Read Biete JEREMIA 23 Bible Online

JEREMIA 23 - Biete bible

JEREMIA 23

¹“Ki ran vâina muna berahei chekindara inrimangtu berapuhei chung chu ân khôk e,” iti hih PUMAPA thu suak a nit.

²Khasikin, PUMAPA, Israelhei Pathian khan a mihei enkoltu, berapuhei chungthu kha hingka hin ai ti a nit: “Ki mihei enkol mak chei a, nin ichekindar a, nin ûmrizûl tâk a. Ringai rei, nin thilsual tho sikin atûn chu kuttum nangni kî tho rang a nit.

³Ki mi a la dam isunhei chu ke chekindarna ramhei ata bûm nôk ki ta, an ram ngirah hong ṭhui ikhîr nôk ki ti. Nainete itam takka hong nei an ta, hong ipungin rât tak tak an ti.

⁴Anmani enkoltu rang berapu siang ki ta, iṭi neh lunginzîngin om khâi no nia, khatka lua rimang khâi no nih.[36] Keimah PUMAPA hin kî ti a nit.”

⁵PUMAPA khan hingkan a ti: “Nikhua a hong itlung thiai tâk a nit, khatikin chu Davida richia mi fel, rêng iṭha tak hong suak a ta, kha rêng khan ivâr takkan roirêl a ta, ram pumpuiah idik tak neh ifel takkan sin thông a ti.

⁶Ân lal sung kârkah Juda mihei chu izôkriam kan om an ta, Israel mihei khom rithla ringam takkan om an ti. Ani chu ‘PUMAPA, Ei Saninringna’ [37] itia koi ning a ti.”

⁷PUMAPA khan hingkan a ti: “Nikhua chu a hong itlung thiai tâk a nit, khatikin chu mihein, ‘Aigupta ram ata Israel naihei hong iṭhui suaktu Pathian chu â ring a nit,’ itin ker ming ichingin ṭonginkungna nei khâi no nih.

⁸Kha nêkan chu ‘Israel richihei mâr tiang ram ata neh anni â chekindarna ram tin ata hong iṭhui suaktu Pathian chu â ring a nit,’ itin ker ming ichingin ṭonginkungna nei tâng an ti. Khanchu, an ram ngêiah khan om tâng an ti.”

⁹Ke lung a nat vang chu, Ki sungril tak hih a înthing a nit. PUMAPA neh a thu rithiang sikah hin, Mi uain iin intam a, inrui chit angkah hin kî om a nit.

¹⁰Ram chu inrênan a sip a; Pualoi takkan an om a, lam dik ino an zui a, PUMAPA vânisâm sikin ram chu a ngûi zoi tâk a, Sûl ringna munhei khom an châr zoi tâk.

¹¹PUMAPA khan hingkan a ti: “Zânthlahei neh thiampuhei khan Pathian ngaisak khâi mak a, Ki Biak In sung ngêiah khom an sual sin kî mu a nit.

¹²Khasikin, an lampui rô chu zân inthim rinâl tak nîng a ta, Amakhan lâizâm thông an ta, ibâ an ta, ilîr an ti. An chungah vânduaina inrît iṭhum ki ta; Kuttum an tong rang nikhua â tlung thiai tâk a nit. Keimah, PUMAPA hin kî ti tâk a nit.

¹³Samaria khua zânthlahei sual porinche tak chu kî mu a nit; Baal rimingin thu an inpuang a, Ki mi Israelhei an iṭhui insual tâk a nit.

¹⁴Kha nêka sual ual Jerusalem zânthlahein sual an isin kî mu a nit. An inrê a, ṭong milak an ril a; Thil ṭhano tho rangin mihei an ṭangpui a, Tu khomin thil ṭhano sin an ima nona rangin. Ki ta rangin chu an rêngkan Sodom neh Gomora mihei angkah taka isual an nit.

¹⁵“Khasika khan, Tinrêngthothei PUMAPA, Keimah ngêiin Jerusalema zânthlahei chungthu hingkan kî ti a nit: “Anni chu thil ikhâ [38] infâng ki ta, Tui ikhâ in-in ki ti. Jerusalema zânthlahei sikin ram pumpuiah, Pathian ngaisaknona ai pung tîr tîr tâk a nit.”

¹⁶PUMAPA Tinrêngthotheia khan Jerusalem mihei ziangah hingkan a ti: “Nin lâia thu inpuang ngai zânthlahei ṭong ringai no rei; tûngna dik inohein nangni an îfa a nit. Ki thucha ni loiin an lungrila ingaitua an iphuatot khah nangni an îril ngai a nit.

¹⁷Ki thu ringai nuam ino mihei ziangah khan, ‘Nin ta rangin îtinrêng ṭhat tiang korong a nit,’ an ti pêk ngai a. Mi tuklul ilianhei ziangah khan, ‘Vânduaina nin chungah tlung no nih,’ an ti ngai.”

