Read Biete JEREMIA 25 Bible Online

JEREMIA 25 - Biete bible

JEREMIA 25

¹Josia naipa Jehoiakima inlal kum ilinaa Juda mi murdihei chungchângah PUMAPA zianga rithokin thu ki dong a: (Hi zoro hih Babilon rêng Nebukadnezara inlal kum khatna a nit).

²Juda mi murdi neh Jerusalema omhei ziangah khan hingkan ki ti a:

³“Kum sôminikah ithumka sung, Amona naipa Josia, Judai ramah ân lal kum sômleiithumna rithoka vuani tenah hin, PUMAPA thu ki zianga zuang itlung ngai chu nangni ril loiin om tlak ngai mang a; khanniseh, nin iuksak nuam ino a nit.

⁴PUMAPA khan a zânthla â somhei kha a zuk tir mai ngai a; nikhomseh, uksak mak chei a, iria tumin nin ibeng khom do ngai mak chei.

⁵Mi tinin nin om dân isualhei, nin thil song ṭhanohei mah riai unla; khanchu, nin chibulhei neh nin zianga PUMAPA nangni ipêk ramah hin kumkhuakan om mai nin ti itin nangni an îril ngai a nit.

⁶Pathian danghei sin tho loi rangin nangni an iril a; nin mirmil siamhei chubai iûnin PUMAPA ninginthik loi rangin nangni an iril ngai a. PUMAPA thu nin zômin chu kuttum nangni tho no nih iti nangni an îril ngai a nit.

⁷Khanniseh, PUMAPA ngêiin a thu ringai ngai mak chei a ti a. Nin mirmil siamhei sikah khan PUMAPA ning nin inthik a, a kuttum chu nangmani ngêiin nin chungah nin îṭhum tâk a nit.

⁸“Khasikah khan a thu nin ringai nuamno sikin Tinrêngthothei PUMAPA khan hingkan a ti:

⁹‘Mâr tianga namhei chu koi ki ta, ke som rêng Nebukadnezara chu Judai rama omhei neh a kôlvêl rama om murdihei idoi rangin ki hong iṭhui rang a nit. Hi nam neh a kôlvêla namhei chu isehchit ki ta, mihei khan arkhêl tîng an ta, ân rît tak tak tîng an ti, kumkhuakan an iram rang tâk a nit. Keimah, PUMAPA hin kî ti a nit.

¹⁰An râifân neh lômna rîhei, rineina ruaiṭhe rîhoihei inringam ki ta, an meiserhei that pêk ki ta, fângsuk irîhei khom om khâi no nih.

¹¹Hi ram hih a pumkan inramin om a ta, rikhêl rakkan sehchit tâng a ti. Hi namhei hin kum sômsarika sung Babilon rêng sin thông an ti.

¹²Kum sômsarika vêl a hek tenan chu Babilon rêng kha a mihei neh an sual sikin kuttum kî tho rang a nit. Kha ram khah isehchit ki ta, kumkhuaka rangin iramin om tâng a ti.

¹³Nam tinhei chungah vânduaina inrît iṭhum ranga riningna ṭong Jeremia manga ki lei iti, hi lekhabua inchuanga om murdi chu Babilon ram chungah ki îṭhum rang a nit.

¹⁴Nam itam takkah neh rêng roinpui tak takhein Babilon mihei chu suakin siam an ta, an thil lei tho lam angkah takin an ni chu thung ki ti,’ itin.”

¹⁵PUMAPA, Israelhei Pathian khan ki ziangah hingka hin a ti: “Hin uain kilât, ki ningthiknaa sip hi, ki kut ata lan la, nang ki tirna nam murdihei ziangah fen la, hi kilât ata hih anni chu in-in roh.

¹⁶An in tenan chu hong pêm pêm an ta; lungril bulbâl nei khâi no nih, an ziangah khandai ki tir rang sikin,” itin.

¹⁷Khanchu, PUMAPA kuta kilât khah ki lâk a, PUMAPA ne tirna nam murdihei khah ken in tâk a.

¹⁸Atûna an nit lam angkah hin Jerusalem neh Judai ram khopuihei chu ram vang an ta, an rênghei neh an ruaituhei chu musit neh nuizabûr nîng an ta, mihein an riming kha vâni sâm ṭongbâiin mang an ta, vânisalin om an ti.

