Read Biete JEREMIA 24 Bible Online

JEREMIA 24 - Biete bible

JEREMIA 24

¹Juda rêng Jehoiakima naipa, rêng Jehoiakina neh Juda ruaituhei, kutithiam mihei, thîrsuhei kha Babilon rêng Nebukadnezaran Jerusalema rithoka Babilonah suaka tâng ranga a ṭhui zoiah khan PUMAPA khan theipui irâ bêm inikah, Tempil kottuala an isia kha a nen mu a.

²Bêm khatkatah khan theipui irâ ṭha tak tak, min masa a om a; a dang khatkatah khan theipui irâ ṭha no, ifah ranga ṭha viat khâi ino dôrka sia a om a.

³Khanchu, PUMAPA khan, “Jeremia, im nî mu?” a ti a. Keiman, “Theipui irâ ki mu. Â ṭhahei chu an ṭhat tak tak a, â siahei chu an isiat titak a nit,” ki ti a.

⁴PUMAPA khan ki ziangah,

⁵“Keimah, PUMAPA, Israelhei Pathianin Babilon rama iṭhuia om tâkhei khah hi theipui irâ ṭhahei angkah hi an nit a, ki lungkhamna an chungah om mai a ti.

⁶Anni chu vêng mai ki ta, hi ramah hin hong ṭhui ikhîr nôk ki ti. Anni chu siaminding nôk ki ta, kâi isim nôk khâi no ning e; anni chu phun ki ta, phâi tlak khâi no ning e.

⁷Keimah hih PUMAPA ki nit iti riattheina rang lungril pêng ki ti. Ki mihei nîng an ta, keimah an Pathian nîng ki ti; an lungril murdîn ki ziangah an hong ikîr rang tâk a nit.

⁸“Juda rêng Zedekia hei, a roirêlpuihei, Jerusalema omhei, hi rama la omhei neh Aigupta rama omhei kha theipui irâ ifah ranga ṭha viat inohei angkah hi an nit.

⁹An chungah vânduaina rikhêl tak ithlun ki ta, rammuala nam tinin iṭiom tîng an ti. Ke chekindarna muna mihein nuiso an ta, thuzer thonan mang an ta, êsêl an ta, an riming chu vâni sâmnan mang an ti.

¹⁰Anni neh an chibulhei kî pêk ramah khan an rimang riai mâkah chu an chungah khandaihei, iṭâmhei neh ripuihei ki înlêng rang a nit.”