Read Biete JEREMIA 17 Bible Online

JEREMIA 17 - Biete bible

JEREMIA 17

¹PUMAPA khan, “Juda mihei o, nin sualna chu thîr rizum neh lungilu rizumin [28] nin lungrilah ifiang takka riziak a nit, nin mâichâm rikîhei khomah riziak a nit.

²Nin mihein itlângsîpheiah thing kung thuai tina pathiannu Aseri rilim iomhei kha chubai an ûn a.

³Mun itlong, dâiputiang [29] itlângsîphei khomah khan mirmil nin biak a. A ram pumpuiin nin sual sinhei sikin nin richongna neh nin richon ilu murdi chu râllâk sum rangin nin irâlhei kî sem pêk riai rang a nit.

⁴Ram nangni kî pêk khah nin isual sikin ichân nin ti. Nin chunga ki ningthikna chu mei angkan a chok mai sikin nin iriat ngai tlak ino ramah, nin irâlhei sin nin itho rang tâk a nit,” a ti.

⁵PUMAPA khan hingkan a ti: “Miriama ringat a, â famthei miriam bân tha râtna tûng a, PUMAPA nung isongtu chu vânisalin om riseh.

⁶Ani chu ramchâra sûlribuk angkah a nit a, Mun inthim ram iṭôla mông a nit a, Rinêng i-al, îte zel om nonaa om a nit. Thil iṭha rêng rêng ani khan mu ngai mak.

⁷Khannisela, PUMAPA chunga a iamna ringattu chu ṭhatvur ki ti.

⁸Ani chu vadung kôla thing imông, vadung rikama rizung ikâi, Kholum hong itlung khom ṭi ngai ino, A nâhei khom â ringzun mai; Khokang rîmrip khoma thêm ngai ino, Irâ sua mai ngai angkah hi a nit.

⁹Miriam lungril hi thil dang tin tin nêka porinche a nit, Siaminṭhat thei loi rang dôrka sehrip a nit a, Tûm a rethiam thei rang?

¹⁰Keimah, PUMAPA hi lungril ientu, ngaituanahei ifiatu ki nit. Mi tin an sintho angkah chitin loman ki pêk ngai.”

¹¹Kut fâi loia richong chu varung, mahni ritui ni no op inkektu angkah a nit. A vâng ṭhat lâi takin archongna kha ichân a ta, A nungkhônah chu ân vêtzia la lang a ti.

¹²Ei Tempil chu rêngṭhungmun roinpui angkah a nit a, A tîr ata itlâng risâng chungah a îding mai a nit.

¹³O PUMAPA, nang chu Israelhei rinpui tak ni nit a; Nangmah nang imahei murdi chu mualinphoi an ti. PUMAPA, ringna tuinâr tak chu nang an mâk sikin, Pilvuta riming riziak angkan rimang an ti.

¹⁴O PUMAPA, nen dam inla; khanchu, dam vang ki ti. Nen zôk inla; khanchu, zôkriam ki ti. Nangmah bang hih nang kî chôiinrisâng ngai chu ni nit.

¹⁵Mipuihei khan ki ziangah, “PUMAPA riningna ṭonghei khah taktiang im an iom tâk? Atûnah hin ithlun ta riseh ba,” an ti ngai a.

¹⁶Khanniseh, PUMAPA, an chungah vânduaina inrît ithlun rangin nang lei ngên ngai mang a, an chunga vânduaina thlun hih ki nuamlam ni mak iti ni riat a. PUMAPA, ki ṭongbâi suakhei chu nangman nî riat riai a nit.

¹⁷Ki ta rangin iṭiom ni no roh; nang chu lungzîng nikhuaa ki zôkna ni nit.

¹⁸Deng nen theituhei chungah hin mualphoina iṭhum inla, PUMAPA, keimah chu ne zua roh. Ṭina rikhêlin anni chu insip inla, keimah chu ṭina boiin ne siam roh. An chungah vânduaina rikhêl ithlun inla, that inrimang phar roh.

¹⁹PUMAPA khan, “Jeremia, fen la, kul dâikot rilun tak, Juda rênghei an lût an suakna ngaiah khan va ding inla, Jerusalem lûtna dâikot dang dangheiah khom iding thiai inla, ki mihei ziangah ki thucha hi inpuang roh.

²⁰Rênghei neh Judai rama mipuihei, Jerusalema om murdihei neh hi dâikot murdia lût ngaihei chu ki thu ringai rangin iril roh.

²¹An ringna an inlutin chu sabatnin thil îte pêl loi rangin iril roh; Jerusalem dâikotheiah khan thil ipêl pum rêng rêngin an lût rang ni mak.

²²Sabatnin an insung ata thil an pêl suak rang ni mak a, sin khom an tho rang ni tlak mak. An chibulhei zianga thu kî pêk angkah khan sabatnî hih an ser rithiang rang a nit.

²³An chibulhei khan ki thu lei ringai mak a, an lei ingaisak ino a nit. An tuklul an inlian a; ki thupêk izômin, ki ziangah risei nuam mak.

²⁴“Hi mihei hin ki thupêkhei chu an zôm ngêt rang a nit itin iril roh. Sabatnin dâikotheiah hin thil ipêlin puak îte sungtiang an hong chôi inlût rang ni tlak mak. Sabatnî chu nikhua rithiangin ser an ta, sin khom an tho tlak rang ni mak e.

²⁵Khanchu, Davida rêngṭhungmuna ṭhung, an rênghei neh ruaituhei khah sakor tâli neh sakor chunga chuangin Juda mihei neh Jerusalema omhei neh khan hi khopui dâikotheiah hin hong lût an ta, Jerusalem khopui chu mihein sip mai tâng a ti.

²⁶Judai ram khopuihei ata neh Jerusalem kôlvêla khua chînheia rithokin hong an ta; Benjamin ram hual ata hei, itlâng bul ata hei, tlângram ata hei, sim tiang Judai rama rithokhein mi hong an ti. Ki Tempilah hâlrivâm thillan neh thilpêkhei, bubâl thillanhei hong ichôiin hong ribôl an ta; namhoihei, lômthu ril ribôlna thilpêk khom hong chôi sâng an ti.

²⁷Khanniseh, sabatnî mang inrithiang chungchâng thu-ah hei, sabatnîa Jerusalema dâikota thil ipêla lût ikhap chungchâng thu-ah hei, ki thu nin zôm non chu Jerusalem kotbâihei chu meiin hâl ki ta, kha mei khan Jerusalema rêng inhei neh a rêngkan kâng riai a ta, tukhomin that thei no nih,” a ti.