Read Biete JEREMIA 18 Bible Online

JEREMIA 18 - Biete bible

JEREMIA 18

¹PUMAPA khan ki ziangah,

²“Bêl ivuaktu inah zu fen la, amakhan thu nang iril ki ti,” a ti a.

³Khanchu, bêl ivuaktu inah ki zu fe a, ani khan kâingûm ilianpa[30] mangin bêl a lei vuak ki mu a.

⁴A bêl siam kha a ṭhat a ti non chu bêl dangin a siam nôk zel ngai a.

⁵Khanchu, PUMAPA khan ki ziangah,

⁶“O Israel naihei, hi bêl ivuaktu tho lam angkah takah hin nin chungah kî tho thei ino mani? Bêl ivuaktu kuta pilpoklûm angkah takah hin ki kuta om nin nit.

⁷A tik zoro khomin, nam manih, rêngram manih chungthu-ah, ‘Phâi pai ki ta, ṭhet chit ki ta, isehchit ki ti,’ itin lei ti ngai khom inlang,

⁸Kha nam khan an sual an riletin chu an chunga thil ṭhano tho kî tum khah inrilêk nôk ki ti.

⁹A tik zoro khomin, nam manih, rêngram manih chungthu-ah, ‘Phun ki ta, siaminding ki ti,’ lei ti khom inlang,

¹⁰ki mitmuah thil isual an tho a, ki thu an zôm noa a nitin chu thil iṭha itho pêk ranga kî tum khah inrilêk nôk ki ti.

¹¹Atûnah hin Juda mihei neh Jerusalema omhei ziangah anmani doiin thil ṭhano ken rifûk a, kuttum itho rangin ki irzoi diam tâk a nit iti iril roh. Khasikin, mi tinin an sualhei rilet sela, an om dân neh an thil thonsualhei chu ima riseh.

¹²Anni khan, ‘Îtho sik im kin îma rang? Kin rêngkan kin nuam dôrah tuklul ilianin, sual sin thông kin ti, im ân khôkna a om?’ itin nang sâm an ti,” a ti.

¹³PUMAPA khan hingkan a ti: “Nam danghei chu ridon ngân ta u, Hingkana thil hih a lei tlung tâk ngai an riat im? Israel mihei khan thil inkhôk tak an lei itho tâk a nit.

¹⁴Lebanon tlâng lungpuihei chu ivur iboiin an om ngai im? A tlânga rithoka tui idâi riam zuang isuak kha a kang tâk ngai im?

¹⁵Ki mihei rêkin chu an ner ngil a, Mirmil chanlamboihei ziangah namhoi an hâl a. Tianlâia an fena ngai lampui kha an pêt a, Lampui rilun zui loiin kâtiheiah an ilôn tâk a nit.

¹⁶An ram hih rilônthingna ramin an siam a, Kumkhuaka musit iomin a om tâk, Thlengrilôi murdîn ringai rikhêlin, an idang ichek vong vong an ti.

¹⁷Khosak ithlîn pilvut ai sêm inlêng ngai angkah hin, Ki mihei chu an irâlhei makungah ithek indar ki ti. Anni chu nungsong ki ta; Vânduaina inrît a tlung zoron anni chu ṭangpui no ning e.”

¹⁸Khanchu, mipuihei khan, “Tho ta u, Jeremia hi lei phiarrûk rei u. Tiklâi khomin dân nen risei rang thiampuhei, lungvâr ne sak rang mi vârhei, Pathian thucha ne ril rang zânthlahei chu an iom mai rang a nit. Tho, isîr inseh tak tak ei ta, a thuril ringai pêk khâi no min u,” an ti a.

¹⁹Khasikah khan ki ṭongṭai a, “PUMAPA, ki ṭongbâi suak hi lei ringai inla, ke râlhein ki chungthu-a an itihei murdi hih lei reh roh.

²⁰Sual hih thil iṭha thungna ai nit mani? Anni khan ki tlâkna rang dîp an choih a, an chunga ni ningthik iṭhuai ranga ni zianga ki ngên pêkzia khah remai roh.

²¹Khan atûn chu, PUMAPA, an naihei khan ṭâmpui voniṭâmin thi sela, khandai ingaih tong riseh. Nupuihei khan an pasalhei neh an naihei ichân sela; pasalhei khah ripuiin thi sela, an tlangvâlhei chu rituk bualah ithat ni riseh.

²²Ki tlâkna rang dîp an choih a, ke ôkna rang châng an kam sikin voikazelin irâlhein hong rûn thut sela, an inah ṭap ngûi ngûi riseh.

²³O PUMAPA, ne that itum a, an ne phiar dân murdi nî riat riai a nit. An thonchâina ngaidam non la, ni mitmuah an sualnahei thâi inrimang no roh. Ni maah an thal takin pai inlîr inla, ni ningthik lâi takah khan anni chu inuai bit roh,” ki ti a.