¹⁹Hihei hih kilât iin ranghei riming chu an nit: Aigupta rêng Faroa banah a milianhei neh ruaituhei; Aigupta mi murdihei neh Aiguptaa ram dang mi om murdihei; Uz rama rêng tin tin hei; Filistia rama rênghei: Askelon rêng, Gaza rêng, Ekron rêng neh Asdoda imaa om rênghei murdi; Edom mihei, Moab mihei neh Amon mihei murdi; Tura neh Sidon rênghei murdi; Mediteranean tuipui rikam rama rênghei murdi; Dedan khopui, Tema khopui neh Buza khopui murdihei; Lu inbûi ngai murdihei; Arabia rênghei murdi; Ramchâra om nam ripol rênghei murdi; Zimri rênghei murdi, Elam rênghei murdi, Media rênghei murdi; Mâr tianga rêng, mun inâi neh mun ilaa om murdihei ân dônin an iin rang a nit. Rinêng chunga tu nam khomin hi kilât hih an in rang a nit. A nungkhôn takah Babilon rêng khomin ai in rang a nit.

²⁷Khanungchu, PUMAPA khan hingkan a ti a: “Keimah, PUMAPA, Tinrêngthothei Israelhei Pathian hin mipuihei chu iin rangin thu kî pêk tâk a nit iti iril roh. In sela, iluak sela, thoi thei khâi loi rang rakkan ilîr riseh. An lâiah khandai ki înlêng rang a nit.

²⁸Ni kut ata kilât khah an lâk nuam non chu, ‘PUMAPA Tinrêngthothei khan hi kilât hih nin in ngêt rang a nit,’ itin iril roh.

²⁹Ker ming chuangna ki Khopui ngêia rithokin isehchitna sin chu kî phut rang a nit. Anni khom kuttum tuang loia izôk rangin an irtûng mani? Zôk tlak no nih, rinêng chunga om murdihei chungah khandai ki înlêng rang a nit. Keimah, PUMAPA Tinrêngthothei hin kî ti a nit.

³⁰“Nangmah, Jeremia hin ki ṭongbâi suak murdi nen puang ngêt rang a nit. Hi mihei hih iril roh: ‘PUMAPA chu rivâna rithokin ikhêk a ta, A omna mun risâng taka rithokin a rôl isuang a ti. A mihei idemin ikhêk a ta; Grep isômtuhei angkan ikhêk suak a ti. Rinênga mi tin tinin riang an ta,

³¹Â rî rikhông khan kôlkomong dên a ti. Namhei chungah PUMAPA ning ai thik a nit. Mi murdi roi rêl pêk a ta, Mi pualoihei chu ithi rangin rêl a ti. PUMAPA khan ai ti a nit,’ itin.”

³²PUMAPA khan hingkan ai ti a nit: “Ram tin tin chungah siatna a tlung thiai tâk, kôlkomong ata phâivosimpui a hong irâng thiai tâk a nit.” itin.

³³Kha nikhuaah khan chu PUMAPA mi thathei ruak chu kôlkomong kiangtianga rithokin kiangtiang idênin rithek a ta; tutên ṭâ no nia, puanin tuam no nia, iphûm khom phûm no nih. Rinênga nimnok buk angkana paiin om an ti.

³⁴Berapuhei ṭap ngûi ngûi rei, nangmani bera lôm enkoltuhei ringaiinsian pilvut kârah hong itâl itâl rei. Ithata nin om rang zoro a hong tlung tâk a, bera chal [39] angkah taka richan nôi nîng nin ti.

³⁵Berapuhei khan lâizâm thona rang lampui zel nei no nih.

³⁶Berapuhei ṭap irî neh bera lôm enkoltuhei irung chu ringai rei, PUMAPA khan nin ran vâina mun â siat zoi tâk a.

³⁷PUMAPA khan a ningthikin ningbei takka nin omna ngai ram khah ân ram vang tâk sikah khan lunginzîngin ikhêk suak ta rei.

³⁸PUMAPA khan a mihei chu sakeibaknei â pûk ima angkan a mâk tâk a. Ridoina inrît sik neh PUMAPA ningmur ritêl sikah khan ram chu ramchâr a chang zoi tâk.