Read Biete JEREMIA 21 Bible Online

JEREMIA 21 - Biete bible

JEREMIA 21

¹Rêng Zedekia khan Malkia naipa Pasura neh Maaseia naipa thiampu Zefania hei kha hi ngênna thu hong ichôiin ki ziangah a hong tir a:

²“PUMAPA chu ngaihoi takkan ne sôn pêk roh, Babilon rêng Nebukadnezara neh a sipai lômhei khan khopui an hualkhap tâk a. PUMAPA khan kin ta rangin a sinrikhêl ithon Nebukadnezara chu a ne ûm ikhîr pêk duai khom a nit thei,” an ti a.

³Khanungchu, PUMAPA khan a ne sôn a; khanchu, ki zianga mi a hong itirhei ziangah khan, “Zedekia chu hingkan va ril rei.

⁴PUMAPA, Israelhei Pathian khan hingkan ai ti a nit: ‘Zedekia, ringai roh, Babilon rêng neh a sipai ni kulpui ihualtuhei ni doina ni sipai lôm chu ki întlôm rang a nit. Ni sipaihei râlthluk murdi chu khopui inlâina takah ki înpông rang a nit.

⁵Keimah ngêiin ke bân tharât tak ipharin ki ningthik neh ningmur ritêlin nangni kî doi rang a nit.

⁶Hi khopuia om miriam neh ui-âr murdi inuaichit ki ta, ripui inrîtin an ithi rang a nit.

⁷Khanniseh, nangmah chu ni milianhei banah ridoina hei, iṭâm hei neh ripui ata la dam isunhei neh khan nin rêngkan nangmani that itumtu Babilon rêng Nebukadnezara neh nin irâlhei kutah nangni pêng ki ti. Nebukadnezara khan nangni that a ti. Lungkhamna neh khorngaina nin chungah inlang no nia, tute nangni zua no nih,’ PUMAPA khan ai ti a nit.”

⁸Khanungchu, PUMAPA khan hi mihei iril rangin hi thu hih a ne pêk a: “Ringai ta u, Keimah, PUMAPA hin thina lampui neh ringna lampui, nin inuam tak rithlang rang nangni kî siam pêk a nit.

⁹Mi tukhom khopuia om mai inuam chu khandaiin manih, iṭâmin manih, ripuiin manih thîng an ti. Khanniseh, tukhom ife suak a, khopui ihual khaptu Babilon mihei zianga ripehei chu irâlin man an ta; khanniseh, an ringna kah chu inzôk an ti.

¹⁰Hi khopui hih zua loi a, isehchit rangin kî ti tâk a nit. Babilon rêng kutah pêng ki ta, ani khan meiin hâl vang a ti. Keimah PUMAPA hin kî ti tâk a nit,” a ti a.

¹¹Juda rêng insungkua, Davida richihei zianga ril rang thucha PUMAPA khan a ne pêk a, “Keimah PUMAPA ṭongbâi suak hih ringai rei. Sûn tin idik takkan roirêl unla, ilêma om khah â lêmtua rithokin san isua rei. Khanonchu, nin thil thonsual sikah khan ki ningthik chu tute ithat thei ino mei angkan ai ṭuang rang a nit.

¹³Nangmah Jerusalem, phâizôl chungah risâng takkan,[34] ne ṭhung a, phâihor chunga lungpui risâng tak angkah ni nit. ‘Tutên ne doi thei no nia, ki kulpui sungah khom hong lût thei no nih,’ ni ti a. Khanniseh, keimah ngêiin nang kî doi rang a nit.

¹⁴Ni sintho lam angkah takin kuttum nang kî tho rang a nit. Ni rêng-in chu meiin hâl ki ta, a kôlvêla thil tinrêng khom kâng rivâm vang a ti. Keimah PUMAPA hin kî ti tâk a nit,” a ti a.