Read Biete JEREMIA 26 Bible Online

JEREMIA 26 - Biete bible

JEREMIA 26

¹Juda rêng Josia naipa, Jehoiakima ân lal phut kumin PUMAPA thu ki ziangah a zuang tlung a.

²PUMAPA khan ki ziangah, “Tempil kottualah iding inla, Judai ram khopuihei ata Pathian chubai iûn ranga hong mipui ziangah ki thu nang pêk murdihei hi inpuang roh. Thu nang kî pêk murdi chu îte zua loiin nen puang rang a nit.

³Mipuihei khan ringaiin an om dân isualhei an mâk duai lôiim. Khanchu, an thil isual thohei sika an chunga vânduaina iṭhum ranga kî lei irêl thlâm tâk khah inrilêk nôk ki ti,” a ti a.

⁴PUMAPA khan mipuihei ziangah iti pêk rangin a ne ril a, “Keimah, PUMAPA hin nin ziangah inriseina nangni kî pêkhei khah ingaisakin nin zôm ngêt rang a nit.

⁵Nin zianga ki zuk itir mai ngai ke som zânthlahei ṭong khom nin ngaisak rang a nit. Khanniseh, an thuhei nin lei izôm tlak ngai ino a nit.

⁶Thu zôm loia nin om maiin chu hi Tempil hih Silo [40] angkah khan isiang ki ta, rammuala nam tinrêngin hi khopui riming hih vânisâmnan mang tâng an ti,” itin.

⁷Khanchu, thiampuhei, zânthlahei neh mipuihei murdi khan hi thu Tempila ki înpuang khah an riat a.

⁸Mipui iril ranga PUMAPA thupêk murdi ken puang zoiin chu thiampuhei, zânthlahei neh mipuihei khan an ne man a, an ikhêk a, “Hi sika hin ithat inrup ni nit.

⁹Îtho rang im PUMAPA riming ichinga, ‘Hi Tempil hih Silo angkan om a ta, hi khopui khom hih â lua rang om loiin ram a ti,’ nî ti?” an ti a. Khanchu, mipuihei khah ne hualin an ribûm tûng tâk a.

¹⁰Hi thuhei hih Juda roirêltuhein an riatin chu rêng ina rithokin Tempil tiang an fe zel a, PUMAPA In lûtna Kotbâi Itharah khan an iṭhung a.

¹¹Khanchu, thiampuhei neh zânthlahei khan roirêltuhei neh mipui ziangah khan, “Hi mi hih ithi tlâk a nit, nin iriat angkan, ‘Hi Khopui hih ai siat rang a nit,’ itin a înpuang a nit,” an ti a.

¹²Khanungchu, keiman, “Hi Tempil neh hi khopui siat rang thu inpuang rangin PUMAPA khan a ne itir a nit.

¹³Nin om dân hei, nin châng dân hei siam inṭha unla, PUMAPA nin Pathian thu nin zôm ngêt rang a nit. Nin zômin chu nin chunga vânduaina inrît zuang itlung ranga lei inpuang tâk khah PUMAPA khan indanglam nôk a ti.

¹⁴Khan, kei chu nin kuta om ki nit a, â ṭha neh â dik nin ti lam takkan ki chungah tho rei.

¹⁵Khanniseh, nin ne thatin chu nangmani neh hi khopui sunga mipuihei hin mi ningsiat sin ino thisen mo nin ipêl rang a nit iti reh rei. Hi thu hih nin ikuar riata isîr rangin PUMAPA khan a ne itir a nit,” ki ti a.

¹⁶Khanungchu, roirêltuhei neh mipuihei khan thiampuhei neh zânthlahei ziangah khan, “Hi mi hih ithat rang ni mak e; PUMAPA ei Pathian rimingin ei ziangah thu a îsîr a nit,” an ti a.

¹⁷Kha rizoiah khan ram sunga ulian ṭhenkah an hong iding suak a, mipui ribûmhei ziangah khan,

¹⁸“Juda rêng Hezekia inlal lâiah khan Moreset mi zânthla Mika khan PUMAPA Tinrêngthothei thupêk khah Juda mipui murdi â ril a: “An ziangah, ‘Zion chu loi angkana tukilet chit nîng a ta, Jerusalem khom nimnok buk angkah nîng a ta, Tempil tlânghei chu rampui chang a ti,’ a ti a.

¹⁹“Rêng Hezekia neh Judai ram mipui khan Mika khah that mak a. Hezekia khan PUMAPA chu a ṭi a, inlôm rangin putak ai song a nit. Khanchu, PUMAPA khan an chunga vânduaina ithlun ai tum khah a îndanglam nôk a nit. Atûnah hin eini chu eimani chung ngêiah vânduaina inrît tak ei îthlun rang a nit tâk hih,” an ti a.

²⁰(Mi dang khatkah, Semaia naipa Uria, Kiriat-Jearim mi khan Jeremia angkan hi khopui neh hi nam idemin PUMAPA rimingin thu an puang ngai a.

²¹Rêng Jehoiakima neh a sipaihei, a milianhei khan Uria thu sîr khah an riat a, rêng khan ithat a tum tâk a. Uria khan a lei riatin chu a ṭi a, Aigupta ramah lâizâm a tho tâk a.

²²Khan khom rêng Jehoiakima khan Akbora naipa Elnathana neh mi ṭhenkah Uria man rangin Aigupta ramah a tir a.

²³Uria chu Aigupta rama rithokin rêng Jehoiakima ziangah an hong ṭhui a. Ani khan a lei that a, a ruak khah vântlâng thlânmualah an ipai tâk a nit.)

²⁴Khannisela, Safana naipa Ahikama khan a ne thlop ngit sikin ithat rangin mipui kutah an ne ilan ino a nit.