Read Biete JEREMIA 20 Bible Online

JEREMIA 20 - Biete bible

JEREMIA 20

¹Thiampu Pasura, Imera naipa Tempila ruaitu tak khan kha thu ki înpuanghei khah a lei riat a;

²Khanchu, a nen tôk a, thîrkol a nen bun a, Tempil sunga Benjamin Kotbâi sakita ual kôlah khan a ne khum a.

³Atûkah chu Pasura khan ki kolbun khah a ne khek pêk a, a ne sua tâk a. Khante, a ziangah, “PUMAPA khan ner ming Pasura ti khâi loiin ‘Magor Misabib’ [33] nang ai ti tâk a nit.

⁴PUMAPA ngêiin hingkan ai ti a nit: ‘Ringai roh, ni rang neh ni rualhei murdi rangin iṭiomin nang siam ki ta, ni mitmu ngêiah anni chu an irâlhein khandaiin that an ta, Juda mi murdi Babilon rêng kutah kî pêk rang a nit. Ani khan ṭhenkah Babilonah suakin ṭhui a ta, a dang chu that a ti.

⁵Hi khopui richongna murdi, a isua richon ilu murdihei, Juda rênghei sum neh puan murdi khom an irâlhei kutah lan ki ti. Anni khan irok an ta, la pêk riai an ta, Babilon tiang tinrêng chôi vang an ti.

⁶Nangmah ngêi khom Pasur, ni ina om murdi neh suakin nangni man an ta, Babilonah nangni ṭhui an ti. Amakhan thîng ni ta, nang phûm an ti; nangmah neh ni rual milak thu ni lei îril ngaihei neh khan,’ ai ti a nit,” ki ti a.

⁷PUMAPA, nangman ni ne lêm a, ilêm ki nit tâk hih. Nang chu keima nêkan ni rât a, ni ne înê tâk a nit. Sûn thluanin ni ne nuiso a, mi tinin an ne iphengsan tâk a nit.

⁸Thu ke sîr ikipah lak, “Rituk ribuan neh risiat risakna natinsatzia thu,” ringot ke khêkpui a nang a. PUMAPA, ni thucha ken puang sikin zoro tin inuiso neh imusit ki nit tâk.

⁹“PUMAPA chu ringil ki ta, armingin thu ril khâi no ning,” ki ti lakin, Ki ru sunga mei iom angkan, Ni thucha khan ki lungril a tur inlum vung vung a, Ki sunga vong ṭianin kî dâirek thei tlak ino a nit.

¹⁰Mi tam takkahei risôn zizat ki riat a, “Kil tinah iṭiom a om e! Tho, thuneituhei ziangah la va nô rei u,” an ti a. Ki rualṭhahei tak ilua khomin ke lîr zoro an ingâk ṭian a nit, “Ei lêm thei duai a nitin chu man ei ta, a chungah phuba lâng ei ti,” an ti a.

¹¹Khanniseh, PUMAPA, nangmah mi rât neh mi inthang chu ki ziangah ni om a, Deng nen theituhei chu ilîr an ti. Lo an tluk no sikin kumkhuakan mualinphoi an ta, An rimingsiatna chu kumkhuakan ringil ni tlak no nih.

¹²Tinrêngthothei PUMAPA, diknan mihei ni fia ngai a, An lungril neh ngaituanahei chu nî riat riai a nit. Khasikin, ke râlhei chunga phuba ni lâk lâi nen mu roh, Ki chungthu chu ni kutah ki înkol tâk a nit.

¹³PUMAPA inpâk unla, PUMAPA chu chôiinrisâng rei. Mi sualhei kuta rithokin isirphûma omhei chu a sanisua tâk a.

¹⁴Ki suaknî chu vânisalin om riseh, Ki nûn a ne nei nî khah ṭhativur ni no riseh.

¹⁵Ki pa zianga, “Naipa ni nei tâk,” iti thu ril a, Ân lômtu khom khah vânisalin om riseh.

¹⁶PUMAPAN lungkhamna boi riaika khopui a îsiat angkan kha mi khah om riseh. Zîngah natna sika ṭap irî reh sela, Sûnah ridoina rî reh riseh.

¹⁷Ki zuang suak maah khan ne lei that seh, Ki nu sûl khah ki thlân lei nîng a ta, Khan kî om ṭian rang tâk pial.

¹⁸Îtho ngâna ki zuang isuak im ai nit? Lungzîng neh beidonga om mai rang neh, Mualinphoi takka ki damlâi sûn mang inhek rang ringotin mani?