Read Biete JEREMIA 15 Bible Online

JEREMIA 15 - Biete bible

JEREMIA 15

¹Khanchu, PUMAPA khan ki ziangah, “Mosia neh Samuela khom ki makungah hi mihei ta rangin hong idingin, hong ngên khom seh, ringai pêk ual no ning. Ki makung ata Juda mipuihei chu ûmrizûl unla, ki mitmu ata hi ûm pai rei.

²‘Taktiang im kin pan rang’ itia nang an ridonin chu nang ke ril lam angkan ti pêk roh: “Ṭhenkah chu ripuiin an ithi rang an nit a, Amakhah an panna rang chu a nit. Ṭhenkah chu ridoinaah an ithi rang an nit a, Amakhah an panna rang chu a nit. Ṭhenkah iṭâmin an ithi rang an nit a, Amakhah an panna rang chu a nit. Ṭhenkah suaka ṭhui rang an nit a, Amakhah an panna rang chu a nit.

³Keimah, PUMAPA hin an chunga tlung rang thil inrît ilikah ki înkung chu hihei hih a nit: Ridoina munah ithat nîng an ta; an ruakhei chu uihein kâinâl an ta; ivahein fâng an ta, an fâk bânhei kha ramsahein fâng an ti.

⁴Jerusalema Juda rêng Hezekia naipa Manasea thiltho sikah khan rammual pumpuia mihein inrît rikhêl an ti rangin anni chu kî siam rang a nit.”

⁵PUMAPA khan, “Jerusalem mihei, tûm lung nangni inkham a, Tûm nangni ṭâ rang tâk? Im nin thurchi tâk itia ingîr riaia nangni ridon rang tâk?

⁶Nangmanin nin ne heng a, Nung nin ne song tâk a. Khasikin, nin chungah kut kî tlâk tâk a nit. Ki ningthik iṭhuai mai khâi [24] no ning e.

⁷Ram sunga khotinah khan farsi angkan nangni kî zâp a nit. Nin sualhei nin rilet no sikin ki mihei chu nangni that inrimangin, Nin naihei khom kî that inrimang a nit.

⁸Tuipui rikama ṭiai nêka tamin nin ram sungah numei an iom a nit. An ṭhat lâi takin tlangvâlhei [25] chu ki that a, An nuhein an ituang a nit. Voikazelin beidongna neh lungzîngna an chungah ki îṭhum a nit.

⁹Nai sarika chân tâk nu chu arzal neng tâk a, Arthuakkah bang a om tâk a, A sûn ivâr chu izîng richel takin arlet a; A mualinphoi a, a bei a dong tak tak a. A la dam isunhei khom nin irâlhei ki înthat rang a nit. Keimah, PUMAPA hin kî ti tâk a nit,” a ti a.

¹⁰Ingkana lungkham iom kî nit rai tâk im na! Îtho ranga ki nu hin hi rammualah hin a ne zuang inei tâk im ai nit? Ram sunga mi tin neh ringoa rikhal mai a nang a. Mi inritâng mang a, kei khomin ritâng mang a; nikhomseh, mi tinin vâni an ne sâm a.

¹¹PUMAPA, ni sin iṭha takkan kî tho a nit no a, ke râlhein buaina neh lungzîngna an tong zoron an rithûlin ni ziangah kî ngên pêk ngai ino a nitin chu an vânisâmhei chu ki chungah tlung riseh.[26]

¹²(Mi tu khomin thîr, mâr tianga thîr,[27] chik ipol chu ikhiak thei no nih.)

¹³PUMAPA khan ki ziangah, “Ki mihei khan a ram puma an isualna sikin, an richongna neh an thil ilu murdihei chu irâlhei itirin ki înrithak pêk vang rang a nit.

¹⁴An iriat tlak ngai ino ramah khan an irâlhei sin itho rangin siam ki ti. Ki ningthik chu mei angkan chok a ta, kumkhuakan kâng a ti,” a ti a.

¹⁵Khanchu, keiman, “PUMAPA, nangman nî riatinfel vang a nit. Ne remai inla, ne ṭangpui roh. Nen tuangtuhei chungah phuba nen lan la, an ne that theina rangin an chungah ne lung dil pêk no roh. Nangma sikin ingo kî tong a nit iti remai roh.

¹⁶Ni ne sôn a, ki zianga ni ṭongbâi suak murdi kî zôm a nit. PUMAPA, Tinrêngthothei Pathian, ni ta ki nit, ni thuhei chu ki lômna, ki lungril inlômtu tak a nit.

¹⁷Hoiinhâihei lâiah ki zoro mang inhek mang a, an râifânna khom itlângpui mang e. Ni thupêkhei izômin mahni khât bangin ki om a, ningthiknan kî sip a nit.

¹⁸Îtho sik im ki natna a dam thei no? Îtho sik im ki sâbehei hih indam thei ino ai nit? Îtho sik im ai dam ino rang? Nang chu ki ta rangin vatedung itûng rang iboi, ṭhâla kang nôk zel ngai angkah hi nî nit tâk mani?” ki ti a.

¹⁹Khasikin, PUMAPA khan hingkan a ne sâm a, “Ni hong kîrin chu nang lei iham nôk ki ta, ke somin nang mang nôk ni ti. Thu chanlamboi ril loia thutak nen puangin chu ki thu inpuangtu, ki zânthla ni ngir ni ti. Mihei ziangah ni fe nang no nia, anmanin nang hong pan lem an ti.

²⁰Hi mihei maah hin sumsen bang idetin nang siam ki ta, nang ridoipui an ta; khanniseh, nang inê thei no nih. Ni ziangah om ki ta, nang irungin izôkriamkan nang in-om ki ti.

²¹Mi sualhei neh mi nunterhei kut ata nang sanisuang ki ti. Keimah, PUMAPA hin kî ti tâk a nit,” a ti a.