¹⁸Kî ti tak chu, “Hi zânthlahei hin PUMAPA roisak rithuphei reh tlak ngai mak. A thucha ringai a, â rethiam manih, â ngaisak manih tute omak e.

¹⁹PUMAPA ningthik thlipui râng a ta, phâivosimpui khan mi sualhei lu chu inuai bit a ti.

²⁰A thiltum murdi a len zoi mâkah chu PUMAPA ningthik thlipui kha ringam no nih. Zoro la hong itlung rangah chu hihei hih a mihei khan ifel takkan rethiam tâng an ti.”

²¹PUMAPA khan hingkan a ti: “Kî tir ni no zânthlahei kha an rivâk vêl a, anni kha thucha îte peh mang a, khan ker mingin thu an iril ngai a nit.

²²Ki roisak rithuphei hih an iriat ni sela chu ki mihei ziangah ki thucha inpuang suak an ta; khanchu, an om dân isualhei mah riai an ta, an thil thonsualhei an irlet ngêt rang a nit.

²³“Keimah hi mun khatkah banga Pathian ni loiin mun tina om ngai Pathian ki nit.

²⁴Ki mu thei nona rang mun rithupah tûm arbih thei rang? Rinêng neh rivân kî luan sip a nit iti hih nin iriat ino mani?

²⁵Ker ming ichinga milak iril ngai zânthlahei khan, ‘Rimangin kin phan a, kin rimangah a thuchahei a ne ipêk a nit,’ an iti khah kî riat a nit.

²⁶Hi zânthla milak, mahni iphuatota mi lêm ngaihei hin itena sôt im mipuihei chu an lai ṭhui insual mai rang hi?

²⁷An pahein Baal chubai an ûn a, ker ming an irngil tâk angkah khan ki mihein ker ming an ringil thei duai lôiim itin an rimanghei khah an îril ngai a nit.

²⁸Rimang inei zânthla khan armang phan a nit iti isîr sela, khaangkah khan ki thucha dongtu zânthla khomin idik takkan inpuang riseh. Bupôl neh farmal hin im ri-angna an inei?

²⁹Ki thu chu mei angkah a nit a, lung suk inrinôina chungchôi angkah a nit.

³⁰Zânthla, an zânthla champuihei thu sîr ila a, ki thucha angkana inpuang ngaihei chu kî nel a nit.

³¹Zânthla, mahni iphuatot inpuanga, ‘PUMAPA khan hingka hin a ti’ itituhei chu kî nel a nit.

³²PUMAPA hin kî ti hih ringai rei. An rimang thu milaka sîr inpôi ngai zânthlahei chu kî nel a nit. An rimanghei irilin an mînlakna neh an ripâknahein ki mihei an ṭhui insual ngai a. Anni chu kî tir ni mak a, ki thupêka fesuak khom ni mak e. Mihei ta ranga hin îte an imangna ai om ino a nit. Keimah, PUMAPA hin kî ti a nit.”

³³PUMAPA khan ki ziangah, “Jeremia, ‘PUMAPA thucha chu im ai nit?’ itia hi mihei hin manih, zânthlan manih, thiampun manih nang ardonin chu, ‘Nangmah hi PUMAPA ta ranga puakrik ni nit, nang ai heng rang a nit’ itin ani chu iril roh.

³⁴Zânthlan manih, thiampun manih, mi tukhôkin manih, ‘PUMAPA ta ranga puakrik’ iti ṭongbâihei a mangin chu kha mi neh a insungkuahei khah kuttum kî tho rang a nit.

³⁵Mi tinin mahni suapuihei neh rualchimhei ziangah, ‘PUMAPA khan im nang a îril? PUMAPA khan im ai ti?’ itin ridon risak tâng an ti.

³⁶Khangkan ‘PUMAPA puakrik’ iti ṭongbâi an mang rang ni tlak khâi mak, an mangin chu ki thu khah an ta rangin puakirik tak ai chang pêk rang a nit. Mipuihei khan an Pathian, Pathian iring, Tinrêngthothei Pathian thu khah an kâi inkôi zoi tâk a.

³⁷Jeremi, zânthlahei ziangah khan ‘PUMAPA khan im nang â îril? PUMAPA khan im ai ti?’ itin ridon roh.

³⁸Ki thupêk zôm loiin, ‘PUMAPA puakrik’ iti ṭongbâi an mangin chu,

³⁹anni chu ipotsuak ki ta, ki ziang ata ilah takah kî pai rang a nit, anmani neh an chibulhei kî pêk khopui neh hin kî heng pai rang a nit.

⁴⁰Khanchu, kumkhuaka ringil thei khâi ino izakna neh mualphoina an chungah ki îthlun rang a nit.”