Read Biete JEREMIA 22 Bible Online

JEREMIA 22 - Biete bible

JEREMIA 22

¹PUMAPA khan, “Davida richia mi Juda rêng-inah fen la, amakhan rêng neh a milianhei neh Jerusalema mipui iomhei ziangah hi thucha hih isîr roh.

³‘Keimah, PUMAPA hin idik neh ifel takka roiirêl rangin thu nangni kî pêk a nit. Mi ilêma omtu chu â lêmtua rithokin inzôk rei. Ram dang mihei, numeihei, farahei chungah dik ino takka deng intheiin zâlrât mang no rei; hi mun rithiangah hin mi ningsiat sin inohei thisen nin isua rang ni mak.

⁴Hi thu nangni kî pêk hih iṭha takkan nin zômin chu Davida richihei chu rêng chang mai an ti. An milianhei, an mipuihei neh khan tâli chungah neh sakor chunga chuangin hi rêng-in kotbâiah hin an ilûtin an isuak mai rang a nit.

⁵Khannisela, ki thupêkhei nin zôm noa a nitin chu hi rêng-in hih la ram val a ti, itin keima riming ngêi ichingin nin ziangah ṭong ki irkhâm a nit.’ Keimah, PUMAPA hin kî ti a nit.

⁶“Keima ta rangin chu Juda rêng-in hi Gilead ram angkan neh Lebanon tlâng angkah taka enihoi a nit a; khanniseh, ramchârin siam ki ta, luatu om ino khopui iram angkan kî siam rang a nit.

⁷Â sehtu rangin chemrei ichôi hong tir ki ta, anni khan a sidar chopui iṭhahei iphûr an ta, meiah pai an ti.

⁸“Nam dang mi itam takkah thlengrilôihein, ‘Îtho sik im hi khopui roinpui tak chungah hin hi thil hih PUMAPA khan ai tho tâk hi?’ tîng an ti.

⁹‘PUMAPA, an Pathian thuthlung nung an song a, pathian danghei chubai iûnin an sin an tho tâk sika a nit,’ itin sâm an ti.”

¹⁰Juda mihei o, Rêng Josia chu ṭâ no unla, A thina khah isûn khom sûn no rei. Khanniseh, a naipa Joahaza rangin chu ṭap titak rei; Hong kîr tlak khâi loi rangin an ṭhui tâk a, Ân siangna ram khah mu tlak khâi no nih.

¹¹Josia naipa a pa rithûla Judai rama rêng ichang Saluma chungchângah PUMAPA khan hingkan a ti: “Hong kîr tlak khâi loi rangin hin taka rithokin ilah takah iṭhui a nit tâk.

¹²An ṭhuina ramah khan thîng a ta, hi ram hih mu nôk khâi no nih,” itin.

¹³Dikino taka thil ithoa in isintu, Rilêmna thil ithoa in richuan isintu; A mihei sin inthoa, an thalo peh nuam inotu chu, A chung ân khôk vang e.

¹⁴“In roinpui tak, richuan rizat tak inei ki ta rang sin ki ta, Tukverhei siam ki ta, sidar thingin thlop ki ta, Rông sen nâl ki ti,” ititu chung chu ân khôk a nit.

¹⁵Sidar thinga in ni sin thei sikin rêng iṭhah ual nî nit mani? Sidar thing ni nei intam sikah khan mi danghei nêka inlal okin ni irbe mani? Ni pa khan idik neh ifel takkan thil a thoa, fâknêk khom a nei intam a, A thil tho tinrêngah khom vângsak inṭumin ai om ngai a nit.

¹⁶Inrianghei neh risamhei a ngaisak a, Khanchu, thil tinrêng a ta rangin a hong înṭum pêk a. Khangkah tak kha kêng PUMAPA ria chu ai nit.

¹⁷Khanniseh, dikino taka lep itumin ni mit nen lêng a, Mi ningsiat sin inohei thisen ne sua a, Zâlrâtin ni mihei nî sirde a nit. PUMAPA khan ai ti a nit.

¹⁸Khasikah khan Juda rêng Jehoiakima, Josia naipa chungthu-ah PUMAPA khan hingkan ai ti a nit: “A thinaah khan, ‘Ân khôk vang na; O epu, O ki rualṭha, O ki Rêngpa,’ itin mi tutên ṭâ no nia, isûn khom sûn no nih.

¹⁹Kâi nâl an ta, Jerusalem kul putiang pai an ta, Sakuartung ruak irê angkah takin phûm an ti.”

²⁰Jerusalema mihei Lebanonah lui unla ipâi rei, Basan ramah fe unla ikhêk rei; Abarima [35] rithokin ṭap suak rei, Nin thunrualpuihei murdi an tlôm zoi tâk.

²¹Nin vângsak inṭum lâi takah khan PUMAPA khan nangni â sôn a, Nikhomseh, ringai nuam mak chei ua. Amahih nin thuarbap lâi ata nin omdân a nit a; PUMAPA thu nin izôm tlak ngai ino a nit.

²²Nin ruaituhei chu phâivuan sêm inrimang a ta, Nin thunrualpuihei suaka man nîng an ta, Nin sualna sikin mualinphoi neh lunginzîng takkan om nin ti.

²³Lebanona rithoka zuang ichôi, Sidar thinga sin in ihoi taka om ngai; Naiha isê angkana natna nin chungah a zuang tlung tenan chu, Nin irung natinsat rang tlia chu na!

²⁴PUMAPA khan Juda rêng Jehoiakima naipa rêng Jehoiakina ziangah hingkan a ti a, “Pathian iring ki nit hih. Nangmah Juda rêng Konia, Jehoiakima naipa ki kut changtianga namindetna kutsabit ni khom inla, nang kî thuat pai rang a nit.

²⁵Nang ithat itumtu, nî ṭi tak tak ngai mihei ziangah nang kî pêk rang a nit. Babilon rêng Nebukadnezara neh a sipaihei kutah nang kî lan rang a nit.

²⁶Nangmah neh ni nu chu suaka tâng rangin nangni ûmisuang ki ti. Nin inzirna mun ni no ramah khan iṭhui paiin om nin ta, nin ruaikan kha ramah khan thîng nin ti.

²⁷Hi ram hih imu nôk rangin rizuk tak tak nin ta chu hong kîr tlak khâi no tin u.”

²⁸Khante, keiman “Hi Konia hih bekorok, tute înpâm khâi ino angkah ai nit ni mak im a? Hi sikah hin im ram an iriat tlak ngai ino munah khan amah neh a naihei chu suakin an îtâng tâk ai nit,” ki ti a.

²⁹O ram, O ram, O ram, PUMAPA thu hih ringai roh.

³⁰PUMAPA khan hingka hin a ti, “Hi miriam hih nai zel nei loi rang, Thluantlungna zel nei ino rang mi a nit. Davida rêngṭhungmuna ṭhung rang neh, Judai rama roiirêl rang richi suanpâr nei no nih. Keimah PUMAPA hin kî ti tâk a nit.” a ne ti a.