Read Biete JEREMIA 2 Bible Online

JEREMIA 2 - Biete bible

JEREMIA 2

¹PUMAPA thu chu ki ziangah hingka hin a zuang tlung a:

²“Fen la, Jerusalem mihei riat thei rangin thu isîr roh. Nungâkte ni nit lâia ni iamomzia hei, Ei rinei zoi phinga lung ni ne thlungzia hei, Îte chimu la tho ngai nona mun ramchâra, Ni ne zui dânhei khah kî riat mai a nit.

³Israel, keima ta bang ni nit a; Ki thil rithiang nei ni lei hong nit ngai a. Nang intuangtuhei murdi chungah, Tuangna neh rimangna ki îthlun ngai a nit. Keimah, PUMAPA hin kî ti a nit,” itin.

⁴O Jakoba insungkuahei neh Israel nam murdihei o, PUMAPA thu hih ringai rei.

⁵PUMAPA khan hingkan a ti: “Nin richibulhein keima chungah hin im thil dik ino an imua ki ziang ata ilah takkah an irot tâk? Mirmil chanlamboi chubai an ûn a, Anni khom chanlamboi an ichang tâk a nit.

⁶‘Aigupta ram ata ne ṭhui isuaa, Ramchâr, ram iṭôl, ṭênkhuruk mun, Tui khatinvângna mun ram isêt, Tute fe ngai nona, tute om ngai nona ram ne ṭhui inkhêltu, PUMAPA chu taktiang im ai om tâk?’ Itin ne ngaitua nachâng khom reh mak e.

⁷Ram iṭha takah, â râ ifa a, a ṭhatna ifîm rangin ki ṭhui ithlun a. Khanniseh, ki ram chu chanlamboiin an siam a, Anni kî pêk ram khah porinchen an siam a, an înnim tâk a nit.

⁸Thiampuhei khan, ‘PUMAPA chu taktiang im ai om?’ ti ngai mak a. Ki thiampuhei ngêi khan ne reh khâi mak a, Roirêltuhei ki chungah an rihel a; Zânthlahein Baal rimingin thu an inpuang a, Lutna nei ino mirmil chubai an ûn tâk a.

⁹Khaangkan Keimah, PUMAPA hin ki mihei chu sêlikal ki ta, An richi suanpârhei idênin sêlikal mai ki ti.

¹⁰Nithlâk tiang Kupra tuihualah fe unla, va en ta u, Nisua tiang Kedar ramah mi tir unla, iṭha takkan thlîr vêl rei. Hingkana thil rêng rêng hih la tlung tlak ngai mak iti mûng nin ti.

¹¹Pathian dik tak ni no khom seh, Nam danghein chu an pathianhei thleng ngai mak, Ki mihei rêkin chu anmani roinpuia siamtu Pathian chu, Lutna nei ino mirmil pathianin [2] an ithleng tâk a nit.

¹²Khasikin ringai rikhêl neh lunginzînga an omna rangin, Rivân chu iṭi inrît takka inthing rangin thu kî pêk a nit.[3]

¹³Ki mihei khan thil isual inikah an sin tâk a; Keimah, ringna tuinâr hih an ne mâk tâk a, Tuikuang an choih a, tui reng riting thei ino rang tuikuang an ichoi a nit.

¹⁴Israel chu bôi ni mak a; Bôi ini piala inzir ni mak e. Khateh ithôm irâlhei kuttum ai tuang tâk?

¹⁵Sakeibaknei angkan a chungah an irâm a, iring takkan an rikam an itlok a; A ram chu ramchârin an siam pêk a, A khopui khom luatu om loiin a ram zoi tâk a.

¹⁶A nit, Memfis mihei neh Tapanhes mihei khan,[4] A lu an itôk khoi pêk tâk.

¹⁷Israel, PUMAPA ni Pathian hin lampuiah nang ke ruai mai lâiah khan, Ni ne mâkrak sikin ama thil hih nangmah nâk nâkin ni chungah ni îṭhum tâk a nit.

¹⁸Nail tui iin ranga Aigupta ipun khah ṭhatpuina im imu rang nî sabei? Eufratis tui iin ranga Asuria ipun khah im ṭhatpuina imu rang nî sabei?

¹⁹Ni pualoina sikin kuttum itho ni nit a, Nung ni ne song sikin thiamno chang ni ti. PUMAPA, ni Pathian nê marak hi, Sual a nitzia neh a ṭhatnozia la reh suak ni ti. Ki chungah iamomna rêng rêng nei khâi mak che a. Keimah, Tinrêngthotheia PUMAPA, Pathian hin kî ti tâk a nit,” itin.

