kin rot tâk a; Ni chungah kin îsual tâk a nit.

⁸Nangmah bang hih Israelhei rinpui ni nit a, Lungzîng lâia nen zôktu chu nangmah bang hi ni nit. Îtho sik im kin ramah hin khualinzin, Zânkah riak angkah banga nî om hi?

⁹Ithôm lungâminvâi mêl riputa, Mi san thei ino mi rât nî ang tâk hi? A dik takkan, PUMAPA, kin ziangah ni om a, Ni mihei kin nit a, ne mah tlak no roh,’ an ti a.”

¹⁰Hi mihei chungchâng hih PUMAPA khan hingkan a ti: “Ki ziang ata rô hih an nuam tak tak a, an irdîn thei tlak ino a nit. Khasikin, an chungah ke lung tluk mak a, an thil thonsualhei chu ki riat mai a, an sual sikin anni chu kuttum thông ki ti.”

¹¹PUMAPA khan ki ziangah, “Hi mihei iṭangpui rangin ne ngên no roh.

¹²Bu ngei khom sela, iṭangpui ranga an ikhêk rôl kha ringai pêk no ning; an hâlrivâm thillan neh an bubâl thillanhei sikah khan an chungah lôm ual no ning e. Anni chu khandaihei, iṭâmhei neh ripuihein ki înrimang riai rang a nit,” a ti a.

¹³Khanungchu, keiman, “O Tinrêngthothei PUMAPA, zânthlahei khan mipuihei ziangah, ‘Ridoina manih, iṭâm manih khom om no nih, hi ramah hin rithla ringamna bang om a ti,’ itin an înpuang a nit a,” ki ti a.

¹⁴Khanniseh, PUMAPA khan, “Kha zânthlahei khan ker mingin milak thu an iril ngai a nit; anni chu kî tir ni mak a, thu khom peh mang a, an ziangah ṭongbâika lua ki îsîr ino a nit. Inlârna thu an irilhei khah ki ziang ata ni mak a; anmani iphuatot thuhei nin ziangah an înpuang ngai a nit.

¹⁵Khasikin, keimah, PUMAPA hin ker minga thu sîr a, ‘Hi ramah hin ridoina neh iṭâm tlung no nih,’ ititu zânthlahei chu kî tir ni mak iti nangni ki îril a nit. Kha angkana zânthlahei kha chu khandai neh iṭâmin that ki ti.

¹⁶An thuril lei ipomtuhei khom kha Jerusalem kotsuaheiah khan khandai neh iṭâm ituangin idal riai an ta, tutên an ruak kha phûm no nih. Khangkana thil khah an nupuihei, an naipahei, an nainuhei chungah khom zuang tlung a ti. An sual sikin siatna natinsat tak an chungah ki îthlun rang a nit,” a ti a.

¹⁷PUMAPA khan ker ngaisiat thu mipuihei zianga iril rangin thu a ne pêk a: “A sûn a zânin ki mitrithli luang mai sela, hûl khâi no riseh. Ki mihein popliam natinsat tak an tong tâk a, An inat ok tâk a nit.

¹⁸Dâiputiang ki fe lakin ridoinaa mithi ruak itam takka ki mu a; Khosungah ki lût lakin voniṭâma thi mipui ki mu a. Zânthlahei neh thiampuhei ilua khomin an iriat ngai ino ram an pan tâk.”

¹⁹PUMAPA, Juda chu nî heng phar tâk mani? Ziona khom nî nel tâk mani? Dam thei loi rak rangin ithôm ni ne înnat hi? Thlangamna kin tûng a, khan thil iṭha îte tlung mak a; Indamna kin tûng a; khanniseh, thlavâina bang a tlung lem tâk.

²⁰O PUMAPA, ni chungah kin isual iti kin riat tâk; Kin chibulhei sualnahei khom kin riat a, Ni chungah kin îsual tak tak a nit iti kin înpuang a nit.

²¹Ni ṭonginkunghei kha remai inla, ne musit non la; Jerusalem chungah hin mualphoina ithlun no roh. Ni rêngṭhungmun roinpui tak omna Jerusalem chu mualphoi sak no roh. Kin zianga ni thuthlung remai inla, iseh no roh.

²²Nam dang pathianhei khan rua insûr thei mak a; Rivân khomin a khâtin rua insûr thei mak. O PUMAPA, kin Pathian, nangmah bang hi kin ringatna ni nit a, Hi thil murdihei ithotu chu nangmah hi ni nit.