Read Biete JEREMIA 19 Bible Online

JEREMIA 19 - Biete bible

JEREMIA 19

¹PUMAPA khan ife a, ipilbêl var cho rangin a ne ril a. Khabanah mipui lâia ruaitu ṭhenkahei neh thiampu ulian ual ṭhenkahei iṭhui sa rangin a ne tir a.

²Ipilbêl korok tamna dâikot ata fe suak a, Hinom Phâi tianga fe a, kha munah khan a thucha ne pêk rang kha inpuang rangin a ne îril a nit a.

³PUMAPA khan hingka hin a ti, “Judai ram rênghei neh Jerusalema omhei, Keimah, Tinrêngthothei PUMAPA, Israelhei Pathian ṭongbâi suak hih ringai rei. Hi munah hin vânduaina inrît tak ki hong îthlun rang a nit, a thurchi lei iria kan an rilo inthing a ti.

⁴Mihein an ne mâk tâk a, hi mun khom hih ram dang pathian isônnan an mang tâk a, anmani neh an chibulhei, Juda rênghei khomin an iriat ngai ino pathian danghei ziangah namhoi an hâl a, mi ningsiat sin inohei thisenin ki mun hih an insip tâk a.

⁵Baal zianga hâlrivâm thillana an naihei an lanna rang Baal ta rangin mâichâmhei an isiam a nit. Kha thilhei khah itho rangin thu peh mang a; ngaitua khom ngaitua tlak ngai mang e.

⁶Khasikin, ringai rei, nikhua la hong tlung a ti, kha tikin chu hi mun hih Tofet Phâi manih Hinom Phâi[31] manih ti khâi no nia, Rithatna Phâi an iti rang tâk a nit.

⁷Hi munah hin Judai ram neh Jerusalema mihei thiltum chu mangsang inchang pêk ki ta, an irâl, khandaia that itumtuhei khan anni chu that an ti. An ruakhei chu chungavuang ivahei neh ramsahei fâk rangin pêng ki ti.

⁸Hi khopui hih mihei musit rangin isehchit ki ta, thlengrilôi murdîn a siat natinsatzia an mun an ringai rikhêlin an idang ichek vong vong an ti.

⁹Anmani that itumtu, an irâlhei khan khopui khah hual khap an ta; khanchu, an hual khap tâk sikah khan khopui sunga mihei chu rifah risak an ta, an naihei tena lua khom fah tâng an ti,” a ti a.

¹⁰Khanungchu, PUMAPA khan ki fepuihei mitmuah bêl khah ikhoi a, an ziangah hi thu iril rangin a ne ti a.

¹¹Khante, an ziangah, “PUMAPA Tinrêngthothei khan, ‘Hi khopui neh hi mipuihei hih hi bêl angkah hin ki îsiat rang a nit, siam inṭhat nôk thei ni khâi no nih. Mithi ruakhei khah phûmna rang mun dang a om khâi no sikin Tofetah an iphûm rang a nit.

¹²Hi khopui neh a sunga omhei hih Tofet angkah taka siam rangin ṭong ki irkhâm a nit.[32]

¹³Jerusalema inhei, Judai ram rêng inhei neh rivâna ârsihei zianga namhoi ihâla, pathian danghei zianga uain an bunsuakna ngai in murdihei chu Tofet angkana porinche nîng a ti,’ a ti,” a ti a.

¹⁴Khanungchu, PUMAPA khan a thucha inpuang ranga a ne tirna mun Tofet kha ki mâk tâk a. Ki fe a, Tempil tualah ke ding a, khantaka om mipui murdi ziangah,

¹⁵“Tinrêngthothei PUMAPA, Israelhei Pathian khan, ‘Ki thu ringai nuam mak chei a, nin tuklul nin inlian khap sikin inkhôkna lian zuang tlung a ti kî ti murdi khah hi khopui neh a kôl vêla khuahei chungah hin a zuang itlung rang a nit,’ ai ti a nit,” ki ti a.