²⁰PUMAPA Pathian khan a ti: “Israel, tianah khan ki thuneina ni nôl a, Ki thu zôma chubai ne ûn rang nuam mak che a. Itlâng risângheiah, thingkung nuaiheiah, Riditna pathianhei ne sôn ngai a.

²¹A chi dik tak, grep iṭha chi angkah takin nang ki phun a, Khanniseh, îtho tâk im ni hong inle tâk a? Grep suak, mangmunboi ni hong init tâk hi?

²²Chang-al neh sabonin risuh tak tak khom inla, Ni sual inung chu la mu thei mai ki ti.

²³Porinche mang a, Baal khom chubai ûn tlak mang e, ingkan im nî ti thei? Phâia ne sual dânhei [5] khah ngaituan la, Ni thil tho ngaihei khah remai roh. Ram saringsei ihur, om rangdân ria no angkan ni îtlân diai a nit kha.

²⁴Ramchâra sakuartung ihur, a nâr itûl vêl ngai kha, Arzukna tûm â dan zoi thei rang? A chal khan ama zongin a sôlpui nang ngai mak a; Rizui zoro a phâkin chu imu zel theiin a om mai ngai.

²⁵Israel, ne dang ichâr rakkan pathian danghei rizûlin, Ni kehei insôl no roh; Khanniseh, nangman chu, ‘Ki bei a dong tâk, kîr thei khâi no ning e. Ram dang pathianhei ker ngaiinnat tâk a, Anni chu kî zui rang a nit,’ ni ti a.”

²⁶PUMAPA khan a ti a: “Inru khan iman a tonga mâimôk ai sik ngai angkah takin nin rênghei, nin milianhei, nin thiampuhei, nin zânthlahei neh mipui nin rêngkan izakin nin mâimôk a ti.

²⁷Thingbul ziangah, ‘Kin pa ni nit,’ nin ti a, Lung ziangah, ‘Kin nu ni nit,’ nin ti a; ki tiang mâi ngat iloiin nin tuklul inlianin nung nin ne song ngai a. Khanniseh, lungzîng nikhuan chu, ‘Tho zuang inla, ne zuang inzôk roh,’ nin ti nôk ngai a.

²⁸“Nin kutsuak, nin pathianhei khah taktiang im an iom tâk? Intakna nin sik zoron an ithei ngai a nit inteh nangni san riseh ba. O Juda, ni khopui nei tam dôrkah pathian khom nî nei tâk a nit hih.

²⁹Ki chungah hin im nin lungtluk nona bi ai nit? Ki chungah hin îtho rang sika nin irhel tâk mani?

³⁰Nangni ke sôi a, khan arfena omak a, nangni ki siaminṭhat rang nuam mak chei. Sakeibaknei inrêk angkan nin zânthlahei khandaiin nin that a.

³¹Atûn lâi Israel mihei, ki thu sîr hi ringai ta u. Ramchâr neh ram inthim iṭiom tak angkan ki lei init mani? Îtho sik im ki mihein, ‘Kin zalen tâk a, ni ziangah hong kîr khâi no ning ung,’ nin iti hi?

³²Nungâkin arvôna thlukthla ringilin, imoiin arneina thlukthla a irngil thei mani? Ki mihei rêkin chu tep zoi loi sûnhei an ne irngil tâk a nit.

³³Nin îdithei rizûl dân chu ni iriat titak a nit hih. Nupang isualtakhei khomin ni ziangah risei thei an ti.

³⁴Ni puanhei chu mi rok ngaihei thisen ni loiin, mi inrianghei neh mi ningsiat sininohei thisen ai kop a nit. “Nikhomsela, hihei murdi itho mai pumin,

³⁵‘Îte thônchâi mang a; PUMAPA chu ki chungah ning inthik khâi no nih,’ ni ti a. Khanniseh, ‘Sual sin mang e’ ni ti sikin keimah, PUMAPA hin kuttum nang thông ki ti.

³⁶Nam dang pathianhei tiang ni ngat tâk sikin ni lutna ni înboi tâk a nit. Asuria ner nêla nî mualinphoipui angkah khan Aigupta chunga ner ngatna khom mualinphoipui nôk ni ti.

³⁷Izaka lu khûnin Aiguptaa rithokin kîr nôk ni ti. Keimah PUMAPA hin ner ngatna ngaihei chu ki paiiṭhul tâk a, annihei khan nang san thei tlak no nih.”